खोज

लमही, २१ साउन ।
लमही–कोइलावास सडक खण्डको बगईसोतामा निर्माण हुन लागेको २० मिटरको पुल ३ बर्षदेखी निर्माणकार्य सम्पन्न हुन सकेको छैन ।
लमही–कोइलावास जोड्ने हुलाकी सडक पक्कि सडक बन्यो । तर, त्यो सडकमा रहेका खोला तथा सोतामा पुरानै पुलबाट काम चलिरहेको थियो । पक्कि सडक बनेपछी सवारी चाप बढ्दै गयो । पुराना कल्भर्ट तथा पुलहरू साँघुरा र कमजोर हुदै गए । बगईसोतामा साँघुरो पक्की पुल थियो । हुलाकी सडक बन्यो तर सोतामा पुल बन्न सकेन । पुरानो पुल भत्किएपछी नयाँ बनाउन ठेक्का खोलियो । झण्डै तीन बर्ष अघि पुल बनाउन ठेकेदारले काम सुरु गरे । दुई÷चार जना श्रमिक परिचालन गर्ने, केही सामान झार्ने र बनाउन थाल्ने, विचमा छाडेर जाने जस्ता गतिविधि भएपछी चाहेको जसरी काम हुन सकेन । जसले गर्दा अहिले पनि पुल निर्माणाधिन छ । हुलाकी सडक आयोजना कार्यालय र निर्माण कम्पनीको लापरवाहीका कारण समयभित्र पुल नबन्दा सर्वसाधारण देखी यो सडक भएर यात्रा गर्नेहरूले निकै सास्ती खेप्नुप¥यो । ‘यो पुल समयमा नबन्दा हामीले सास्ती खेप्नुप¥यो । पानी पर्दा त यो बाटो नहिडेकै बेस’ लमहीका व्यवसायी कोलहिका जल्लु चौधरीले गुनासो गरे ।, ‘अहिले गढवा जान थालेको, पुल बनिनसक्दा खोलाको भाग भएर जानुपर्छ । मुस्किल छ ।’

बनाउनुपर्ने २० मिटरको मात्रै पुल थियो । शुरु भएको १८ महिना हुदा जमिन मुनिकै काम सकिएको थिएन । तीन बर्ष पुग्न थाल्दा ढलाईको काम सकिएर अव पुलबाट सवारी साधन सञ्चालन गर्न सक्ने अवस्थामा पुगेको छ । काममा खटिएको पेटी ठेकेदार भागेपछि पुल अलपत्र परेको थियो । मुख्य निर्माण कम्पनीले आफै काम शुरु गरेपछि भौतिक प्रगती देखिएको हो ।‘म वडा अध्यक्ष हुँदा पुल बनाउने काम सुरु भयो । विचमा ठेकेदार सम्पर्कमा नआउने, काम अधुरो छोड्ने गर्दा त्यसको असर अहिले सम्म परेको देखिन्छ’ लमही नगरपालिका–५ का निवर्तमान वडा अध्यक्ष विमबहादुर केसीले भने,‘पटक पटक दवाव दिँदा, ध्यानाकर्षण गराउँदा पनि समयमा काम सुरु हुन सकेन । बल्ल पुलबाट आउन जान मिल्नेगरी काम सम्पन्न हुदैछ ।’

भारत सरकारको लगानीमा लमही–कोइलावास हुलाकी सडक बन्यो तर यही सडकखण्ड भित्र पर्ने पक्की पुल बनाउने जिम्मा नेपाल सरकारको थियो । हुलाकी सडक बनाउने बेलामा पक्की पुल बनाउनुपर्ने थियो तर उतिबेला बनेन । पुल भत्किएपछि नयाँ बनाउने प्रक्रिया थालिएको थियो । एक बर्ष अघिनै सम्पन्न हुनुपर्ने काम अहिले पनि चलिरहेकै छ । पुल नबन्दा स्थानीय जनप्रतिनिधिहरूले समेत गुनासो सुन्नुप¥यो । ‘यो काम हाम्रो पालिकाको बजेटबाट नबनेपनी जनताले हामीलाईनै सोध्ने भयो । हामीले जवाफ दिनुपर्ने अवस्था रह्यो’ लमही–५ का वडा अध्यक्ष ओमप्रसाद सुवेदीले भने,‘आयोजना कार्यालय संग पटकपटक यही बारेमा जानकारी माग्ने, ध्यानाकर्षण गराउने काम भइरह्यो । अव आशा छ काम सम्पन्न हुने छ ।’

बगईसोतामा धेरै वर्ष त काठको पुलले काम चल्यो । पञ्चायतकालमा यहाँ काठको पुल बनाइएको थियो । धेरै वर्ष त्यही पुलले धानेको थियो । बाढीले पुल बगाइदिएपछि पक्की तर साँघुरो पुल बन्यो । त्यसले लमही–गढवा सडक खण्डमा गाडीको चाप थेग्न सकेन । लोड बोकेको टिप्पर हिंडेपछि त्यो पुल पनि भत्कियो । जसले गर्दा नयाँ पक्कि पुल बन्ने बाटो खुल्यो । शुरुमा निर्माण कम्पनीले सरिया र सिमेन्टको मूल्य बढेका कारण काममा आलटाल गरेको थियो । अहिले पनि बहानाबाजी गरेर कामबाट उम्किन खोजेको थियो । तर, आयोजना कार्यालयको पटकपटको दवावले मुख्य निर्माण कम्पनी काममा फर्किएको हो । हुलाकी सडक आयोजना कार्यालयमार्फत तीन करोडको लागतमा गाल्वा मेनका जेभीले पुल निर्माणको ठेक्का पाएको थियो तर शुरुदेखि नै काममा ढिलासुस्ती गरेका कारण पुल निर्माणमा ढिलाइ भएको हो ।