खोज

बुटवल, ७ साउन ।

लीला गिरीलाई एमालेको तर्फबाट मुख्यमन्त्री बनाउने पत्र तयार हुँदै गर्दा केन्द्रको निर्देशनमा उनको नाममा टिपेक्स लगाएर चेतनारायण आचार्यको नाम लेखिएको पाइएको छ । लीला गिरीको नाममा दावी पेश गर्न जाने गरी एमाले प्रमुख सचेतक तुलसीप्रसाद चौधरीले पत्र तयार गरिसकेका थिए । तर त्यहीबेला पार्टी महासचिव शंकर पोखरेको फोन आएपछि गिरीको नाममा टिपेक्स लगाएर चेतनारायण आचार्यको नाम लेखिएको स्रोतको दावी छ ।

एमाले लुम्बिनी प्रदेश अध्यक्ष राधाकृष्ण कंडेलले पार्टी केन्द्रको निर्देशन पालना गर्दै आचार्यलाई मुख्यमन्त्री बनाउने निर्णय गरिएको बताए ।

एकाएक यस्तो निर्देशन आएपछि गिरी आफैले पार्टी अध्यक्ष केपी शर्मा ओलीलाई फोन गरेका थिए । त्यसक्रममा ओलीले यसपाली यस्तै भयो भनेको गिरीले बताए । सोमबार बिहानसम्म लिला गिरी मुख्यमन्त्री बन्ने पक्कापक्की जस्तै थियो । तर एकाएक यस्तो निर्देशन आएपछि गिरी असन्तुष्ट भएका छन् । उनले राजनीति यस्तै हो भनी प्रतिक्रिया दिए । “यो विधि सम्मत भएन, संसदस्य मूल्य अनुरुप पनि भएन, मैले माथि भनिसकेको छु”–उनले भने ।

नेपाली कांग्रेसका प्रदेश संसदीय दलका नेता तथा पूर्वमुख्यमन्त्री डिल्लीबहादुर चौधरीले पनि दलका तर्फबाट लिला गिरीलाई मुख्यमन्त्री बनाउने भन्ने सहमति पत्र आफूले आइतबार नै दिइसकेको बताए।