खोज

बुटवल, २६ साउन ।
संविधानको मर्म र भावना विपरित महिलाका मुद्दाहरूलाई कुल्चिने काम अहिलेको सरकारले गरेको भन्दै बाँकेकी निर्मल कुर्मीको न्यायको लागि शुक्रबारदेखि माइतीघर मण्डलामा शान्तिपूर्ण आन्दोलन सुरु भएको छ । अहिलेको सरकारले पीडितलाई अझै पीडा दिएर अपराधीको संरक्षण गर्दै राज्य सञ्चालनको जिम्मा दिएर संविधानको धज्जी उठाएको अधिकर्मी रुवि खान बताउँछिन् ।

लोकतन्त्रको भावना र संविधानको मर्म विपरित सरकारको असंवेदनशील कदम विरुद्ध नेपालको संविधान हातमा बोकी पाँचौ चरणको शान्तिपूर्ण अन्दोलन सुरु गरेको उनले बताईन् । निर्मला कुर्मीको मुद्दा अदालत पठाउन पटक पटक सरकारले सहमति गरेपनि आफूहरूलाई कमजोर बनाउन खोज्दै मुख्य अभियुक्तलाई नै प्रदेश मन्त्री बनाई सत्ताधारी पार्टीले संरक्षण गरेको भन्दै महिला अधिकारकर्मी र पीडित परिवारले पुनः आन्दोलन सुरु गरेका हुन् ।

मुख्यमन्त्री चेतनारायण आचार्यले बादशाहलाई ९ साउनमा बिनाविभागीय मन्त्री नियुक्त गरेका हुन् । कांग्रेसबाट सरकारमा गएका उनी वन तथा वातावरणमन्त्री छन् । २०७८ असोजमा उनीहरू नेपालगञ्जबाट १९ दिन पैदलै हिँडेर काठमाडौंसँग न्याय माग्न आएका थिए । ०७८ मा सरकारले गृहमन्त्रालयका तत्कालीन सहसचिव हिरालाल रेग्मीको संयोजकत्वमा गठन गरेको छानबिन समितिले नै कुर्मी अपहरण तथा बेपत्ता प्रकरणमा बादशाहको भूमिका शंकास्पद देखिएको उल्लेख छ । उनमाथि अनुसन्धान गर्नुको साटो मन्त्री बनाएपछि अधिकारकर्मीहरू चौथो पटक माइतीघर आइपुगेका छन् ।

कांग्रेसले २०७९ मंसिरमा प्रदेश सभाको टिकट दिएपछि उनी बाँके ३ (ख) बाट निर्वाचित भए । सहमति बमोजिम अनुसन्धान प्रक्रिया बढाउनुको साटो कुर्मीलाई प्रदेश सांसद चुनिएपछि आन्दोलन टोली ०७९ पुसमा काठमाडौं आएका थिए ।
तीन बुँदे माग राख्दै उनीहरूले शुक्रबारदेखि पाँचौ चरणको आन्दोलन सुरु गरेका हुन् । निर्मला कुर्मी हत्याका मुख्य अभियुक्त बादशाह कुर्मीलाई मन्त्री पदबाट तत्काल हटाईयोस्, कुर्मी हत्या मुद्दा तत्काल अदालत पु¥याइयोस् आन्दोलनकारीहरूको सुरक्षाको ग्यारेन्टी गरियोस् भन्दै उनीहरूले आन्दोलन पुनः सुरु गरेका हुन् ।

बाँकेकी निर्मला कुर्मीको अपहरण तथा शरिर बन्धक, कर्तव्य ज्यान मुद्धा र सम्पत्ति हिनामिनामा संलग्न रहेको भनिएका बादशाह कुर्मीले साउन ९ गते लुम्बिनी प्रदेशको मन्त्रीको रूपमा सपथ लिएका हुन् । अहिले उनले वन मन्त्रीको जिम्मा पनि पाइसकेका छन् ।
को हुन् निर्मला कुर्मी ?

०६२ सालमा श्रीमानको मृत्यु भएपछि नेपालगञ्जकी निर्मला कुर्मी २ छोरासँग बस्दै आएकी थिइन् । तर, ०६६ सालमा दुवै छोराको केवल १० दिनको फरकमा शंकास्पद मृत्यु भएपछि त्यसको छानबिन हुनुपर्ने माग उठाउँदै आएकी थिइन् ।
२ छोराको मृत्युमा बादशाह कुर्मी संलग्न रहेको र बेलाबेलामा ज्यान मार्ने धम्कीसमेत दिँदै आएको बताउँदै कुर्मीले प्रशासन पनि गुहारेकी थिइन् । तर, उनले कुनै सहयोग नपाएपछि आफूहरूको सम्पर्कमा आएको रुबीको दाबी छ । उनी ०६६ माघमा महिला अधिकार मञ्च, बाँकेका आफूले न्याय नपाएको गुनासो लिएर पुगेकी थिइन् ।

श्रीमान र २ छोरा गुमाएपछि निर्मला एक्लै भएकी थिइन । माइती र घर सबैतिर कमजोर भएपछि उनको सम्पत्तिमाथि आँखा लगाएका थिए । अधिकारकर्मी खान भन्छिन्, ‘बादशाहले नै विष खुवाएर मारेको भन्ने उहाँको भनाइ थियो । कति सत्य हो, त्यो अनुसन्धान त हुनुप¥यो ।’
दुई छोराको शंकास्पद मृत्यु भएपछि लामो समयदेखि अनुसन्धान माग गर्दै आएकी निर्मला ०७५ सालमा बेपत्ता भइन् । त्यतिबेला उनको नाममा रहेको करिब ४ बिघा १० कट्ठा जमिन भूमाफियाको कब्जामा परेर विभिन्न व्यक्तिको नाममा दर्ता भइसकेको थियो । त्यसपछि ०७८ कात्तिकमा कुर्मीको भारतमा मृत्यु भएको बाहिरिएको थियो ।

घटनाका प्रमाण सरकारकै प्रतिवेदन भएको र आफुहरूसँग भएका सहमति हुँदाहुँदै पनि सरकार पिच्छे न्याय मार्ने काम भइरहेको रुवी बताउँछिन् ।