खोज

बुटवल, ८ साउन । नेपाल मगर संघ बुटवल उपमहानगर समितिले बुटवल–७ दीपनगर स्थित बाजेबजै थान परिसरमा वृक्षारोपण गरेको छ । हरियाली बढाउदै पर्यावरण जोगाउने उदेश्यका साथ नेपाल मगर संघ बुटवल उपमहानगर समितिले बाजेबजै थानमा मंगलबार अशोका, गुलमोहर, टीक, धुपी, तेजपत्ता, अमला, वेगनवेली लगायत प्रजातिका करिब ५ सय विरुवा लगाइएको हो ।

स्थानिय समाजसेवी ९६ वर्षीय वयोवृद्ध देउकली सारुमगरको सौजन्यमा धुपीका विरुवा रोपेर वृक्षारोपणको शुभारम्भ भएको संघका बुटवल उपमहानगर अध्यक्ष बसन्ती साठिघरे मगरले बताए । वृक्षारोपण कार्यक्रमका प्रमूख अतिथि नेपाल मगर संघ जिल्ला समन्वय समिति रुपन्देहीका उपाध्यक्ष एवं संघका बुटवल उपमहानगर निवर्तमान अध्यक्ष थर्क बहादुर बारघरे मगर, सल्लाहकारहरु इन्जिनियर गमप्रसाद रेश्मी मगर, गोपाल चौहान मगर, प्रेम गलामी मगर, संघका नगर उपाध्यक्ष लुम बहादुर सारु, सचिव हेमन्त बुढाथोकीमगर लगायत पदाधिकारी तथा नेपाल मगर संघ बुटवल उपमहानगर १९ वटै वडाका अध्यक्ष एवं सदस्यहरुको सहभागीमा वृक्षारोपण गरिएको अध्यक्ष बसन्ती साठिघरे मगरले बताए ।

कार्यक्रममा संघका रुपन्देही जिल्ला अध्यक्ष थर्क बहादुर बारघरे मगरले पछिल्ला समय जलवायु परिवर्तनको व्यापक असर देखिन थालेकोले यसको असर न्युनिकरणका लागि एक मात्र उपाय वृक्षारोपण भएको दाबी गरे । विरुवा रोप्ने मात्र नभई संरक्षणमा समेत जोड दिन उनले सुझाव दिए । मगर समुदायको धार्मिक र सांस्कृतिक विश्वास र आस्थाको केन्द्रको रुपमा सदियौंदेखि बाजेबजै थानमा पुजाआजा गरिदै आएको छ ।