खोज

रौतहट । रौतहटको उत्तरीभेग गुजरा नगरपालिकाकी एक दलित बालिका माथी सामूहिक बलात्कार घटनाको विषय २२ दिनपछि बाहिरिएको छ । लामो रस्साकस्सी पछि प्रहरीकोमा मुद्दा दर्ता भएसंगै घटना बाहिरिएको हो । घटनाको ३ हप्तासम्म केही स्थानिय जनप्रतिनिधिले लेनदेनको भरमा मुद्दा मिलाउने चलखेल भएको खुलेको छ । गुजारा नगरपालिकाकी उपमेयर रत्ना लामाको पहल र जिल्ला प्रहरी प्रमुख एसपी दिलीप घिमिरेको निर्देशनमा आरोपीहरु बिरुद्ध ईलाका प्रहरी कार्यालय गरुडामा गत ७ गते मुद्दा दर्ता भएको हो ।

आरोपीहरु गुजरा ४ कनकपुर गाउँका शेख जफीरको छोरा बर्ष २० को शेख ईञ्जमाम, शेख बाकलको छोरा बर्ष २१ को शेख मुस्ताक, र रामचन्द्र दास तत्माको छोरा बर्ष २५ को दीपेन्द्र कुमार दास बिरुद्द जबरजस्ती करणी लगायतको मुद्दा दर्ता भएको जिल्ला प्रहरी प्रवक्ता डिएसपी एलिजा गिरीले बताएकी छिन् । पीडित बालिकाको स्वास्थ्य परीक्षण समेत भएर आवश्यक कार्यवाही प्रक्रिया अगाडी बढाईनुका साथै घटना बारे थप अनुसन्धान भइरहेको प्रवक्ता गिरीले जानकारी दिएकी छिन् ।

घटना बिवरण अनुसार आरोपी मध्ये एकजनाले बालिकालाई बिभिन्न प्रलोभन दिई ललाईफकाई गत असार १५ गते दिउँसो कटहरिया २ कनकपुर जमुनिया गाउँ बीचको चौरमा लागेका थिए । जहा पहिलै देखि लुकेर वसेका अन्य दुई आरोपी सहित तीनैजनाले बलपूर्वक दलित बालिकालाई पालै पालो बलात्कार गरी मोबाईल फोनबाट भिडियो समेत बनाएका थिए ।

घटनाको बारेमा पीडित बालिकाले आफ्नो परिवारमा जानकारी गराए पछि स्थानिय निकायका केही जनप्रतिनिधि र केही राजनीतिक दलका नेताहरुले उसको परिवारमाथि दिएको दवाबको कारण घटना बाहिर आउन सकेन ।

भित्रभित्रै लेनदेनको भरमा सामूहिक बलात्कार जस्तो जघन्य अपराधलाई मिलाउने चलखेल सुरु भएको थियो । पीडित परिवारमाथि दिएको बिभिन्न धाक धम्कीको कारण उनीहरू प्रहरी सामु पनि जानसकेका थिएनन् ।

घटनाको २० दिन पछि गुजरा नगरपालिकाकी उपमेयर रत्ना लामा घटना बारे जानकारी पाएर पीडितको घरमा पुगेर उनीहरू लाई हौसला दिंदै घटना बारे एसपी घिमिरेलाई जानकारी गराएकी थिइन् । लगत्तै एसपी घिमिरेको निर्देशनमा पीडित परिवारले पीडक बिरुद्ध ईलाका प्रहरी कार्यालय गरुडामा लिखित जाहेरी दरखास्त दिएको थियो ।

जाहेरी संगै एसपी दिलीप घिमिरे, ईलाका प्रहरी कार्यालय गरुडाका प्रमुख डिएसपी रामेश्वर त्वाती, ईलाका प्रहरी कार्यालय बिजयपुरका प्रमुख इन्स्पेक्टर ईन्द्र मणि अधिकारी आफै फिल्डमा खटेर कानुनी कारवाही प्रक्रिया अगाडी बढाएको गुजराकी उपमेयर लामाले जानकारी दिएकी छिन् ।

एसपी घिमिरेले यस्तो जघन्य अपराधलाई लेनदेनको भरमा टुंगो लगाउने कार्य आफैमा अपराध भएको बताएका छन् । उनले यस्तो कार्य गर्ने जोसुकै भएपनि कडा भन्दा कडा कार्वाही हुनुपर्ने बताएका छन । आरोपी तीनैजना हाल फरार रहेकाले उनीहरूको खोजी तथा घटना बारे थप अनुसन्धान भइरहेको जिल्ला प्रहरी कार्यालय रौतहटले जनाएको छ । रौतहट प्रहरी प्रमुखको रूपमा एसपी दिलीप घिमिरे आएदेखि तुलनात्मक रूपमा आपराधिक क्रियाकलापमा कमी आएको स्थानीयहरूले बताएका छन ।