खोज

सुर्खेत, २९ साउन ।

कर्णाली प्रदेश सरकारले एक वर्षको अवधिमा दुध उत्पादक किसानलाई प्रोत्साहनबापत एक करोड बढी रकम उपलब्ध गराएको छ । सरकारले गत आर्थिक वर्ष २०८०÷०८१ मा उक्त रकम उपलब्ध गराएको हो । प्रदेशभर एक वर्षको अवधिमा ३७ लाख ९१ हजार चार सय २९ लिटर दुधमा एक करोड २३ हजार प्रोत्साहन रकम अनुदानवापत उपलब्ध गराइएको भूमी व्यवस्था तथा कृषि सहकारी मन्त्रालयले जनाएको छ । जसबाट तीन हजार सात ७६ कृषक लाभान्वित भएका छन् ।

दूध उत्पादक किसानलाई प्रोत्साहन गर्ने उद्देश्यले प्रोत्साहन रकम उपलब्ध गराइएको हो । साविक कर्णालीका पाँच जिल्लामा प्रति लिटर १० रुपैयाँ र अन्य जिल्लामा पाँच रुपैयाँका दरले रकम उपलब्ध गराइएको हो ।

प्रोत्साहन कार्यक्रम अन्तर्गत सबैभन्दा धेरै सुर्खेतका दूध उत्पादक किसान लाभान्वित भएका छन् । मन्त्रालयले गत आर्थिक वर्षमा सुर्खेतका दुई हजार ४१ कृषकलाई ४९ लाख २९ हजार रुपैयाँ प्रोत्साहन रकम प्रदान गरेको मन्त्रालयको तथ्यांक रहेको छ । दूध उत्पादन गरेवापत सल्यानका ६ सय ४१ किसानले १३ लाख ३४ हजार प्रोत्साहन रकम प्राप्त गरेका छन् । यस्तै रुकुम पश्चिमका चार सय ७७ किसानलाई १५ लाख, जाजरकोटका ७१ किसानलाई चार लाख २३ हजार, दैलेखका चार सय ३४ किसानलाई १० लाख ५३ हजार रुपैयाँ दूध उत्पादन गरेवापात प्रोत्साहन रकम प्रदान गरिएको मन्त्रालयले जनाएको छ ।

यस्तै, कालिकोटका एक सय चार किसानलाई सात लाख, हुम्लाका आठ किसानलाई ८५ हजार तीन सय ६० रुपैयाँ दुग्ध उत्पादक किसानलाई प्रोत्साहन अनुदान बापत प्रदान गरिएको मन्त्रालयले उपलब्ध गराएको तथ्यांकमा उल्लेख छ । मुगु र डोल्पामा भने दूध उत्पादक किसान नभएकाले प्रोत्साहन रकम वितरण गरिएको छैन ।

मन्त्रालयका प्रवक्ता धनबहादुर कठायतका अनुसार प्रदेशभरका कृषकलाई प्रोत्साहन गर्नको लागि कार्यक्रम अगाडी बढाइएको जनाए । ‘पालिका स्तरका डेरीहरुमा दुध उपलब्ध गराएका कृषकहरुको मात्र तथ्यांक समावेश भएको छ । यसमा व्यक्तिगत रुपमा घर तथा पसलमा दुध बिक्री गर्ने कृषकहरुको तथ्यांक समावेश गरिएको छैन’ कठायतले भने, ‘दुध उत्पादन गर्ने सबै कृषकहरुलाई कार्यक्रममा समावेश गरेर अघि बढ्ने लक्ष्य छ ।’