खोज

सैनामैना, १९ साउन ।

नेपाल रेडक्रस सोसाइटी सैनामैना दुधराक्ष उप–शाखाको आयोजनामा रेडक्रस वाटिकाको शिलान्यास तथा १०८ पिपलका बिरुवाहरु लगाउने कार्यक्रम शनिवार सम्पन्न भएको छ । कार्यक्रमको शुभारम्भ रुपन्देही क्षेत्र नंं.–५ का संघीय सांसद बासुदेव घिमिरेले गरेका थिए ।

त्यस अवसरमा घिमिरेले सामाजिक क्षेत्रमा निस्वार्थ सेवामा क्रियाशील संस्थाले वातावरण र पर्यावरणको महत्वलाई समाजमा स्थापित गराउनको लागि वृक्षारोपण कार्यक्रम, जस अन्तर्गत पिपलका बिरुवाहरु लगाउने कार्य गरेकोमा प्रशंसा गर्दै उदाहरणीय कार्य भएको बताए ।

नेपाल रेडक्रसले मानव जीवनको लागि अति आवश्यक रक्तदान जीवन दान कार्यक्रमको सञ्चालन गर्नुका साथसाथै थप सामाजिक उत्तरदायित्व अन्तर्गत वृक्षारोपण एवं रेडक्रस बाटिका निर्माण जस्ता कार्य समाजको लागि नमुना कार्यक्रम भएको बताए ।

कार्यक्रममा सैनामैना नगरपालिकाका उपमेयर बिना रानाले रेडक्रसको वृक्षारोपण तथा बाटिका निर्माण कार्यको प्रशंसा गर्दै विश्व शान्तिको क्षेत्र लुम्बिनीमा आउने पर्यटकहरुलाई सैनामैना नगरपालिकाको मलमला क्षेत्रमा ल्याउने योजना नगरपालिकाको रहेको र यस्ता उदारणीय कार्यले पर्यटन प्रवद्र्धनमा सहयोग पु–याउनुका साथै पिपलको धार्मिक महत्व र मानव जीवनको लागि अति आवश्यक प्राण वायू अक्सिजन उत्पादनमा पिपलले खेल्ने भूमिकाका विषयमा प्रकाश पारेकी थिइन् ।

आगामी वर्षहरुमा यी र यस्तै वाटिकाहरुका प्रवद्र्धन, संरक्षण र विकासको लागि नगरपालिकाले पर्याप्त बजेट विनियोजन गर्ने उनले बताइन् । कार्यक्रममा नेपाल रेडक्रसका प्रदेश सभापति कृष्ण पंगेनीे, जिल्ला रेडक्रस उपसभापति हिरा चन्द, शान्ति समाज नेपालका पूर्व केन्द्रीय अध्यक्ष गोविन्द खनाल, सैनामैना वडा नं.–६ का वडा सदस्य आशिष पोख्रेल लगायतले सैनामैना रेडक्रसको काम उदाहरणीय रहेको बताए ।

वृक्षारेपण कार्यक्रममा विभिन्न टोल विकास संस्थाहरु, क्लवहरु, आमा समूहहरु, स्थानीय समाजसेवीहरुको सहभागिता रहेको थियो भने इंकोरिया सामुदायिक वन सैनामैना वडा नं. ६ र ८ को प्राविधिक सहयोग रहेको थियो । कार्यक्रममा दुधराक्ष उप–शाखाका सभापति विष्णु अर्याल, उप–सभापति चन्द्रिका भट्टराई, सचिव घनश्याम पाण्डेले रेडक्रशले सञ्चालन गर्दै आएका कार्यहरुबारे प्रकाश पारेका थिए ।