खोज

बुटवल, ६ साउन । साईकलमार्फत पर्यावरण जोगाउने र पर्यटन प्रर्वद्धनको उदेश्यका साथ बुटवलमा कोरा २०२४ भब्य रुपमा सम्पन्न भएको छ । जिटिए साईकल र मणिमुकुन्द कलेजको मुख्य प्रायोजनमा बुटवल साईकल ग्रुपको आयोजना तथा बुटवल युनाईटेड साईक्लिङ क्लब, साईकल सिटि बुटवल, ह्याप्पी साईक्लिङ क्लब, तिनाउ साईक्लिङ क्लबको सहकार्यमा शनिबार बुटवल कोरा २०२४ सम्पन्न भएको हो ।

‘साईकल चलाऔ, स्वस्थ्य र पर्यावरण जोगाऔ’ भन्ने मुल नारासहित कालिकानगरस्थित मणिमुकुन्द कलेजबाट शुरु भएको साईकल रेली श्रृगेश्वर धाम, मिलनचोक, चरङे, बेसक्याम्प, योगीकुटी, शारदास्कुल, मणिग्राम, गरगरे, फर्साटिकर, नरेनापुर मन्दिर, पिसपार्क ढवाहा, जलबिनायक मन्दिर, दुर्गामन्दिर, गोलपार्क, ट्राफिक चोक, कालिकापथ हुदै योगीकुटी पुनः मणिमुकुन्द कलेज परिसरमा कार्यक्रम समापन भएको थियो ।

कलेज प्राणगढमा कार्यक्रमको शुभारम्भ गर्दै मणिमुकुन्द कलेजका क्याम्पस प्रमुख टुक बहादुर क्षेत्री, बुटवल नगर खेलकुद विकास समितिका अध्यक्ष बोनिन पियाले साहसिक खेल पर्यटनका रुपमा साईक्लिङको विकास जोड दिनुपर्ने बताए । कार्यक्रममा मणिमुकुन्द कलेजका क्याम्पस प्रमुख टुक बहादुर क्षेत्रीले विगत लामोसमयदेखी कलेजबाट भलिबल, बास्केटबल, साईकलका विभिन्न ईभेन्टमा सहकार्य गरेको भन्दै यसलाई निरन्तरता दिने प्रतिबद्धता जनाए ।

साईकल रयालीलाई चरङे, मणिग्राम, फर्साटिकर, पिसपार्क गोलपार्कमा विशेष बाजागाजा र फुलमालाका साथ स्वागत गरिएको थियो । ढवाहास्थित पिसपार्कमा ईश्वरीय ब्रहमकुमारी विश्वविद्यालय नेपालकी केन्द्रिय वरिष्ठ उपाध्यक्ष कमला दिदी र ब्रहमकुमारी विश्व विद्यालय नेपालका क्षेत्रिय सचिव नरेन्द्र पौडेलले स्वागत गर्दै समाजसेवाको उदेश्यसहित साईकल यात्रामा सहभागीलाई स्वागत गर्दै सकारात्मक सोच, मानव जीवन, आत्मा र परमात्माका विषयमा प्रकाश पारे ।

एक कार्यक्रममा बिच कार्यक्रममा सहभागी साईक्लिष्ट, सहयोगी तथा सहकार्य गर्ने क्लबहरुलाई सम्मान गरिएको थियो । बुटवल साईक्लिङ क्लबका अध्यक्ष शिव चौधरी रुपन्देहीका ३ पालिकाहरुको महत्वपूर्ण धार्मिक पर्यटकिय स्थलको परिक्रमा गरिएको बताए ।

कार्यक्रममा लुम्बिनी प्रदेश साईक्लिङ संघका अध्यक्ष स्वस्तिक श्रेष्ठले साईकल साहसिक खेलका साथै पर्यटन प्रवद्र्धनका लागि महत्वपूर्ण पाटो भएको बताए । यसअघि कोरा कार्यक्रमबाट बुटवलबाट एक जना मृगौला ट्रान्सप्लान्ट गरेकी भैरहवाका आयुषा पाण्डेलाई नगद ४६ हजार रुपैया, नेपालगंज शाखामार्फत १० हजार रुपैया सहयोग गरेको उनले स्मरण गरे ।

स्लो रेसमा मनिक र ह्विलीमा सन्जय विजयी

बुटवल कोरा २०२४ को अवसरमा शनिबार भएको दुई साइकल इभेन्टहरु सम्पन्न भएका छन । प्रतियोगितात्मक कार्यक्रममा स्लो साइकल रेसतर्फ ह्याप्पी साईक्लिङ क्लबका मनिक श्रेष्ठ विजयी भएका छन । सैनामैनाका समिर सोमाई दोस्रो तथा रानीगंजाका अन्सुल हिताङ तेस्रो भए ।

यसैगरि ह्विलीमा पोखराका संन्जय बरालले १ मिनेट ४७ सेकेण्ड रोकिदै प्रथम, निश्चल नेपाल ५२ सेकेण्डसहित दोस्रो तथा ह्याप्पी साईक्लिङ क्लबका जकोब राना ३६ सेकेण्डसहित तेस्रो भए । प्रतियोगिताको प्रथमले न्युम्युको तर्फबाट गिफट हेम्पर, दोस्रोले हेल्मेट र तेस्रोले केकेएफसीको तर्फबाट गिफट हेम्पर पाएको संयोजक किरण श्रेष्ठले बताए ।