खोज

बुटवल, ११ साउन । २५ वर्ष अघि बुटवलमा स्वास्थ्य सेवा शुभारम्भ गरेको आम्दा सिद्धार्थ बाल तथा महिला अस्पताललाई स्तरवृद्धि गर्नुपर्ने एक कार्यक्रममा जोड दिईएको छ । आम्दा सिद्धार्थ बाल तथा महिला अस्पताल बिस्तार गरि शिक्षण अस्पतालको रुपमा छिटोभन्दा छिटो विकास गर्न जरुरी रहेको उनिहरुले सुझाव दिए । रोटरी क्लब अफ बुटवल डाउनटाउनको ९८९ औ नियमित बैठक तथा अन्तरक्रिया कार्यक्रममा अस्पतालका मेसु डा बिनोद पराजुलीले काठमाण्डौ बाहिर बाल तथा महिला मृत्यु दर घटाउन योगदान दिने गरि शुरु भएको अस्पतालको स्तरवृद्धि गर्न बुटवलबासीको सहयोग जरुरी रहेको बताए । ‘अस्पताललाई चिकित्सा अध्ययन केन्द्रका रुपमा विकास गर्न जरुरी छ ।’—उनले भने । हाल एक सय बेडमा संचालनमा रहेको अस्पतालको क्षमता विकास पहिलो प्राथमिकता भएको उनले बताए । अस्पतालले वार्षिक ५० हजार बिरामीको सेवा दिदै आएको छ । अस्पताललाई २ सय बेडमा बिस्तार गरि मेडिकल कलेजका रुपमा संचालन गर्ने गरि डिपिआरको काम अघि बढेको उनले बताए ।

काठमाण्डौ बाहिर बाल तथा महिला मृत्यु दर घटाउन योगदान दिने गरि पहिलो अस्पतालको रुपमा आम्दा नेपाल अन्तरगत सिद्धार्थ बाल तथा महिला अस्पताल, बुटवल उपमहानगरपालिका, बुटवल उद्योग वाणिज्य संघको त्रिपक्षिय सम्झौतामा बिसं २०५५ साल कार्तिक १६ गते शुरु भएको थियो । नेपालमा विभिन्न समयमा केहि रोगको संक्रमण देखिने गरेको भन्दै यसबारे समयमा नै सचेत हुन जरुरी रहेको उनले बताए । ‘रोग लाग्नदिनुभन्दा रोकथाम जरुरी छ ।’–उनले भने । पछिल्लोसमय डेगुको संक्रमण बढ्दो भएको भन्दै सामान्य मानिने कतिपय रोगको परिणाम घातक देखिने उनले बताए । घरघरबाट रोगका बारेमा सचेत जगाउनुपर्ने बताए ।

कार्यक्रममा क्लबका अध्यक्ष शिव ज्ञवालीले रोटरीको सात मुख्य सेवा क्षेत्रमध्ये एक स्वस्थ्य भएका हुदा पनि रोटरी फण्डमार्फत स्वास्थ्य क्षेत्रको विकासमा महत्वपूर्ण योगदान हुदै आएको बताए । विशिष्टकृत सेवा दिने अस्पताललाई आवश्यक प्रविधिका साथै अस्पताल परिसरमा रोटरी चिल्ड्रेन पार्क, रोटरी पार्क निमार्ण गरिएको उनले बताए । स्वस्थ्य क्षेत्रमा आम नागरिकमा सहज र सर्वसुलभ पहुचमा पुग्ने गरि सेवा दिनुपर्ने उनले बताए ।

कार्यक्रममा यसैगरि हिलपार्क परिषदको अधिवेसनबाट अध्यक्ष पदमा संस्थाका पुर्वअध्यक्ष टंक पराजुली, कोषाध्यक्षमा राजेन्द्र ढकाल निर्वाचित हुनुभएकोमा बधाई तथा सम्मान गरिएको थियो । क्लब फाईभ स्ट्याण्ड कमिटिलाई कर्ड तालिम सम्पन्न गरेको छ ।

कार्यक्रममा निवर्तमान अध्यक्ष कमला हमालले रोटरीबाट पिछडिएको समुदायलाई उकास्ने गरि विविध कार्यक्रमहरु वार्षिक रुपमा हुदै आएको भन्दै सचेतनालाई विशेष जोड दिनुपर्ने बताईन । कार्यक्रममा सचिव कमल नेपालले क्लबबाट निमार्ण भएको पार्क ब्यवस्थापन र संरक्षणलाई जोड दिनुपर्ने बताए ।