खोज

सुर्खेत, २ साउन ।

केन्द्रमा समीकरण बदलिएसँगै कर्णाली सरकारमा रहेका मन्त्रीहरु राजीनामा दिने तयारीमा छन् । माओवादीबाट मन्त्री बनेका कर्णालीका चार जना मन्त्रीहरुले राजीनामा दिन तयारी गरेका हुन् ।

८ सदस्यीय मन्त्रिपरिषदमा माओवादीको तर्फबाट आर्थिक मामिला तथा योजनामन्त्री महेन्द्र केसी, उद्योग, पर्यटन, वन तथा वातावरणमा दुर्गबहादुर रावत, सामाजिक विकासमा वीरबहादुर शाही र जलस्रोत तथा ऊर्जा विकास मन्त्रीमा रणसिं परियार छन् । ऊर्जामन्त्री परियार वैशाख १२ र बाँकी मन्त्रीहरू वैशाख १८ मा नियुक्त भएका थिए ।

नेकपा माओवादीबाट बनेका मन्त्रीहरूले नयाँ गठबन्धनलाई सहजता प्रदान गर्न सरकारबाट बाहिरिने तयारीमा रहेको मन्त्रीहरुले जनाएका छन् । उनीहरु राजीनामा पत्र समेत साथमा राखेका छन् । नयाँ गठबन्धनलाई सरकार गठनमा सहजता दिनको लागि आफुहरु राजीनामा दिन तयारीमा रहेको जलस्रोत तथा उर्जा विकास मन्त्री रणसिं परियारले बताए । ‘हामीलाई मुख्यमन्त्री ज्यूले पनि केही भन्नुभएको छैन र दलको बैठक पनि बसेका छैनौ’ मन्त्री परियारले भने, ‘हामी चारजना मन्त्रीहरु आफै सत्ताबाट निस्कनुपर्छ भन्ने सल्लाह गरेका हौ ।’

यद्यपि मुख्यमन्त्री यामलाल कँडेल सङ्घीय राजधानी काठमाडौँ भएकाले मन्त्रीहरू मुख्यमन्त्रीको प्रतीक्षामा छन् । त्यसैगरी माओवादी संसदीय दलका नेता राजकुमार शर्मा पनि काठमाडौंमै रहेकाले आफुहरु प्रतिक्षामा बसिरहेको परियारले जनाए ।

केन्द्रमा समीकरण बन्ने बित्तिकै प्रदेशका पनि त्यसको असर पर्ने भएकाले नयाँ गठबन्धनलाई सहजता प्रदान गर्न आफूहरू तयार रहे पनि मुख्यमन्त्री प्रदेश बाहिर भएकाले राजीनामा हुन नसकेको उनको भनाई थियो ।

एमाले–कांग्रेस गठबन्धनको सरकार बनेपछि कर्णालीमा माओवादी पहिलो पटक प्रतिपक्षमा बस्ने भएको छ । प्रदेश सरकार बनेयता कर्णालीमा माओवादी निरन्तर सत्तामा रहदै आएको थियो । २०८० चैत्र २७ गते नेकपा माओवादी र एकीकृत समाजवादीको समर्थनमा एमाले संसदीय दलका नेता कँडेल मुख्यमन्त्री बनेका थिए ।