खोज

दाङ, ५ साउन ।

जिल्ला अदालतले १८ महिना कटेको मुद्दा शुन्य बनाएको छ । दाङ जिल्ला अदालतले बितेको एक वर्षमा करीव ६६ प्रतिशत मुद्धा फछ्र्यौट गर्न सफल भएको छ । जिल्ला अदालतले गत आर्थिक वर्ष २०८०–०८१ मा सम्पादन गरेको कामको प्रगति बारे जानकारी गराउन शुक्रवार आयोजित पत्रकार सम्मेलनमा अदालतका स्रेस्तेदार दामोदर घिमिरेले एक वर्षको अवधिमा ६५ दशमलव ५८ प्रतिशत मुद्धा फछ्र्यौट भएको जानकारी दिए । अदालतका स्रेस्तेदार घिमिरेले आर्थिक वर्ष २०८०÷०८१ मा १८ महिना कटेको एउटा मुद्दा पनि बाँकी नरहने गरी काम भएको जानकारी दिए ।

यो वर्ष विगतका वर्षको तुलनामा सबैभन्दा बढी मुद्दा फछ्र्यौट भएको उनले बताए । ‘आ व २०८०÷०८१ मा ६५ दशमलव ५८ प्रतिशत मुद्दा फछ्र्यौट भएका छन् । अघिल्लो वर्षबाट जिम्मेवारी सरेर आएका २हजार सय ६७ मुद्दा थिए । यो वर्ष ५ हजार ५ सय चार मुद्धा परेकोमा ३ हजार ६ सय १० मुद्धा फछ्यौट भएका छन’ स्रेस्तेदार घिमिरेले बताए ।

उनका अनुसार, कुल ५ हजार ५ सय ४ वटा मुद्धामध्ये एक वर्षको अवधिमा ३ हजार ६ सय १० मुद्धा फछ्र्यौट भएको छ । जसमा जिल्ला अदालतका न्यायाधीश तेजनारायण पौडेलले ४ सय ४६, कृपासुर कार्कीले २ सय ९८, कुलप्रसाद पाण्डेले ४ सय ८, मनोजकुमार श्रीवास्तवले ५ सय ११, रामप्रसाद बस्यालले ३ सय ९, जगतबहादुर पौडेलले ३ सय ३, ताराकुमारी शर्माले ७ सय १८ र लोकबहादुर हमालले ६ सय १७ मुद्धा बितेको एक आर्थिक वर्षमा फछ्र्यौट गर्नुभएको हो ।

जिल्ला न्यायाधीश मनोजकुमार श्रीवास्तवका अनुसार, जिल्ला अदालतमा सम्बन्ध बिच्छेदका मुद्धा सबैभन्दा धेरै पर्ने गरेका छन् । बितेको एक आर्थिक वर्षमा १ हजार २ सय १५ मुद्धा मध्ये ९ सय ७५ मुद्धा फछ्र्यौट भएको छ । यस्तै, अंश सम्बन्धि मुद्धाको संख्या पनि उल्लेख्य रुपमा बढ्दै गएको छ । अंश सम्बन्धि ५ सय ९९ मुद्धा मध्ये ३ सय ४९ मुद्धा फछ्र्यौट भएको छ ।

विभिन्न १४ वटा शीर्षकका मुद्धा जिल्ला अदालतमा दर्ता भएकोमा अधिकांश मुद्धा अपराधजन्य घटनाभन्दा सामाजिक विषयसँग जोडिएका धेरै रहेका छन् । चेक अनादरका ६ सय ३० मुद्धा मध्ये ३ सय ६५ मुद्धा फछ्र्यौट भएको छ ।

लिखत बदरका ४ सय १९ मुद्धा मध्ये २ सय ८४, लेनदेनका ३ सय ८७ मुद्धा मध्ये २ सय ५६, जालसाज किर्तेका ३ सय ३७ मुद्धा मध्ये २ सय ५, जबरजस्ती करणीका २ सय २८ मुद्धा मध्ये १ सय ४३ फछ्र्यौट भएका छन् । यसैगरी, चोरी तथा डाँकाका १ सय ८५ मुद्धा मध्ये १ सय ३१, जग्गा सम्बन्धी विवादका १ सय २६ मुद्धा मध्ये ६९, ज्यान सम्बन्धी १ सय २४ मुद्धा मध्ये ७३, लागु औषधका १ सय ५ मुद्धा मध्ये ७५, सवारी ज्यान, अंगभंगका ९४ मुृद्धा मध्ये ६५, बहुविवाहका ६१ मुद्धा मध्ये ४३ र मानव बेचबिखनका ५ मुद्धा मध्ये ४ मुद्धा फछ्र्यौट भएको छ । बिगत वर्षहरुमा दुई वर्षभन्दा माथिका मुद्धाको फाईल अघि बढाउन चुनौति भएपनि यो पटक १८ महिना नाघेका मुद्धाको संख्या शुन्यमा झरेको छ ।

२०७७ साल साउनदेखि फरक व्यवस्थापन पद्दतिबाट इजलासको काम अघि बढाईएको हुँदा मुद्धाको प्रकृति अनुसार काम भईरहेको जिल्ला न्यायाधीश श्रीवास्तवले बताए । सरल, सामान्य र विशेष प्रकृतिका मुद्धाको तोकिएको समय अनुसार किनारा लगाउन ४ वटा इजलासमार्फत काम भईरहेको उनले बताए । जिल्ला अदालतमा वर्षेनी मुद्धाको संख्या बढ्दै गएको तथ्यांकले देखाएको छ । आर्थिक वर्ष २०७८–०७९ मा ४ हजार ७ सय ९९ मुद्धा दर्ता भएकोमा आर्थिक वर्ष २०७९–०८० मा ५ हजार १ सय ९१ मुद्धा दर्ता भएको थियो ।