खोज

धनगढी, १८ साउन ।

सुदूरपश्चिम प्रदेशका मुख्यमन्त्री दीर्घ बहादुर सोडारीले राजीनामा दिए सँगै नयाँ सरकार गठनका लागि प्रदेश प्रमुखले आह्वान गरेका छन् ।

एक सूचना जारी गर्दै प्रदेश प्रमुख नजिर मियाँले आइतबार साँझ ५ बजेसम्म नयाँ सरकार गठन गरिसक्न समय सीमा तोकेका छन् ।

प्रदेश प्रमुख मियाँले संविधानको धारा १६८ को उपधारा २ बमोजिम सरकार गठनको लागि आह्वान गरेका हुन् ।

काँग्रेस एमाले सहितका दलहरूको नयाँ सत्ता गठबन्धनमा सुदूरपश्चिम प्रदेश नेपाली काँग्रेसको भागमा परेको छ । यहाँ काँग्रेसको तर्फबाट मुख्यमन्त्री बन्नेछ । यद्यपि मुख्यमन्त्रीको टुङ्गो भने लागि सकेको छैन । पूर्व मुख्यमन्त्री समेत रहेका कमलबहादुर शाह अहिले पनि काँग्रेसको संसदीय दलका नेता छन् । उनी मुख्यमन्त्रीका प्रमुख दाबेदार हुन् ।

उनीबाहेक काँग्रेसकै बहादुर सिंह थापा, दिवान सिंह विष्ट र पार्टी सभापति शेर बहादुर देउवाका भतिज समेत रहेका प्रकाशबहादुर देउवा पनि मुख्यमन्त्रीका आकांक्षी हुन् । नेपाली काँग्रेसको विधानमा संसदीय दलको नेताले नै सरकारको नेतृत्व गर्ने व्यवस्था रहेकाले शाह नै मुख्यमन्त्री बन्ने प्रबल सम्भावना छ । यद्यपि यस पटक सुदूरपश्चिम सरकारको नेतृत्वका लागि कसले वाजी मार्छ त्यो हेर्नका लागि भने आइतबार सम्म कुर्नै पर्ने देखिन्छ ।