खोज

दाङ, ३ साउन ।

घोराही उप महानगरपालिकाले गत आर्थिक बर्ष २०८०÷०८१ मा ३४ करोड बढी राजश्व संकलन गरेको छ । एक बर्षमा ३६ करोड राजश्व संकलन गर्ने लक्ष्य राखेको उप महानगरपालिकाले ३४ करोड ६८ करोड मात्र राजश्व संकलन गरेको हो ।

व्यवसाय कर, घरबहाल कर,मालपोत तथा सम्पत्ती कर लगायत १९ वडा सहित २० वटै राजश्व काउन्टरबाट लक्ष्य भन्दा बढि १९ करोड ८३ लाख राजश्व संकलन भएपनि मालपोतबाट प्राप्त हुने घरजग्गा रजिष्टेशनबाट १६ करोड ५० लाख उठाउने लक्ष्य राखेकोमा १४ करोड ८५ मात्र प्राप्त भएकाले लक्ष्य अनुसारको राजश्व संकलन हुन नसकेको बजेट तथा राजश्व शाखा प्रमुख कृष्ण केसीले जानकारी दिए ।

राजश्व संकलनमा कार्यरत कर्मचारीहरुको क्षमता विकास तथा आर्थिक ऐनको वारेमा जानकारी दिन बिहीबार घोराही एक कार्यक्रमको आयोजना गरिएको हो । सवै भन्दा बढि नगरको राजश्व काउन्टरबाट ८ करोड ४१ लाख ६४ हजार तीन सय चार रुपैया ९१ पैसा, वडा नम्वर १५ बाट ३ करोड ४१ लाख ७८ हजार दुई सय ७८ पैसा र सवै भन्दा कम १९ नम्वर वडाबाट २ लाख १५ हजार ८७ रुपैया ३९ पैसा राजश्व संकलन भएको जानकारी दिइएको थियो ।

कार्यक्रममा राजश्व शाखा प्रमुख कृष्ण केसीले नगरपालिकाको आन्तरिक आयबृद्धिका लागि यस आर्थिक बर्षमा करको दायर तथा राजश्वको दरमा परिमार्जन गरिएको जानकारी दिनुभयो । गत आ.व.२०७४÷०७५ पछि नगरपालिकाले मालपोत,सम्पत्ती तथा व्यवसाय करमा बृद्धि नगरेको घोराहीका उपप्रमुख हुमा कुमारी डिसीले बताइन् ।

जिल्लाका अन्य पालिकाको करको दर भन्दा बढि नहुने गरी दररेटमा परिमार्जन गरिएको जानकारी दिइन् । उनले घर निर्माण गर्दा नक्सापास अनिवार्य गरिएको भएपनि कतिपयले नक्सापास विनै घर निर्माण गरिरहेकाले त्यस्ता घर अभिलेखीकरणका लागि छ गुणा बढि राजश्व लिने व्यवस्था गरिएको बताइन । कार्यक्रममा बोल्दै प्रमुख प्रशासकीय अधिकृत ऋषीराम केसीले नगरपालिकालाई आर्थिक रुपमा सशक्त बनाउन आन्तरिक श्रोत प्रमुख रहेकाले सवैलाई करको दायरामा ल्याउन कर्मचारीहरुलाई निर्देशन दिए ।

चालु आ.व.देखि सडक बक्तीको महशुल नगरपालिकाले नलिने भन्दै उनले बिद्युत प्राधिकरणको समन्वयमा सम्वन्धित टोलले सडक व्यक्तिको व्यवस्थापन गर्ने बताए । कार्यक्रममा राजश्व शाखाका अधिकृत छैटौ कुमार खड्काले राजश्व संकलनको बर्तमान अवस्था र आगामी योजनाका वारेमा जानकारी गराएका थिए । उनले मालपोत,सम्पत्ती तथा व्यवसाय कर असोज सम्म बुझाउनेलाई १० प्रतिशत छुटको व्यवस्था गरिएको र पौष मसान्त सम्म गत बर्षको मालपोत,व्यवसाय तथा सम्पत्ती करमा जरिवाना छुट दिइएको जानकारी दिए ।