खोज

महिला भलिबलको इतिहासमा पहिलोपटक नेपालले भारतलाई हराएर ऐतिहासिक जीत हात पारेको छ । यसका लागि नेपाली महिला भलिवल टिम बधाईको पात्र बनेको छ । काठमाण्डौमा भएको काभा महिला भलिबल लिगमा नेपालले भारतलाई आज ३–२ को सेटमा हराएर ऐतिहासिक उपलब्धि हासिल गरेको हो । काभा महिला भलिवलसंगै काभा महिला बिच भलिबलको उपाधि समेत नेपालले हात पारेर नेपाली महिला टोलीले अर्को इतिहास रचेको छ । भुटानको थिम्पुमा भएको फाइनल खेलमा नेपालका कमला पुन र मनीषा चौधरीको जोडीले उज्वेकिस्तान ’ए’ टिमलाई २–० को सेटमा पराजित गर्दै उपाधि जितेको हो । नेपाली महिला खेलाडी पनि अव विश्वस्तरका खेलमा अगाडी आउन सक्छन र नेपालको नाम राख्न सक्छन भन्ने यो जीतले पुष्टी गरेको छ । दुबै खेलमा नेपाली महिला खेलाडीले इतिहास रचेका छन ।

यो नेपालका लागि गौरवको कुरा हो । नेपाली महिला खेलाडीले अन्तर्राष्ट्रिय खेल जगतमा नेपालको नाम राख्न सफल हुनु नेपालको लागि अत्यन्त महत्वपूर्ण कुरा हो । यो अत्यन्त खुसीको कुरा पनि हो । नेपाल सरकारले समेत नेपाली महिला खेलाडीहरूलाई बधाई दिएको छ । प्रधानमन्त्री केपी शर्मा ओलीले महिला खेलाडीलाई बधाई दिएका छन । अव बधाईले मात्र पुग्दैन, खेल जितेका महिला खेलाडीको उत्साह बढाउन उनीहरूको आत्मबल बढाउनु जरुरी छ । नेपाली खेलाडीलाई हौसला दिन युवा तथा खेलकुदमन्त्री तेजुलाल चौधरी लगायतका विशिष्ट व्यक्ति रङ्गशालामा पुगेका थिए । अव नेपाली महिला खेलाडीको उत्साह बढाउँदै खेलकै माध्यमबाट उनीहरूलाई आत्मनिर्भर बनाउन सरकारले रोजरोटीको ग्यारेन्टी गर्नुपर्दछ । अनिमात्र नेपाली महिला खेलाडीले आफ्नो सीप, कलाकौशल प्रदर्शन गर्न सक्छन । नेपालमा खेलाडीलाई कुनैपनि प्रकारको सुविधा छैन । उनीहरूले खेलकै माध्यमबाट जीवन निर्वाह गर्न चुनौति छ । तरपनि, हाम्रा खेलाडीको आत्मविश्वास भने डग्मगाएको छैन । यो जीतले नेपाली महिला खेलाडीले अवसर पाए अझै उपलब्धि हासिल गर्न सक्छन भन्ने प्रमाणित भएको छ । घरभित्रै पनि उपयुक्त तयारीको अवसरबाट वञ्चित हुनुपर्ने नेपालको लागि घर बाहिर त्यो पनि विदेशमा गएर खेल खेल्नु अत्यन्त चुनौतिको बिषय हो । विषम परिस्थिति हुँदाहुँदै पनि हाम्रा खेलाडीले राम्रो प्रदर्शन गरेका छन । जसरी नेपाली क्रिकेट आज सफलताको बिन्दुमा उक्लिएको छ, त्यसैगरी भलिबल खेलबाट पनि नेपाली महिला खेलाडीले नेपालको नाम अन्तर्राष्ट्रिय जगतसम्म स्थापित गर्न सक्छन भन्ने यो उदाहरण हो ।
नेपाली महिला भलिबल टोलीले काभा र बिच भलिबलमा हात पारेको यो हालसम्मकै सबैभन्दा ठूलो सफलता हो । सिंगो राष्ट्रले गौरव गर्नलायक यो सफलताका लागि हाम्रा खेलाडी बधाईका पात्र भएका छन् । तर, अगाडिको यात्रा अझ चुनौतीपूर्ण छ । खेलाडीको अथक परिश्रमपछि यतिबेला नेपाल जुन उचाइमा पुगेको छ, त्योभन्दा अगाडि बढ्न खेलाडीको एक्लो प्रयास मात्र पर्याप्त हुँदैन । त्यसका लागि सरकारले खेलाडीलाई प्रोत्साहन दिनैपर्दछ । त्यसका लागि ठोस सरकारी प्रतिबद्घता चाहिन्छ । अवको दिनमा खेल र खेलाडीको विकासका लागि सबै पक्षले हातेमालो गरेर बढ्नु सबैभन्दा पहिलो सर्त हो । खेलाडीले हासिल गर्ने सफलतामा गौरव गर्न सम्बद्घ निकायले त्यस्तो वातावरण बनाउन सक्नुपर्छ । सबैभन्दा पहिले यो दायित्वबोध सरकार र राष्ट्रिय खेलकुद परिषदले गर्नुपर्दछ । नेपालको खेल क्षेत्रमा सरकारको अहिलेको प्रतिबद्घता, लगानी, परिश्रम र वातावरण पर्याप्त छैन । अवको दिनमा सरकारले खेलाडीलाई पर्याप्त सुविधा उपलब्ध गराएर निरन्तररूपमा प्रशिक्षणमा व्यस्त बनाउन सक्नुपर्छ । जबसम्म सरकारले खेलाडीको सर्वाङ्गिण विकासमा ध्यान दिदैन, तबसम्म खेलाडीले मात्रै केही गर्न सक्दैनन् । तसर्थ सरकारले दिने प्रोत्साहन र बढाउने मनोबलले नै नेपालको खेल क्षेत्रको विकास संभव छ । यो कुरा बुझ्न ढिलो गर्नुहुँदैन ।