खोज

सुर्खेत, ३२ साउन ।

कर्णालीका सामाजिक विकास मन्त्री घनश्याम भण्डारीले प्रदेश अस्पताललाई प्रतिष्ठानका रूपमा स्तरवृद्धि गर्न पहल गरिने बताएका छन् । कर्णाली प्रदेश अस्पताललाई स्वास्थ्य विज्ञान प्रतिष्ठान बनाउने विषयमा कुनै समस्या नभएको भण्डारीले स्पष्ट पारे । आज अस्पतालले आयोजना गरेको बधाई तथा शुभकामना कार्यक्रममा प्रदेश सरकारको आन्तरिक आम्दानी कमजोर भएको अवस्थालाई प्रष्ट पार्दै प्रदेश सरकारलाई आर्थिक व्ययभार नबढ्ने गरी प्रतिष्ठानका लागि पहल गरिने प्रतिवद्धता जनाए । त्यसका लागि आवश्यक प्रक्रिया भने पुरा गर्नुपर्ने उनको भनाई छ ।

अस्पतालबाट प्रदान हुने सेवा प्रवाहमा राम्रो प्रयास भएको बताउँदै मन्त्री भण्डारीले सेवाग्राहीको आवश्यकतालाई ध्यान दिन निर्देशन दिएका छन् । अस्पतालको सेवा प्रवाहमा राम्रो देखिए पनि सेवाग्राही अझैपनि विश्वस्त हुन नसकेका प्रति सचेत हुनुपर्ने उनको भनाई थियो । सेवा प्रदायक निकायका व्यक्तिले सेवाग्राहीसँग गरिने व्यवहारमा सुधार गर्नुपर्ने मन्त्री भण्डारीको सुझाव थियो । सार्वजनिक सेवा र वस्तु प्रवाहमा कमजोरी नगर्न आग्रह गर्दै सरकारका तर्फबाट गरिने महत्वपूर्णं कार्यसम्पादनमा पदमा नहुँदा पनि सहयोग गर्ने प्रतिवद्धता मन्त्री भण्डारीले जनाए ।

प्रदेश अस्पतालका निर्देशक प्राध्यापक डाक्टर डम्बर खड्काले गरीब जनताको अवस्थालाई हेरेर त्यस अनुरूपको कार्ययोजना बनाउन आग्रह गरे । स्वास्थ्य संरचनाका लागि सरकारका योजनाहरू प्राथमिकतामा नपरेको उनले औल्याए ।

अस्पताल व्यवस्थापन समितिका अध्यक्ष प्रेमबहादुर घलेले अस्पताल व्यवस्थापनका लागि विगतको तुलनामा बजेट घटेको बारे जानकारी गराउँदै त्यसतर्फ ध्यानाकर्षण गराए ।