खोज

बुटवल, १४ साउन । पश्चिम नेपालमा सबैभन्दा पुरानो र धेरै रोटरी परियोजना गर्दै आएको रोटरी क्लब बुटवलले आफनो पुरानो परियोजनालाई स्तरोन्नतीमा जोड दिने भएको छ । रोटरी फण्डमार्फत नया परियोजनासंगै संचालन भएका परियोजनालाई प्राथमिकता दिने गरि योजना अघि बढाएको हो ।

क्लबबाट शंकरनगर वन विहार तथा अनुसन्धान केन्द्र (वन बाटिका) मा संचालन भएको रोटरी चिल्ड्रेन पार्क, रोटरी सेड, टोय ट्रेन र ई लर्निङ एण्ड साईन्स थेयटरलाई थप स्तरोन्नती गर्ने तयारीमा रहेको क्लबका अध्यक्ष प्रज्वल थान्जुले बताए । योसंगै अध्ययन केन्द्रमा विद्यार्थीहरुलाई लक्षित गरि तारामण्डल निमार्णको सम्भाब्यता अध्ययन भैरहेको उनले बताए । रोटरीले केन्द्रमा करीब ३ बिगाहा क्षेत्रफलमा पार्क सौन्दयीकरण र पूर्वाधार तयार गरेको छ ।

शनिबार बनबाटिकामा बसेको क्लबको २५२४ औ नियमित बैठक तथा अन्तरक्रियामा केन्द्रका अध्यक्ष बेल प्रसाद शर्माले विभिन्न संघसंस्थाहरुको सहयोगमा बनबाटिका रुपन्देहीकै पर्यटकिय गन्त्ब्य बन्न सफल भएको बताए । पर्यापर्यटनको विकास गर्न उद्येश्यका साथ सामुदायिक वन परिसरको भागलाई उपयोग गरि अनुसन्धान केन्द्र निमार्ण गरिएको भन्दै रोटरी बुटवलबाट पार्कको आर्कषण थप्ने गरि काम भएको बताए ।

कार्यक्रममा केन्द्रका उपाध्यक्ष खिमलाल पाण्डेले लुम्बिनी प्रदेशमा नै अध्ययन केन्द्रका रुपमा विकास भएको पार्कमा एनिमल कर्नरलाई ब्यवस्थित गर्ने र तारामण्डलको परियोजना थप्न सके थप पर्यटकहरु भित्रने बताए । यसका लागि यहाका संघसंस्थाहरुको सहयोग जरुरी रहको उनले बताए ।

कार्यक्रममा क्लबका पूर्व अध्यक्ष राजेन्द्र लम्साल, हरि पौडेलले रोटरीको मुलमन्त्र अनुसरण गर्दै शिक्षा र स्वस्थ्यको क्षेत्रमा महत्वपूर्ण योगदान दिन सफल भएको भन्दै आगामी दिनमा पनि निरन्तरता दिनुपर्ने सुझाव दिए । यसैबिच रोट्याक्ट क्लब अफ बुटवलको सहकार्यमा बनबाटिका परिसरमा वृक्षारोपण र सरसफाई गरिएको क्लबका सचिव बिरेन्द्र रानाले बताए । शंकरनगर वनबाटिका ७८ बिगाहा क्षेत्रफलमा फैलिएको छ ।