खोज

बुटवल, ३१ साउन । बुटवलको अमरपथ र आसपास क्षेत्र डुबान रोक्न उपमहानगरपालिकाले वैकल्पिक उपायको खोजी गर्ने निर्णय गरेको छ । बिहिबार डुबान क्षेत्रको अनुगमन गर्दै बुटवल उपमहानगरपालिकाका प्रमुख खेलराज पाण्डेय, उपप्रमुख सावित्रादेवी अर्याल, वडाध्यक्षहरु र प्राविधिकहरुसहितको टोलीले वैकल्पिक उपायको खोजीमा आफुहरु रहेको बताए ।

इलाका प्रहरी कार्यालयदेखि तिनाउ नदीसम्मको नाला र अमरपथ हुँदै कृषि मण्डीतर्फको नालाको अनुगमनका क्रममा केही संघसंस्थाले नाला र नहरमाथि बनाएका संरचनाका कारण पानीको निकासमा अवरोध भएको र अमरपथदेखि कृषि मन्डीतर्फको नालाको वास्तविकता यकिन गर्न नसकिने भएकाले निकासमा समस्या देखिएको उपमहानगरपालिकाका प्रमुख खेलराज पाण्डेयले बताए । विगतमा अमरपथदेखि बस्तीमुनिबाट मुख्य राजमार्ग कृषि मण्डी हुँदै तिनाउमा खस्ने पानीको निकासमा समस्या देखिएकाले अमरपथ क्षेत्र डुबान हुने गरेको नगर प्रमुख खेलराज पाण्डेयले दाबी गरे । ‘कतिपय स्थानमा नहरमाथि संरचना बनाइएकाले त्यस्ता संरचनाका कारण बाढीमा ओभरफ्लो भएर सडकमा पानी जम्मा हुने गरेको छ ।’—उनले भने ।

उनले

सडक र बस्तीको बीचबाट लगिएको निकासका बारेमा अध्ययन गर्ने, सम्भव हुने स्थानसम्म सरसफाई गर्ने र सहज विकल्प खोज्ने गरी नगरले योजना बनाउने निर्णय गरेको बताए । ‘नालामा भरिएको फोहोर र माटो सरसफाइ गरेर निकासलाई केही सहज बनाउने काम छिटै नै शुरु गर्छौं ।’—उनले भने । दिगो समाधानका लागि अमरपथतर्फ पानी आउन नदिने गरी त्यसभन्दा माथिको भागबाट नहरको पानी तिनाउमा खसाल्ने बाहेक तत्काल अरु विकल्प नदेखिएको उनले प्राविधिक टीमबाट सुझाव आएको बताए ।  उनले इलाका प्रहरी कार्यालय नजिकैबाट तिनाउमा पानी खस्ने गरी बनाइएको संरचना पनि सडक मुनिबाट रहेकाले त्यसको सरसफाइ गर्ने र केही पानी त्यहाँबाट बग्नसक्ने गरी व्यवस्था मिलाउने बताए ।
उपप्रमुख सावित्रादेवी अर्यालले तत्काल सम्भव भएसम्मको उपाय अपनाएर डुबान हुन नदिने गरी काम गर्ने बताइन् । उनले कतिपय स्थानमा नहरको क्षेत्र अतिक्रमण भएको र पानी बग्ने निकास रोकिएकाले डुबान भएको र यसको समाधानका लागि प्राविधिकसहितको टोली खटिएको बताइन् ।

वडाध्यक्षहरु हरिप्रसाद श्रेष्ठ र विष्णु ढकालले पानीको निकास हुने ठाउँहरुको अवरोध हटाउन सकेमा डुबानको समस्या केही कम हुने र दीर्घकालीन व्यवस्थापनका लागि विकल्पमा लाग्नुपर्ने बताए ।