खोज

लमही, १२ साउन ।

दाङको राप्ती गाउँपालिकाले एक विद्यार्थी एक बिरुवा उपहार कार्यक्रम अन्तर्गत विभिन्न विद्यालयका विद्यार्थीहरूलाई फलफूलका बिरुवा वितरण गरेको छ । पालिकाले विद्यार्थीहरूमा वातावरणीय चेतना जागृत गराउनुका साथै पालिकालाई फलफूलमा आत्मनिर्भर बनाउने योजनाअनुसार तीनवटा सामुदायिक विद्यालयका विद्यार्थीहरूलाई उक्त बिरुवा वितरण गरेको हो । वडा नं.४ मा रहेको माध्यमिक विद्यालय मौरीघाट,६ मा रहेको ज्ञानोदय माध्यिमिक विद्यालय पत्थरगढवा र ८ मा रहेको शंकर माध्यमिक विद्यालय पिपरीका कक्षा ८ देखि १० सम्मका ९ सय १५ जना विद्यार्थीहरूलाई आँप र अम्बाका कलमी बिरुवा वितरण गरेको गाउँपालिकाका वन तथा वातावरण शाखाका फोकल पर्सन सुवास भट्टराईले जानकारी दिए । गाउँपालिकाका अध्यक्ष प्रकाश विष्ट, उपाध्यक्ष कमलापती चौधरी, प्रमुख प्रशासकीय अधिकृत नेब बहादुर ओली र शिक्षा शाखा प्रमुख विश्वाक लगायतले विद्यार्थीहरूलाई संयुक्त रूपमा बिरुवा वितरण गरेका हुन ।

बिरुवा वितरण कार्यक्रममा बोल्दै गाउँपालिकाका अध्यक्ष प्रकाश विष्टले विद्यार्थीहरूमा वातावरणीय सचेतना जागृत गराउनुका साथै पालिकालाई फलफूलमा आत्मनिर्भर बनाउने आयआर्जन वृद्धि गर्ने उद्देश्यले विद्यार्थीहरूलाई बिरुवा वितरण गरेको बताए । “बिरुवा वितरण गर्नुको उदेश्य विद्यार्थीमा कृषि प्रति रुचि जगाउने र उत्पादन सँग जोडने पनि हो ।“, अध्यक्ष विष्टले भने,–‘यो अभियानले विद्यार्थीहरूमा अध्ययन सँगसँगै श्रम गर्ने बानीको समेत विकास हुन्छ ।’ त्यस्तै अध्यक्ष विष्टले बिरुवा वितरणले विद्यार्थीहरूको आर्थिक आयआर्जनमा समेत सहयोग पुग्ने बताए । आगामी दिनमा अन्य विद्यालयहरूमा पनि यस किसिमको कार्यक्रम सञ्चालन गरिने उनको भनाइ छ । फलफूल वितरण कार्यक्रम वडाका जनप्रतिनिधि, कृषि प्राविधिक लगायत शिक्षकहरूको सहभागीता रहेको थियो ।यसैबीच गाउँपालिकाले पालिका अन्तर्गत रहेका सामुदायिक वन तथा पर्यटकीय स्थलहरूलाई हरियाली एवम् सौन्दर्यकरण गर्नका लागि ५ हजार बढी विभिन्न जातका फलफूलका बिरुवाहरू वितरण गरेको छ । पालिकाले उनीहरूलाई आँप, अम्बा, अमला, सित्तलचिनी,बेल लगायतका २ हजार ५ सय र अन्य विभिन्न जातका ३ हजार फूलका बिरुवा गरि ५ हजार ५ सय बिरुवा वितरण गरेको छ ।