खोज

नवलपुर, १ भदौ ।

पुर्वी नवलपरासीको देवचुली नगरपालिका वडा नं. १७ झराईखोलामा सञ्चालन गरेको धर्मकाँटामा प्रहरीले ताला लगाइदिएको छ ।

पश्चिमाञ्चल यातायात व्यवशायी समितिले सञ्चालन गरेको उक्त धर्मकाटामा प्रहरीले ताला लगाएको हो ।

धर्मकाँटाको नाममा अनेकौं बिकृति फैलिएको भन्दै जिल्ला प्रहरी कार्यालयले जिल्ला प्रशासन कार्यालय, स्थानीय जनप्रतिनिधि र पत्रकारको रोहबरमा ताला लगाएर धर्मकाँटा सञ्चालनमा रोक लगाएको हो । धर्मकाँटाको नाममा खुलेआम लुट मच्चाएको, अराजकता, मनपरितन्त्र र गुण्डागर्दी चलाएकाले बन्द गराइएको जिल्ला प्रहरी कार्यालयका प्रमुख, प्रहरी उपरीक्षक नरहरि रेग्मीले बताए ।

चितवनको आँपटारीमा सरकारी धर्मकाँटा भएकाले यहाँ खुलेआम लुट मच्चाउन धर्मकाँटा नचाहिने प्रहरीको भनाई छ । धर्मकाँटाले नेपालीभन्दा पनि भारतीय ट्रकहरुलाई लुटेको रेग्मीले बताउन भएको छ ।

धर्मकाँटा राखेर तौल गर्नु, बढी तौल बोक्नेलाई नियन्त्रण गर्नुे राम्रो उद्देश्य भए पनि उद्देश्य विपरितका क्रियाकलाप बढिरहेको र यो काम राज्यको नियन्त्रणमा हुनुपर्ने रेग्मीको भनाइ छ । बढी तौल भयो भन्दै हजारौं जरिवाना गर्ने गरेर रकम कुम्ल्याउने काम मात्र भएको छ ।

ठिक्क तौल भएका गाडीहरुलाई पनि बढी तौल भयो भनेर रकम लुट्न खोज्ने, पैसा दिन नमाने चिट काटेर दुःख दिने गरेको प्रहरीको भनाइ छ । मुख्य राजमार्गभन्दा एक किलोमिटर भित्र धर्मकाँटा हुनु पर्ने मापदण्ड भए पनि यो भने पाँच सय मिटरको दुरीमा भएकाले मापदण्ड विपरित सञ्चालन गरिएको रेग्मीले बताए ।

खुलेआम लुट मच्चाएको भन्दै प्रहरीले तीन पटकसम्म कर्मचारीहरुलाई नियन्त्रणमा लिइ सम्झाई बुझाई गरेर छोडे पनि नियन्त्रण नभएको जिल्ला ट्राफिक प्रमुख अच्युतराज आचार्यले बताए । धर्मकाँटा राखेको स्थानमा ट्राफिक प्रहरीको पनि उपस्थिति नभएकाले बेथिती थप मौलाएको उनको भनाई छ ।

ट्रकहरुलाई कारवाही गर्दा दैनिक ७–८ हजार रुपैयाँ उठ्ने गरेको पश्चिमाञ्चल व्यवसायी समितिका उपाध्यक्ष शोभाकान्त पाण्डेले जानकारी दिए । त्यो रकम पश्चिमाञ्चल व्यवसायी समितिको खातामा जम्मा हुने गरेको र जसको कार्यालय लुम्बिनी प्रदेशको बुटवलमा रहेको छ ।