खोज

सुनवल, २७ साउन ।

घाम लाग्ने बित्तिकै धुलाम्मे र पानी पर्ने वित्तिकै हिलाम्मे हुने नारायणगढ–बुटवल सडक खण्डका कारण सडकमा यात्रा गर्ने मात्र होईन सडक किनारमा बस्नेहरु पनि आजित भएका छन् । अझ व्यवसायीहरु त सडककै कारण व्यापार व्यवसाय चौपट बन्दा चिन्तित बनेका छन् । कछुवा गतिमा चलिरहेको निर्माणाधीन बुटवल–नारायणगढ सडक बिस्तारका क्रममा बजार क्षेत्र खाल्डाखुल्डी र हिल्लाम्मे भएको भन्दै बर्दघाटका ब्यवसायीहरु आइतबार सडक बन्द गरेर विरोधमा उत्रिएका छ्न । पुर्वपश्चिम राजमार्ग अन्तर्गत बर्दघाट मुख्य बजार क्षेत्रमा ब्यवसायीहरुले आइतबार बिहान सांकेतिक रुपमा १५ मिनेट पुर्व पश्चिम राजमार्ग अवरुद्ध गरेका हुन् । बर्दघाट बजार विकास समितिको अगुवाईमा ब्यवसायीहरु विरोध कार्यक्रममा उत्रिएका थिए ।

बर्दघाट बजार क्षेत्रका खाल्डाखुल्डी र हिलाम्मे सडकका कारण दुर्घटनाको जोखिम बढेको, मुख्य बजार क्षेत्रमै कामले गति नलिदा सडककै दुरावस्थाका कारण आर्थिक मन्दीको अवस्थामा ब्यवसायमा चरम असर पुगेकोले आन्दोलनमा उत्रनु परेको ब्यवसायीहरुको भनाई छ । स्थानीय सरकारले सम्बन्धित ठेकेदार कम्पनीलाई बजार क्षेत्रको सडक द्रुत गतिमा निर्माण गर्न दवाब दिनुपर्ने, खाल्डाखुल्डी पुर्न यथाशीघ्र पहल गर्नुपर्ने स्थानीय ब्यवसायीहरुको माग छ । चाडवाड समेत नजिकिसकेको अवस्थामा ठेकेदारका कारण व्यापार व्यवसायमा निकै असर परेकाले बाध्य भएर आन्दोलनमा उत्रनुपरेको व्यवसायी दिनेश न्यौपानेले बताए ।

नागरिकस्तरबाट विभिन्न दवावमुलक कार्यक्रम गर्दै आएपनि बर्षायाममा बर्दघाट मुख्य बजार क्षेत्रदेखि चिसापानी सम्मको सडक हिल्लाम्मे हुँदा दिनहुँजसो दुर्घटना हुने गरेको छ । हिलो र खाल्डाखुल्डीले चिसापानी सम्मको करिब १ किलोमिटर सडकको यात्रा निकै जोखिमपुर्ण रहेको छ ।

विभिन्न माध्यमबाट पटकपटक ताकेता गर्दा समेत निर्माण कम्पनीले आलटाल गर्दै आईरहेको छ । अहिले वर्षायाम लागेको भन्दै ठेकेदारले काम नै बन्द गरेपछि सडकमा समान्य खाल्डाखुल्डी पुर्ने काम पनि अवरुद्ध छ ।

नारायणगढ–बुटवल सडक खण्डको पश्चिम खण्डका सूचना अधिकारी ईन्जिनियर शरद श्रेष्ठले भने, “अहिले कामदारलाई नै ठेकेदारले बिदा दिएकाले काम रोकिएको छ ।” वर्षायाममा बेस, सववेशका काम गर्न पनि नसकिने भएकाले काम रोकिएको र पानी पर्ने क्रम रोकिएपछि तत्कालै काम सुरु हुने बताए । अहिले आयोजनाले दाउन्ने खण्डमा सडक अवरुद्ध हँुदा बाहेक अन्य स्थानमा काम गरेको छैन । सडकको दुरावस्थाका कारण १ सय १३ किलोमिटर लामो यो सडक खण्डको यात्रा कष्टकर बनेको छ । विशेषगरी बर्दघाटदेखि बुटवलका केही बजार क्षेत्रमा सडक कालोपत्रे भएपनि बर्दघाट बजार क्षेत्रमा हुन सकेको छैन । जसका कारण हिलोले आउजाउ गर्न निकै कठिनाई भएको छ । सूचना अधिकारी श्रेष्ठले बर्दघाट, खैरेनी र बुटवल क्षेत्रमा सडक कालोपत्रेका लागि प्राथमिकतामा राखिएको बताए ।