खोज

गुल्मी
गुल्मीमा अपाङ्ता भएका व्यक्तिलाई घरमै पुगेर नागरिकताको प्रमाणपत्र प्रदान गरिएको छ । जण्डीसका कारण अपाङ्ता भएका धुर्कोट गाउँपालिका–१ अन्तर्गत नयाँगाउँ निवासी १७ वर्षीय अन्मुल घर्तीलाई प्रमुख जिल्ला अधिकारी कृष्णप्र्रसाद शर्माले घरमै पुगेर नेपाली नागरिकताको प्रमाणपत्र प्रदान गरेका हुन ।
जिल्लामा अशक्त र अपाङ्ता भएका व्यक्तिहरूलाई घरमै पुगेर सेवा प्रवाह गर्ने अभियान अन्तर्गत घर्तीलाई पनि घरमै पुगेर सेवा प्रदान गरिएको प्रमुख जिल्ला अधिकारी शर्माले बताए । ‘हामीले हरेक पालिकाहरूमा पुग्दा त्यहाँका जनप्रतिनिधिहरूलाई त्यस्ता प्रकारका अशक्त र अपाङ्ता भएका व्यक्ति भएमा जानकारी गराउनु होला, हामी घरमै आएर सेवा प्रवाह गर्छौ भनेका छौ,” प्रजिअ शर्माले भने ।
अपाङ्ता र अशक्त भएका व्यक्तिलाई नागरिकता लिनका लागि जिल्ला प्रशासन कार्यालयसम्म आउन समस्या हुने र आर्थिक भार समेत थपिने भएकोले उनीहरूलाई कार्यालयबाट कर्मचारीहरू घरमै पुगेर नागरिकता प्रदान गरिने ब्यवस्था मिलाईएको प्रजिअ शर्माले बताए ।
अन्मुलका बुबाले छोराको समस्याको बारेमा जिल्ला प्रशासन कार्यालयमा आएर गुनासो पोखेपछि प्रमुख जिल्ला अधिकारी शर्माले घरमै पुगेर नागरिकता दिने प्रतिबद्धता जनाए । आफूले गुनासो राखेपछि मंगलबार घरमै आएर छोरालाई बिस्तारामै नागरिकता दिँदा आफूहरू निकै खुसी बनेको अन्मुलका बुबा ध्रुब घर्तीले बताए ।
“यत्ति कामका लागि यो छोरालाई तम्घास लैजान ल्याउन कति समस्या हुन्थ्यो, अहिले घरमै आउनु भयो, नागरिकता दिनु भयो, हामीलाई त भगबान आएजस्तै भयो,” भावुक स्वरमा घर्तीले सुनाए ।
जन्मदा सबल जन्मिएका अन्मुल जन्मेको चार दिनपछि जण्डिसका कारण अपाङ्ता हुनुपरेको बताईएको छ । अपाङ्ता भएपछि अन्मुल १७ वर्षदेखि बिस्तारामै छन । उनी बोल्न र केही गर्न सक्दैनन् । उनको हेरचार र स्याहार सुसारका लागि परिवारलाई नियमित रूपमा खटिरहनु पर्ने बाध्यता छ । धुर्बका तीन सन्तानहरू मध्य उनी माईलो सन्तान हुन । बृद्ध हुनलागेका बाबुआमा यतिबेला त्यही छोरालाई हेर्दैै आफ्नो जीवन कटाई रहेका छन । जिल्ला प्रशासन कार्यालयले यस अघि पनि जिल्लाको रेसुङ्गा, मुसिकोट, ईस्मा लगायतका पालिकाहरूमा पुगेर यस्तै प्रकारको सेवा प्रदान गरेको थियो । प्रशासनले जिल्लामा विपद् प्रभावितलाई परिवारहरूलाई पनि घरमै पुगेर राहत उपलब्ध गराउने व्यवस्था मिलाएको प्रजिअ शर्माले बताए ।