खोज

बुटवल, २ साउन । बुटवलको ज्योतीनगरस्थित श्री जनज्योति आधारभुत विद्यालयका विद्यार्थीहरुलाई पोशाक वितरण गरिएको छ । बुटवल उपमहानगरपालिकाको आर्थिक सहयोगमा एक कार्यक्रमका बिच वडा नं ३ का वडाअध्यक्ष विष्णु ढकाल, विद्यालय ब्यवस्थापन समिति अध्यक्ष शोभाखर पाण्डे (माधव पाण्डे), प्रधानाध्यापक बिज्जु जिसि (कार्की) ले विद्यार्थीहरुलाई पोशाक वितरण गरेका हुन ।

कार्यक्रममा वडाअध्यक्ष ढकालले पटकपटक दैविप्रकोपको चपेटामा परेको विद्यालयको भौतिक पूर्वाधार र शैक्षिकस्तर उकास्ने गरि काम भैरहेको बताए । नगरभित्रको पुरानो विद्यालयको शैक्षिक विकास हुन नसकेको दुखेसो गर्दै यसतर्फ अभिभावक, विद्यालय ब्यवस्थापन समिति लाग्न उनले सुझाव दिए । आफनो वडामा सामुदायिक र नीजि केवल आधा दर्जन विद्यालयहरु रहेको भन्दै उनले वडाबाट आवश्यक सहयोग गर्दै आएको बताए ।

न्युनआयस्तर भएका परिवारका बालबालिकाहरु अध्ययरत विद्यालयमा नगरपालिकाको आर्थिक सहयोगमा प्रति बिद्यार्थी एक हजार पचास रुपैया बराबरको सहयोगबाट पोशाक, टाईबेल्ट वितरण भएको उनले बताए । चिडियाखोलामा रहेको बालबिकास केन्द्रमा समेत खेलकुद सामग्री वितरण भएको उनले बताए ।

कार्यक्रममा शिक्षक अभिभावक संघका अध्यक्ष बिष्णु कुमारी केसी खत्रीले पहिरोबाट क्षति ब्यहोरेको विद्यालय भौतिक विकासमा सरकारको सहयोग मिलेको बताए । बिसं २०३६ सालमा स्थापना भएको विद्यालयमा जम्मा ४१ जना विद्यार्थी र ४ जना शिक्षक कर्मचारीहरु रहेको शिक्षक कमलादत्त श्रेष्ठ भट्टराईले बताए ।