खोज

लमही, २२ साउन ।
केही समययता लमही लागूऔषधको ट्रान्जिट एरिया बन्दै जान थालेको छ । प्रत्येक हप्ता प्रहरीले कारोबारमा संलग्नहरूलाई सार्वजनिक गरि मुद्दा चलाएको छ । सो कारोबारमा स्थानीय युवा देखि अधिकांश कोठा भाडामा लिएर सो कार्यमा संलग्न हुने गरेको र ती मध्ये महिला र युवा रहेको वडा प्रहरी कार्यालय लमहीका प्रहरी निरीक्षक प्रकाश भुसाल बताउँछन । शनिवार राती ब्राउन सुगर सहित लमहीबाट चारजनालाई पक्राउ गरिएको छ ।

जिल्ला प्रहरी कार्यालय दाङका प्रवक्ता प्रहरी नायव उपरीक्षक रामप्रसाद तिमल्सिनाले जानकारी दिए अनुसार पक्राउ पर्नेहरूमा लमही–५ न्युरोडका २२ वर्षीय रवि रसाइली, गोरक्षरोडका २५ वर्षीय आकाश रोका मगर, गढवा गाउँपालिका– ६ कोइलावासका ३६ वर्षीय अब्दुल जम्बार रङरेज र भारत उत्तरप्रदेश बलारामपुर जिल्ला तुलसीपुर ग्राम पञ्चायत बालापुर स्थायी घर भई लमही–५ आदर्शटोलमा डेरा गरी बस्ने वर्ष २२ को गुलाम मस्ताफा छन् ।

उनीहरूलाई शनिबार राति करिब साढे नौ बजेको समयमा लमही नगरपालिका–५ मालपोत रोडमा झुण्ड भई बसिरहेको अवस्थामा फेला पारेको प्रवक्ता तिमल्सिनाद्वारा हस्ताक्षरित विज्ञप्तिमा उल्लेख छ । लागूऔषध कारोबार भइरहेको छ भन्ने गोप्य सूचनाका आधारमा प्रहरी टोली खटाएको र उनीहरूले खानतलास गर्दा धागोले बाँधी बनाएको पुडिया एक र कालो प्लाष्टिकमा बनाएको पुडिया एक गरी जम्मा दुई पुडिया लागूऔषध ब्राउनसुगर भेटिएको छ । त्यसको तौल प्लाष्टिकसहित तीन सय ८० ग्राम र प्लाष्टिक हटाई धुलो पदार्थको तौल एक सय २० ग्राम रहेको छ । उनीहरूलाई १० दिनको म्याद थप गरी अनुसन्धान भइरहेको प्रवक्ता तिमल्सिनाले जानकारी दिएका छन् । त्यसैगरी साउन १२ गते लमहीमा प्रतिबन्दित लागूऔषध सहित दुईजना पक्राउ परेका थिए ।

जसमध्य एकमहिला पनि पक्राउ परेकि थिइन।लमहीको रातोडाँडाबाट दुईजनालाई पक्राउ गरिएको वडा प्रहरी कार्यालय लमहीका प्रहरी प्रमुख प्रकाश भुषालले जानकारी दिए ।
लागूऔषधको कारोबार भईरहेको भन्ने गोप्य सूचनाको आधारमा वडा प्रहरी लमहीबाट खटिगएको टोलीले उनिहरूको साथबाट ८० मिलिग्राम लागू औषध (खैरो हिरोईन) जस्तो देखिने खैरो धुलो पदार्थ र लागूऔषध सेवनका लागि प्रयोग गर्ने औजार सहित पक्राउ गरेको हो । पक्राउ पर्नेमा राजपुर गाउँपालिका वडा नम्बर ६ घर बताउने बर्ष ३४ का कमल पुन र रोल्पाको रुन्टिगढी गाउँपालिका वडा नम्बर १ होलेरी निवासी बर्ष ३३ कि शुसिला पुन रहेको प्रहरीले जनाएको थियो । उक्त घटना भन्दा केही दिन अगाडी घोराही देखि नेपालगन्ज जादै गरेको बसका स्टाफले अर्जुन खोला स्थित बिना सुनारको नास्ता पसलमा बसेर लागुऔषध “ब्राउन सुगर” खाने क्रममा पक्राउ परेका थिए । बस रोक्न नमिल्ने ठाउँमा धेरै बेर बस रोकेर चालक र सहचालकले लागूऔषध सेवन गर्न लागेका बेला पुलिस आएर बुझ्ने क्रममा पक्राउ परेका हुन । उनीहरू मात्रै होइन प्रहरीले प्रत्येक हप्ता उक्त कारोबार संलग्नहरूलाई नियन्त्रणमा लिने घटनाले लमही लागूऔषध केन्द्र बनेको देखिन्छ ।लमही देखि कोइलाबास हुँदै भारत निर्यात गर्न सकिने भएका कारण लमहीलाई केन्द्र बनाएको हुन सक्ने प्रहरीको ठम्याइ छ ।