खोज

कपिलवस्तु, ८ साउन
युवराज सिद्धार्थ गौतमले ज्ञानप्राप्तीका लागि राजसी सुखः छोडेर दरबार छोडेको स्मरणमा कपिलवस्तुको तिलौराकोट दरबारमा आईतबार मध्यरातमा महाभिनिष्क्रमण दिवस मनाइएको छ । बुद्ध सर्किट्स डट कम नेपाल, गच्छामि मिडिया गु्रप र कपिलवस्तु पर्यटनद्वारा संयुक्त रूपमा आयोजित कार्यक्रममा २ हजार ६ सय १९ वर्ष अघिको घटना स्मरण गर्दै राति १२ बजे राजकुमार सिद्धार्थले दरबार छोडेको घटना चित्र प्रस्तुत गरिएको थियो ।

राजसी सुखसयल छोडेर दरबार त्यागेको घटनासँग मेल खाने गरी सिद्धार्थले गरेको कठोर निर्णय महाभिनिष्क्रमण दिवशमा घटना चित्रण मार्फत देखाईएको थियो । तौलिहवा बजारका शाक्य कुलका युवा सिद्धार्थ शाक्य राजकुमार सिद्धार्थ बनेर घोडामा चढेर राजप्रासादको पूर्वी ढोकाबाट बाहिरीएका थिए । अषाढ शुक्ल पुर्णिमाको अवसरमा लुम्बिनी बिकास कोष, कपिलवस्तु नगरपालिका र कपिलवस्तु नगरपालिका वडा नम्बर ३ को सहयोगमा तिलौराकोट परिसरमा आयोजित कार्यक्रममा दिवसको कार्यक्रम हेर्न मध्यरात सम्म स्थानीयहरू बसेका थिए ।
कार्यक्रममा बोल्दै नेपालका लागि श्रीलंकाका राजदुत सुदर्शना पाथिरानाले प्राचिन कपिलवस्तु सबै बुद्धमार्गीका लागि प्रेरणाको श्रोत भएको बताए । उनले आजकै दिन सिद्धार्थ गौतमले राजसी सुखः सयल छोडेको दिन सँगै माता मायादेवीको गर्भमा सिद्धार्थ गौतम प्रवेश गरेको दिन समेत भएको स्मरण गराए । सिद्धार्थ गौतमको जिवनीको २९ बर्ष बिताएको पावनभूमिमा महाभिनिष्क्रमणको कार्यक्रममा सहभागी हुन पाएकोमा उनले हर्ष व्यक्त गरे । श्रीलंकाली उपासक उपासिकालाई यस पवित्र स्थलको बारेमा जानकारी दिन र यस क्षेत्रलाई बौद्धिष्ठ पर्यटनको क्षेत्र बनाउन आफूले सक्दो पहल गर्ने उनको प्रतिबद्धता थियो ।

उक्त अबसरमा लुम्बिनीको पर्यटन प्रबद्र्धनका लागि सन् २०२५ मा बुद्धिस्ट सर्किट डटकमको आयोजनामा लुम्बिनीमा मदर मायादेबी सुत्केरी मार्ग म्याराथन र बिआईटीएम गर्ने घोषणा गरिएको थियो । राजदुत सुदर्शनाले कार्यक्रमको ब्यानर खोलेर सो घोषणा गरें । लुम्बिनी बिकास कोषका सदभावना दुत तथा कार्यक्रमका परिकल्पनाकार बिक्रम पाडेँ काजीले सिद्धार्थले राजसी सुखः सयल छोडेर दरबार छोड्दाको अनुभुति दिलाउन बिगत ६ बर्ष देखी तिलौराकोटमा निरन्तर रूपमा महाभिनिष्क्रमण दिवस मनाउदै आएको बताए । आफूले परिकल्पना गरेको दिवश, कुदान उत्सव र माता मायादेवी सुत्केरी मार्ग पर्यटकिय प्रडक्टको रूपमा बिकास भै यस क्षेत्रको पर्यटन र अर्थतन्त्रमा टेवा पुर्याउन सहयोगी हुने उनको बिश्वास थियो । राजकुमार सिद्धार्थ गर्भ प्रवेश गरेको दिन, प्रथम धर्मदेशना गरेको दिन र मातालाई दुशितलोकमा अभिधम्म देशना गरेको दिनको रूपमा अषाढ पुर्णिमा परिचित रहेको छ ।

कपिलवस्तु जिल्लाको समग्र पर्यटन बिकासका लागि दिवशको कार्यक्रम र तिलौराकोट लक्षित योजनाले सहयोग पुग्ने जिल्ला समन्वय समिति कपिलवस्तुका प्रमुख बाबुराम आचार्यले बताए । लुम्बिनी बिकास कोषले लुम्बिनी सगै जोडिएका बुद्धस्थलको बिकासलाई प्राथमिकतामा राखेको कोषका कार्यकारिणी सदस्य रामनरेश कोहारले बताए । कोषले उत्खननको नाममा खन्ने र पुर्ने कार्य गरेको भन्दै तिलौराकोटमा भेटिएका संरचनालाई प्रर्दशन योग्न बनाउन आवश्यक रहेकोमा कपिलवस्तु नगरपालिका वडा नम्बर ३ का अध्यक्ष प्रकाश गैरेले जोड् दिए । सबैका लागि पुण्य सञ्चय, आपसी सद्भाव र भ्रातृत्व जगाउने आकर्षक कार्यक्रमका रूपमा विकास गरेर लैजानु पर्नेमा बुद्ध सर्किट डटकमका संचार संयोजक शरद प्रधानको जोड् थियो । दिवशको कार्यक्रमले यस क्षेत्रको पर्यटन बिकास गर्न टेवा पुर्याएको गच्छामी मिडिया ग्रुपका अध्यक्ष मनोज कुमार श्रीवास्तवको भनाई थियो ।