खोज

काठमाडौं, ०६ भदौ ।

नेपालमा पर्याप्त मात्रामा रोजगारीको अवसर सृजना हुन नसक्दा वर्सेनि लाखौं नेपाली वैदेशिक रोजगारीमा जान बाध्य छन् । सरकारले श्रम स्वीकृति दिएर विदेश जान अनुमति दिन थालेको ३० वर्षमा पछिल्लो तीन आर्थिक वर्षमा मात्र २१ लाख ४१ हजार युवाले रोजगारीका लागि श्रम स्वीकृति लिएर देश छोडेका छन् ।

वैदेशिक रोजगार विभागको गत तीन वर्षको तथ्यांक हेर्दा औसतमा वार्षिक ७ लाख १५ हजार नेपाली युवा रोजगारी खोज्दै विदेश गएको देखिन्छ । विदेश जान श्रम स्वीकृति लिनेमा ६४ प्रतिशत नयाँ श्रमिक हुने गरेका छन् । त्यस्तै, ३६ प्रतिशत बिदामा आएर पुनः श्रम स्वीकृति लिनेको संख्या हुुने गरेको छ ।

गत आर्थिक वर्ष २०८०/८१ मा वैदेशिक रोजगारीमा जान झण्डै साढे ७ लाख नेपालीले श्रम स्वीकृति लिएका छन् । वैदेशिक रोजगार विभागका अनुसार गत आर्थिक बर्षमा ७ लाख ४१ हजार ३ सय ९७ जना श्रम स्वीकृति लिएर विदेशिएका हुुन् । आर्थिक वर्ष २०७९/८० को तुलनामा २०८०/८१ मा वैदेशिक रोजगारीमा जानेको संख्या केही घटेको छ । २०७९/८० मा ७ लाख ७१ हजार ३ सय २७ जनाले बैदेशिक रोजगारीमा जान श्रम स्वीकृति लिएका थिए । २०७९/८० को तुलनामा २०८० /८१ मा २९ हजार ९ सय ३० झण्डै ४ प्रतिशतले घटेको हो । वैदेशिक रोजगारको ३० वर्षको इतिहासमा आर्थिक बर्ष २०७९/८० मा सबैभन्दा बढी युवाले विदेश जान श्रम स्वीकृति लिएका थिए । त्यस्तै, आर्थिक बर्ष २०७८/७९ मा ६ लाख ३० हजार ९० जना नेपाली श्रमिकले विदेश जान श्रम स्वीकृति लिएका थिए ।

गत आर्थिक बर्षमा वैदेशिक रोजगारीका लागि ४ लाख ६० हजार १ सय ३ जना नयाँ अर्थात् पहिलो पटक श्रम स्वीकृति लिएर विदेश गएका हुन् । बाँकी २ लाख ८१ हजार १ सय ९५ जनाले भने पुरानै श्रम स्वीकृत नविकरण गरेका हुन् । त्यस्तै, गत आर्थिक बर्षमा वैदेशिक रोजगारीमा जानेमा ६ लाख ६१ हजार १ सय २५ जना पुरुष र ८० हजार १ सय ७२ जना महिला नेपाली कामदार छन् । पुरुषतर्फ ४ लाख ५ सय ४५ जना र महिला तर्फ ५९ हजार ५ सय ५७ जनाले नयाँ श्रम स्वीकृति लिएको तथ्यांकमा उल्लेख छ ।

वैदेशिक रोजगारीका लागि गत आर्थिक बर्षमा श्रम स्वीकृति सबैभन्दा धेरै जेठ महिनामा ७२ हजार ८ सय ६१ जनाले लिएका छन् । त्यस्तै, वर्षको पहिलो महिना साउनमा ५५ हजार ५ सय ७५ नेपाली वैदेशिक रोजगारमा गएको देखिन्छ । यसैगरी, भदौमा ५० हजार ८ सय ८४, असोजमा ५६ हजार २ सय ३५, कात्तिकमा ४३ हजार ६ सय २२, मंसिरमा ६८ हजार २ सय १, पुसमा ६५ हजार ८ सय १३ र माघमा ६२ हजार १सय ४७ जना नेपाली वैदेशिक रोजगारीमा गएका छन् । यसैगरी फागुनमा ६५ हजार ६ सय ५८, चैतमा ७० हजार ९सय ३३, बैशाखमा ७० हजार ६ सय ३७, जेठ ७२ हजार ८सय ६१ र असार ५८ हजार ७ सय ३६ नेपाली वैदेशिक रोजगारीमा गएका छन् ।

गत आर्थिक बर्षका १ सय ४९ देशमा नेपालीहरू काम गर्न गएको देखिन्छ । त्यसमा सबै भन्दा धेरै युएईमा गएका छन् । उक्त देशमा १ लाख ९३ हजार ४ सय ३८ जना नेपाली रोजगारी लागि गएका छन् । त्यसैगरी दोस्रोमा भने साउदी अरब रहेको छ । उक्त देशमा गत आर्थिक बर्षका १ लाख ४१ हजार ५ सय २ जना नेपाली रोजगारको लागि गएका छन् । तेस्रो नम्बरमा भने कतार रहेको छ । गत आर्थिक बर्षमा १ लाख ३४ हजार ६ सय ६९ जना नेपाली रोजगारीको लागि गएका छन् । यसैगरी मलेसियामा १ लाख ३ हजार ४सय ४२, कुवेतमा ४० हजार ३ सय ६८, क्रोयशियामा १५ हजार ३ सय ६४, रोमानियामा १५ हजार २१, जापान १३ हजर ८ सय ६४ र कोरिया १३ हजार २६ जना नेपाली रोजगारीमा गएका छन् । यी बाहेक १ सय ४० देशमा पनि नेपालीहरू रोजगारीका लागि गएका छन् ।

बैदेशिक रोजगार विभागका निर्देशक गुुरुदत्त सुुवेदीले स्वदेशमा रोजगारीको अवसर नपाएर पछि पछिल्लो समयमा ठुलो संख्या बाध्यात्मक वैदेशिक रोजगारी जानुुपर्ने अवस्था रहेको बताए । स्वदेशमा पर्याप्त आन्तरिक रोजगारीका अवसर नहुँदासम्म बाध्यात्मक रूपमा वैदेशिक रोजगारीमा जाने क्रम नरोकिने पछिल्ला तीन वर्षमा श्रम स्वीकृति लिएर गएको तथ्याङ्कले पनि पुुष्टि गरेको उनको भनाइ छ । निर्देशक सुवेदी मलेसियाले आप्रवासी श्रमिक लैजान बन्द गरेका कारण पनि गत बर्षको संख्यामा केही कमी आएको बताउँछन् ।

एक वर्षमा साढे १४ खर्ब रेमिट्यान्स भित्रियो
गत आर्थिक बर्षमा श्रम स्वीकृति लिएर वैदेशिक रोजगारीमा जाने नेपालीको संख्या केही कम भए पनि रेमिट्यान्समा भने वृद्धि भएको छ । नेपाल राष्ट्र बैंकले आइतबार सार्वजनिक गरेको गत आर्थिक वर्षको वार्षिक तथ्यांकले विदेशमा काम गर्न गएका नेपालीले गत आर्थिक वर्ष २०८०/८१ मा १४ खर्ब ४५ अर्ब ३२ करोड रेमिट्यान्स पठाएको देखाएको हो । नेपाल राष्ट्र बैंकका अनुसार अघिल्लो आर्थिक वर्ष ०७९/८० को तुलनामा गत आर्थिक वर्षमा १६.५ प्रतिशतले बढी रेमिट्यान्स नेपाल भित्रिएको हो ।
अमेरिकी डलरमा विप्रेषण आप्रवाह १४ दशमलव पाँच प्रतिशतले वृद्धि भई १० अर्ब ८६ करोड पुगेको छ । आव २०७९/८० मा यस्तो आप्रवाह १३ दशमलव नौ प्रतिशतले बढेको थियो ।