खोज

बुटवल, १० साउन । नेपालका जातजातीहरुले मनाउने संस्कार, संस्कृति नै देशको पहिचान भएको भन्दै यसलाई जोगाउने गरि लाग्नुपर्ने एक कार्यक्रममा बोल्ने बक्ताहरुले जोड दिएका छन । नेवा देय् दबु तिलोत्तमा नगर समितिको दोस्रो वार्षिकोत्सव तथा प्रथम साधारण सभामा बोल्ने बक्ताहरुले विकासको सुचक केवल भौतिक विकासमात्र नभई संस्कार, संस्कृति पनि भएको भन्दै यो जोगाउने गरि अभियान थाल्नुपर्ने सुझाव दिए ।

कार्यक्रममा समितिका सदस्यबाट धिमे बाजा बजाएर तथा तिलोत्तमा नगरपालिकाका नगरप्रमुख रामकृष्ण खाडले दीप प्रज्वलन गरि उद्घाटन गरे । नगरप्रमुख खाडले स्थानिय सरकार सबै जातजाती र समुदायको विकासमा सहयोग गर्दै आएको दाबी गर्दै नगरभित्रका संस्थालाई सुचिकृत गरि प्रक्रियागत रुपमा बजेट बिनियोजन गरिदै आएको बताए । भाषा, संस्कृति जगेर्ना गर्ने गरि तालिमहरु चलाउन, अन्तरक्रिया लगायत कार्यक्रम गरिदै आएको उनले बताए । लोपन्मुख नेवारी भाषा र संस्कृति संरक्षणसंगै पर्यटनको महत्वपुर्ण बन्न सक्ने सम्भावना रहेको उनले बताए ।

कार्यक्रममा नेपाल आदीबासी जनजाती महासंघ, तिलोत्तमा नगरका वरिष्ठ उपाध्यक्ष प्रेम कनौजियाले आदीबासी जनजाती कला, संस्कार, संस्कृति जोगाउन अभियान चलाउदै आएको भन्दै यसमा स्थानिय सरकारबाट सहयोग भएको बताए। वार्षिक २० लाख रुपैया बजेट बिनियोजन हुदै आएकोमा पछिल्लोसमय बजेट न्युन रहेको उनले बताए । आदीबासीहरुको क्षमता विकाससंगै संस्कृति संरक्षणमा लाग्नुपर्न सुझाव दिए ।

कार्यक्रममा समितिका अध्यक्ष बिष्णु बहादुर श्रेष्ठले आर्थिक रुपमा सबल हुने गरि संस्थागत विकासमा आफुहरु लागेको बताए । कला, संस्कार, भेषभुषा, संस्कृतिमा धनि जाति नेवारहरु हरेक क्षेत्रमा पहुच र प्रतिनिधित्वको आवाज उठाउने गरि संस्था गठन भएको बताए ।

कार्यक्रममा नेवा देय् दबु लुम्बिनी प्रदेशका वरिष्ठ उपाध्यक्ष बाबुराम श्रेष्ठले नेपाल राज्यको ईतिहासलाई केलाउदा नेवार समुदायको योगदान वर्णन पाउने भन्दै यो योगदानको सहि मुल्याकन नभएको दुखेसो गरे। नेवारी भाषाको रन्जना लिपि नै अन्तराष्ट्रिय पहिचान बनाएको भन्दै हरेक क्षेत्रमा नेवार समुदाय पछि परेको बेला एकतावद्घ भई लाग्नुपर्ने सुझाव दिए ।

यसैगरि कार्यक्रममा नेवा देय् दबु केन्द्रिय सदस्य लोकहरि श्रेष्ठ, चिरञ्जीवी श्रेष्ठ, जिल्ला अध्यक्ष रुद्रप्रसाद श्रेष्ठ समितिका वरिष्ठ उपाध्यक्ष कृष्ण बहादुर श्रेष्ठ, सचिव दिपेश कुमार अमात्यले विधि, नियम र कानुनमा रहेर संस्थागत रुपमा अघि बढ्नुपर्ने बताए । हाल रुपन्देहीमा नेवारी समुदायका २८ वटा खलगुठीहरु गठन छन भने तिलोत्तमा नगर समितिमा ६० घरधुरीहरु आवद्ध छन ।