खोज

बुटवल, ३ साउन ।

लुम्बिनी प्रदेशसभाका सदस्यहरुले उपचार खर्चबापत एक वर्षमा २३ लाख भन्दा बढी रकम राज्य कोषबाट खर्चिएका छन् । राज्यकोषबाट उपचार खर्च बुझ्नेमा निजी गाडी र घर हुनेहरुदेखि लिएर स्वकिय सचिव राख्नेसम्मका छन् । स्वास्थ्य उपचार खर्च लिनेमा बहालवाला र पूर्वमन्त्रीहरु पनि छन् ।

प्रदेश सभा सचिवालयका अनुसार प्रदेशसभाका सदस्यहरुले आर्थिक वर्ष २०८१÷८१ मा उपचार खर्च बापत २३ लाख ३५ हजार रकम बुझेका हुन् । यसरी उपचार खर्च बुझ्नेमा ३० जना सांसद छन् ।

उपचार खर्चबापत सबैभन्दा बढी रकम पर्यटन, उद्योग तथा सहकारी मन्त्री खड्ग बस्नेत छन् । सुविधासम्पन्न आफ्नै घरमा बस्ने र निजी गाडी चढेर हिंड्ने उनले आर्थिक वर्ष २०८०–०८१ मा प्रदेशसभाबाट उपचार खर्चबापत ४ लाख १४ हजार ८५६ रुपियाँ बुझेका छन् । उनी नेकपा माओवादीबाट विद्रोह गरी स्वतन्त्र चुनाव लडेर विजयी भएका थिए ।

त्यस्तै अर्का प्रदेशसभा सदस्य देवीप्रसाद चौधरीले पनि प्रदेशसभाबाट उपचार खर्चबापत ७७ हजार ४२३ रुपियाँ बुझेका छन् । नेपाली काँग्रेसका समानुपातिक सांसद चौधरी रुपन्देहीको मायादेवी गाउँपालिका–८ निबासी हुन् । उनले माछापालनदेखि लिएर विभिन्न क्षेत्रमा लगानी गरेका छन् भने सम्पन्न परिवारमा छन् ।

त्यस्तै अर्का प्रदेशसभा सदस्य भोजप्रसाद श्रेष्ठले पनि उपचार खर्च बापत ७७ हजार ६०० रुपियाँ बुझेका छन् । एमालेबाट प्रत्यक्ष निर्वाचित धनाढ्य मध्येमै गनिने श्रेष्ठको बुटवलमा आफ्नै घर छ ।

त्यस्तै गैरसरकारी संस्थामा क्रियाशिल रहँदै आएकी लुम्बिनी प्रदेशसभा सदस्य हेमा बेलबासेले पनि उपचार खर्च बापत ३० हजार ६८६ रुपियाँ बुझेकी छन् ।  उनले निजी गाडी पनि किनेकी छन् । बेलबासे लोकतान्त्रिक समाजवादी पार्टीबाट समानुपातिक प्रदेशसभा सदस्य बनेकी हुन् ।

कानुन बमोजिम बिल सहित उपचार खर्च माग गरेमा उपलव्ध गराउने गरिएको प्रदेश सभा सचिवालयका सूचना अधिकारी सम्झना सुवेदीले जानकारी दिइन् । ‘विभिन्न रोगको उपचार गरेको भनेर सांसदहरुले बिल ल्याउनु हुन्छ, हामीले बिलका आधारमा भुक्तानी दिने गरेका छौं”–उनले भनिन् ।

लुम्बिनीमा ८७ जना प्रदेशसभा सदस्य छन् । एकजना प्रदेशसभा सदस्यले उपचार खर्चबापत एक आर्थिक वर्षमा ५ लाख रुपैयाँसम्म लिन पाउने प्रदेश सभाको कार्यविधिमा व्यवस्था छ । आर्थिक रुपमा सक्षम सांसदले पनि लिएका छन्, आफैँ उपचार गर्न समस्या हुनेले पनि लिएका छन् ।

प्रदेशसभा सचिवालयका अनुसार यसरी उपचार खर्च लिने सांसदहरुको सांख्या ३० छ । प्रदेशसभा सदस्यहरु अब्दुल रज्जाक गद्दी ६१ हजार ६ सय, मिनाकुमारी श्रेष्ठले ६२ हजार ३९, गीता गुरुङले ८२ हजार ४८२, रेखाकुमारी शर्माले २१ हजार १७४, गिरीधारीलाल न्यौपानेले १ लाख २२ हजार ५ सय रुपियाँ उपचार खर्चवापत बुझेका छन् । धनलक्ष्मी श्रेष्ठले २ लाख ६ हजार २४०, यामबहादुर नेपालीले ६९ हजार ६ सय, सरिता पुनले ९४ हजार ६४, तुलसीप्रसाद चौधरीले ४० हजार २७६, निर्मलादेवी चौधरीले ३३ हजार ५८७, डिल्लीराज भुसालले २ लाख ६१ हजार ३२०, अम्बिका काफ्लेले ८७ हजार ३८७ रुपियाँ उपचार खर्च बुझेको प्रदेशसभा सचिवालयले जनाएको छ ।

यस्तै, शान्ति लोधले १२ हजार ४११, रामजी प्रसाद घिमिरेले १५ हजार ६५८, जमुना ढकालले १ लाख २४ हजार ८२०, माया पुनले ४३ हजार ३४१, दीपेन्द्र पुन मगरले ४४ हजार ४७, लोककुमारी विकले ७६ हजार ३४४, जानकी न्यौपाने १७ हजार १५०, इन्द्रकुमारी गहतराजले २७ हजार ५६५, राजुप्रसाद श्रेष्ठले १ लाख १८ हजार ५०५ रुपैयाँ उपचारखर्चबापत बुझेको प्रदेशसभाका वरिष्ठ लेखा अधिकृत खिमबहादुर सुवेदीले जानकारी दिए । तारा थापाले १८ हजार ३९९ र मिनाकुमारी बोहराले ३ हजार १५० रुपैयाँ उपचार खर्च बुझेका छन् ।

तलबभत्ता खाने सांसदलाई उपचार खर्च दिन नहुने भन्दै यसको आलोचना हुने गरेको छ । तर वर्सेनि आलोचना हुँदै आएपनि प्रदेश सांसदहले उपचार खर्च लिन छाडेका छैनन् ।