खोज

सुर्खेत, ८ साउन ।

कर्णालीमा मनसुन सुरु भएयता नौ जनाको ज्यान गएको छ । जेठको अन्तिम सातायता मनसुनजन्य विपद्मा परी नौ जनाको ज्यान गएको आन्तरिक मामिला तथा कानुन मन्त्रालयका विपद् शाखाका प्रमुख कृष्णबहादुर रोकायले जानकारी दिए । शाखाको तथ्यांक अनुसार विपद्मा परी पछिल्लो दुई महिनामा अवधिमा ३५ जना घाइते भएका छन् भने ८० बढी सार्वजनिक तथा निजी घरहरुमा क्षति पुगेको छ । मनसुनजन्य विपद्का घटनामा परी १४ करोड बराबरको धन क्षति भएको रोकायले जनाए ।

कर्णाली प्रदेशमा पछिल्ला केही वर्षयता मनसुनजन्य विपद्का घटना बढ्दो छ । त्यसमध्ये पनि प्रदेशका जिल्लाहरु पहिरोको जोखिममा रहेको रहेको देखिन्छ । पछिल्लो समय पहिरोबाट हुने विपद् थप चुनौतीपूर्ण बन्दै गएको रोकायले बताए । भौगोलिक रुपमा विकट रहेकाले विपद्पछि खोजी र उद्धारमा पनि थप समस्या हुने गरेको उनले बताए ।

प्रदेश प्रहरी कार्यालय सुर्खेतको तथ्यांक हेर्दा पछिल्लो चार आर्थिक वर्षमा विपद्का घटनाबाट चार सय १९ जनाले ज्यान गुमाएका छन् । यो अवधिमा चार हजार पाँच सय ७९ विपद्का घटना भएका थिए । प्रहरीको तथ्यांक अनुसार आर्थिक वर्ष २०७७÷०७८ मा चार सय १६ विपद्का घटना भएकोमा ८५ जनाको मृत्यु भएको थियो । आर्थिक वर्ष २०७८÷०७९ मा एक हजार दुई सय १६ विपद्का घटना भए । उक्त वर्षमा ६८ जनाले ज्यान गुमाए । यसैगरी आर्थिक वर्ष २०७९÷०८० मा दुई हजार दुई सय १४ विपद्का घटना भएका थिए । जसमा ७२ जनाको मृत्यु भएको थियो । आर्थिक वर्ष २०८०÷०८१ मा सात सय ३३ विपद्का घटना भएकोमा एक सय ९४ जनाको मृत्यु भएको प्रहरीको तथ्यांक रहेको छ ।

मनसुन सक्रिय भएसँगै कर्णाली सरकारले विपद्को पूर्वतयारी योजना बनाएको थियो । विपद् व्यवस्थापनका लागि प्रदेशका १० वटै जिल्लामा विभिन्न समिति निर्माण भई तयारी अवस्थामा राखिएको छ ।

कर्णाली प्रदेश विपद् व्यवस्थापन कार्यकारी समितिले ‘मनसुन पूर्वतयारी तथा प्रतिकार्य कार्ययोजना–०८१’ तयार गरी पारित गरेको छ । त्यसैगरी एक साताअघि प्रदेशका मुख्यमन्त्री यमलाल कँडेलले सम्पूर्ण सुरक्षा निकायहरुलाई तल्लो युनिटसम्म सक्रिय अवस्थामा रहन निर्देशन दिएका थिए । प्रदेशमा रहेका सम्पूर्ण सुरक्षा निकायका प्रमुखहरुको बैठकमा मुख्यमन्त्री कँडेलले यस्तो निर्देशन दिएका हुन् ।