खोज

बुटवल,८ साउन ।
हिन्दु धर्मावलम्बीहरूको पवित्र महिना साउन शुरु भएको छ । योसँगै देशभर रहेका शिव मन्दिरहरूमा बोलबम मेलाको रौनक छाएको छ । शिवको प्रिय महिनाका रूपमा साउन महिनालाई लिने गरिन्छ । श्रावणको एक महिनाभरि भक्तालुहरू पवित्र भई शुद्धरहि एकचित्त भएर व्रत बस्ने, गेरुबस्त्र धारण गर्ने गर्दछन । प्रत्येक सोमबार श्रद्धालु भक्तजन आफ्नो नजिकको पवित्र नदीबाट कावरमा जल लिएर शिव मन्दिरमा जलापर्ण गर्ने गर्दछन ।

रूपन्देहीका शिव मन्दिरमा श्रावणी मेला शुभारम्भ भएको छ । पश्चिमको पशुपतिको नामबाट परिचित श्री पर्रोहा परमेश्वर ज्योतिलिङ्ग बोलबम धामसहित नरैनापुर शिव मन्दिर, कालिकानगरस्थित बाङ्गेकुसुम शिवालय मन्दिर, श्री स्वामीनारायण मुक्तिनाथ धाम, निलकण्ठ बाबा धाम, पाल्पा र रूपन्देहीको श्री शिद्धबाबा मन्दिरहरू, श्रृगेश्वर धाम तिलोत्तमा, सैनामैना कलौनीमा रहेको कालमोचन शिवालय मन्दिर, सालझण्डीको शिद्धबाबा मन्दिर, देवदहको लोकेश्वर शिव पञ्चायतन मन्दिर, देवदह–७ पिपलडाडामा रहेको शिवालय गौरीशंकर मन्दिर र प्रगतिबजारमा अवस्थित पुरानो मन्दिर, तारकनाथ मन्दिरमा भक्तजनहरू बिहानैबाट जलापर्ण र दर्शनका लागि भिड लागेको छ ।
रूपन्देहीमा ऐतिहासिक र पशुपतिनाथ पछिको दोस्रो स्वयंमउत्पत्तिमान श्री परोर्हा परमेश्वर ज्योर्तिलिङ्ग बोलबम धाममा सबैभन्दा बढि भक्तजनहरूको भिड लाग्ने गर्दछ ।

यसैबीच श्री स्वामीनारायण मुक्तिनाथ धाममा श्रावण महिनाभरि सवा करोड बेलपत्र अर्पण तथा महायज्ञ कार्यक्रम शुभारम्भ भएको छ । कार्यक्रमको शुभारम्भ गर्दै बुटवल उपमहानगरपालिकाका नगरप्रमुख खेलराज पाण्डेयले नगरपालिकाबाट धार्मिक र पर्यटकिय स्थलको विकासका योजना अघि बढाएको दाबी गरे । मुक्तिनाथ धामको परिकल्पना गरि यो क्षेत्रको महत्वपुर्ण स्थलका रूपमा संरक्षक पीठाधीस ब्रहामानिष्ठ सन्त स्वामी श्री लोकानन्द स्वामीबाट भएको भन्दै नगरभित्र रहेका पर्यटकिय स्थललाई जोड्न जरुरी रहेको उनले बताए । भारत र नेपाल बिचमा सास्कृतिक सम्बन्ध रहेको भन्दै भारतबाट वर्षेनी मुक्तिनाथ दर्शनका लागि आउने पर्यटकलाई सहज हुने गरि नाकाका रूपमा बुटवल र यसवरपरका पालिकहरू लागेको उनले बताए । तिलोत्तमा नदीमा सन्ध्या आरती समेतको ब्यवस्था गरिने उनले बताए ।
धामका संरक्षक पीठाधीस ब्रहामानिष्ठ सन्त स्वामी श्री लोकानन्द स्वामीले मानिसहरूमा आफनो संस्कार, संस्कृति भुल्दै गएको दुखेसो गर्दै समाजप्रतिको उत्तरदायित्व बुझाउन जरुरी रहेको बताए ।

यता पश्चिमको पशुपतिको नामबाट परिचित श्री पर्रोहा परमेश्वर ज्योतिलिङ्ग बोलबम धाममा यो वर्ष पनि जलापर्ण यात्रा शुरु भएको छ । कपिलबस्तुको वाणगंगा नदीबाट जल कावरमा ल्याएर जलापर्ण गरिएको हो । प्रत्येक हप्ता देशभित्रका पवित्र नदीबाट यात्रा गरी जलापर्ण हुने छ ।