खोज

सुर्खेत, ६ भदौ ।

कर्णाली प्रदेशमा आगामी मंसिर २ देखि ९ गतेसम्म हुने भनिएको दशौँ राष्ट्रिय खेलकुद प्रतियोगिताको मिति तोकिएकै समयमा नहुने संकेत देखिएको छ ।

गण्डकी प्रदेशको राजधानी पोखरामा सम्पन्न नवौँ राष्ट्रिय खेलकुद समापन समारोहबाट कर्णालीले मंसिर दुई गतेदेखि ९ गतेसम्म दशौँ राष्ट्रिय खेलकुद आयोजना गर्ने घोषणा गरिएको थियो । सोही घोषणाअनुरुप कर्णालीले दशौँ राष्ट्रिय खेलकुद आयोजनाका लागि व्यापक तयारी समेत गरिरहेको छ ।

पहिलोपटक ठूलोे खेलकुद प्रतियोगिता सञ्चालन गर्ने अवसर पाएको कर्णालीले नयाँ खेलकुद पूर्वाधार निर्माणदेखि मर्मत लगायतका खेलकुद गतिविधिलाई तीव्रता दिइरहेको कर्णाली खेलकुद विकास परिषद्ले जनाएको छ ।

कर्णालीमा खेलाउन सकिने खेलहरूको वर्गीकरण गरेर १० वटै जिल्लामा सञ्चालन गर्ने गरी तयारी भइरहेको परिषद्ले जनाउँदै आएको छ । परिषद्का सदस्यसचिव विश्वामित्र सञ्ज्यालले २ मंसिरलाई आधार मानेर परिषद्ले सयदिने काउन्ट डाउन सुरुवात समेत गरिसकेको जनाए । सोही बमोजिम दुई अंकको पदक चुम्ने लक्ष्यसहित खेलाडीहरू बन्द प्रशिक्षणमा रहिसकेका छन् ।

यसमा कर्णाली सरकारको फरक धारणा आएपछि तोकिएकै मितिमा खेलकुद प्रतियोगिता हुने विषयमा अन्योल छाएको देखिन्छ । कर्णाली प्रदेश सरकारका मुख्यमन्त्री यमलाल कँडेलले दशौं राष्ट्रिय खेलकुद प्रतियोगिताको लागि पूर्वाधार निर्माणको काम सकेर मात्र मिति तोक्नुपर्ने बताएका छन् । उनले निर्धारित समयमा पूर्वाधार निर्माणको सुनिश्चिता गरेर मात्र मिति तोक्न संघीय सरकारलाई आग्रह गरेका छन् ।

भौतिक पूर्वाधार निर्माण सम्पन्न भइनसकेको अवस्थामा खेलकुद परिषद्लाई हतार नगर्न पटक–पटक सम्झाउँदै आएका छन् । संघीय सरकार मुख्य आयोजक रहने प्रतियोगितामा आवश्यक बजेट व्यवस्थापनलगायतका पक्षहरूको टुङ्गो नलागेको अवस्थामा परिषद्ले गरेको काउन्ट डाउनलाई मुख्यमन्त्री कँडेलले हतारोको संज्ञा दिँदै आएका छन् । ‘अहिले मिति तोक्ने पछि यो भएन र उ भएन भन्ने तहमा गइयो भने हामी सबै असफल हुन्छौं ।’ युवा तथा खेलकुद मन्त्री तेजुलाल चौधरीसँगको भेटमा मुख्यमन्त्री कडेलले भने, ‘अहिले भइरहेका पूर्वाधारहरु समयमै सम्पन्न हुने सुनिश्चिता पछि मात्र मिति तोकौैैं ।’

गएको मंगलवार मुख्यमन्त्री कँडेलसँगको भेटमा संघीय युवा तथा खेलकुदमन्त्री तेजुलाल चौधरीले १५ दिने मूल्यांकनका आधारमा मात्रै तोकिएको मितिमा खेल हुने वा नहुने विषय टुङ्गो लाग्ने बताएपछि अझै अन्योलता छाएको छ ।