खोज

सुर्खेत, १० साउन ।

कर्णाली सरकारमा सहभागी माओवादीका चारजना मन्त्रीहरुले सोमबार राजीनामा दिएपछि उक्त मन्त्रालयहरु मन्त्रीविहीन छन् । हाल मुख्यमन्त्री यमलाल कँडेलले मुख्यमन्त्री तथा मन्त्रीपरिषद्को कार्यालय सहित ६ वटै मन्त्रालयको नेतृत्व सम्हालेका छन् ।

मुख्यमन्त्री कँडेलले यसअघिदेखि नै कानुन मन्त्रालय आफैसँग राखेका थिए । त्यसबाहेक शेरबहादुर बुढाले भौतिक पूर्वाधार तथा सहरी विकास मन्त्रालय र विनोदकुमार शाहले भूमि, व्यवस्था, कृषि तथा सहकारी मन्त्रालय सम्हालेका छन् । उनीहरू दुवै जना एमालेका हुन् । यस्तै एमालेकै गमता विक भौतिक राज्यमन्त्री सम्हालेकी छन् ।

कँडेलले मुख्यमन्त्री तथा मन्त्रिपरिषद्को कार्यालयसँगै आन्तरिक मामिला तथा कानुन मन्त्रालय, आर्थिक मामिला तथा योजना मन्त्रालय, उद्योग, पर्यटन, वन तथा वातावरण मन्त्रालय, जलस्रोत तथा ऊर्जा विकास मन्त्रालय र सामाजिक विकास मन्त्रालय सम्हालेका छन् । कानुन मन्त्रालय बाहेकका मन्त्रालयहरूमा माओवादीका मन्त्रीहरू थिए ।

माओवादीबाट सरकारमा सहभागी मन्त्रीले राजीनामा र सरकारलाई दिएको समर्थन फिर्ता लिएपनि नेपाली कांग्रेस सरकारमा कहिले सहभागी हुने भन्ने विषयमा दुई दलबिच छलफल हुन सकेको छैन ।

काँग्रेसभित्रको आन्तरिक सहमति जुट्न नसकेका कारण सरकार पुनर्गठनमा ढिलाई भएको एमाले संसदीय दलका प्रमुख सचेतक टेकराज पछाई बताउँछन् । ‘हासम्म सरकार गठनका विषयमा दुई दलबीच छलफल भएको छैन’, उनले भने, ‘काँग्रेसभित्र सहमति भइसकेमा मन्त्रालयको भागवण्डाको विषयमा कसरी अगाडि बढ्ने भन्ने विषयमा दुई दलबीच छलफल हुन्छ ।’ सहमतिको लागि काँग्रेसका सांसदहरु काठमाडौमा रहेको उनले जनाए । त्यसैगरी हाल मुख्यमन्त्री कँडेलले आफैसँग राखेको आन्तरिक मामिला तथा कानुन मन्त्रालयको विषयमा पनि छलफल हुने उनले बताए । ‘सम्भवत ः माओवादीले सम्हालेका मन्त्रालय काँग्रेसले लिने हुन सक्छ’, उनले भने, ‘छलफलका क्रममा त्यो भन्दा फरक भएर जानुपर्छ भन्ने आएमा सबै मन्त्रालयको हेरफेर हुनपनि सक्छ ।’

यता काँग्रेसका सचेतक हिक्मत विष्टले पार्टीभित्र सहमतिका लागि आफुहरु काठमाडौंमा रहेको बताए । ‘हिजो पार्टी सभापतिसँग भेटघाट भयो कर्णालीको विषयमा सबै जानकारी गराएका छौ’ विष्टले भने, ‘आज पार्टीका उपसभापति र हाम्रा दलका नेताहरु बसेपछि यो विषयमा टुंगो लाग्छ ।’ आज बेलुकासम्म मन्त्रालय र मन्त्री को बन्ने भन्ने विषयमा टुंगो लाग्न सक्ने उनले बताए ।‘ यसअघि माओवादीले नै सम्हालेको मन्त्रालयको नेतृत्व गर्ने की अन्यमा नेतृत्व गर्ने भन्ने छलफल भएको छैन’ उनले भने, ‘यस विषयमा पनि आज छलफल भएर टुंगो लाग्न सक्छ ।’ हाल कर्णाली प्रदेशसभामा काँग्रेसका १४ जना सांसद छन् ।