खोज

सुनवल, ०६ भदौ । हुलाक सडकको कामलाई तिब्रता दिन पश्चिम नवलपरासीको प्रतापपुर गाँउपालिकाले प्रधानमन्त्रीको ध्यानार्कषण गराएको छ । संघिय सरकारकै लगानीमा स्तरउन्नती भईरहेको सडकको काम वर्षौ बित्दा समेत पुरा नभएपछि गाँउपालिकाले प्रधानमन्त्रीको ध्यानार्कषण पत्रमार्फत काममा तिब्रता नआए आफुहरु अनसन बस्ने गाँउपालिका अध्यक्ष उमेशचन्द्र यादवले बताए । ‘अब पनि सडक निर्माणको कामले गति नलिए जनप्रतिनिधि सहित स्थानिय अनसनमा बस्छौ ।’—उनले भने । नारायणचोक त्रिवेणी खण्ड अन्र्तगतको गोपिगंजदेखि बेलाटारीसम्म साढे ६ किलोमिटर सडकको अवस्था जिर्ण हुदा यात्रामा कठिनाई भोग्दै आएका छन ।

सडक निकै जिर्ण बन्दा समेत मर्मत सम्भार र निर्माणमा ठेकेदारले कुनै चासो नदिएपछि प्रधानमन्त्रीलाई पत्राचार गरिएको गाँउपालिका अध्यक्ष यादवले बताए । यसअघि पटक पटक सरोकारवाला पक्षसंगको बैठकमा ठेकेदार र हुलाकी राजमार्ग योजना कार्यालयका प्रतिनिधिहरुले समयमै मर्मत सम्भारको काम गर्ने प्रतिवद्धता जनाएपनि वेवास्ता गर्दा स्थानियले सास्ती खेप्न बाध्य भएको उनले बताए ।

नवलपरासीमा तिन खण्डमा विभाजन गरेर भईरहेको हुलाकी सडकको काम लामो समयसम्म ढिलासुस्ती देखिएको छ । नारायणचोक त्रिवेणी खण्डको आधा काम पनि पुरा भएको छैन् । २०७६ सालको मंसिरमा ठेक्का सम्झौता भएको नारायण चोकदेखि त्रिवेणी सम्मको १६ किलोमिटर सडक निर्माणको हाल सम्म ४२ प्रतिशत मात्र भौतिक प्रगति छ । महालक्ष्मि जेभिले उक्त सडक विस्तारको लागी ४९ करोड रुपैयामा ठेक्का लिएको हो । ठेकेदारलाई ताकेता गर्दै आएको र अहिले पनि नाला निर्माणको काम मौसमको अनुलता अनुसार भईरहेको हुलाकी राजमार्ग योजना कार्यालय कपिलवस्तुका ईन्जिनियर युवराज पाण्डेले बताए ।

गत वर्ष थपिएको म्याद यहि वर्षको चैत्र महिनामा सकिदै छ । यो गतिको कामले उक्त अवधिसम्म आधा पनि काम पुरा नहुने देखिएको छ । साथै गाँउपालिका अध्यक्ष यादवले हुलाकी सडकमा भईरहेको काममा गुणस्तरीयताको पनि प्रश्न खडा भएको बताए ।

हुलाकी राजमार्ग योजना कार्यालयका प्रमुख देखि कर्मचारीहरु नै ठेकेदारको बचाउमा बोल्ने गरेका छन् । ठेकेदारलाई दबाब बढाउनुको साटो भौतिक प्रगती अनुसारको रकम फटाफट भुक्तानी दिने गरेको गुनासो छ । जिल्लामा अन्य दुई खण्डको हुलाकी सडकको अवस्था पनि उस्तै छ । सदरमुकाम परासीदेखि नारायणचोक जोड्ने साढे १२ किलोमिटर सडक ८ वर्ष हुदा समेत अझै पुरा भएको छैन् । ९ किलोमिटर लामो प्रतापपुर कठहवा जोड्ने सडक विस्तारमा पनि उस्तै ढिलासुस्ती छ । सडकको जिर्णअवस्थाले हुलाकी सडकमा यात्रा गर्न सकिने अवस्था छैन् । हिलो र खाल्डाखुल्डीका कारण सवारी दुर्घटनामा समेत वृद्धि भएको छ ।