खोज

कपिलवस्तु, ३० असार । कपिलवस्तु जिल्लालाई पूर्ण खोप सुनिश्चितता तथा दिगोपना जिल्ला घोषणा गरिएको छ । अघिल्लो बर्ष घोषणा हुन नसकेर प्रदेशनै पूर्ण खोप सुनिश्चितता तथा दिगोपना प्रदेश हुन नसकेको कपिलवस्तु जिल्लालाई लुम्बिनी प्रदेशका स्वास्थ्यमन्त्री दिपेन्द्र पुन मगरले तोकिएको सुचक पुरा गरे पछि सो घोषणा गरेका हुन । जिल्ला खोप समन्वय समिती कपिलवस्तुको आयोजनामा तौलिहवामा आयोजित कार्यक्रममा मन्त्री पुनले घोषणा सगै प्रतिबद्धतापत्रमा हस्ताक्षर गरेका थिए ।

खोप लगाएको सुनिश्चित गर्न खोज र खोप अभियान चलाएर जिल्लालाई पूर्ण खोप सुनिश्चितता तथा दिगोपना जिल्ला घोषणा गर्न सफल भएको स्वास्थ्य कार्यालय कपिलवस्तुका प्रमुख वरिष्ठ जनस्वास्थ्य अधिकृत नारायण प्रसाद चौधरीले जानकारी दिए । उनले जिल्लाभरका जन्मिए देखी १५ महिना सम्मका १४ हजार ७ सय ८४ बालबालिका र १६ देखी ५९ महिनाका ३२ हजार १ सय ९९ गरि ४६ हजार ९ सय ८३ बालबालिकाको लाईनलिस्टिङ्ग गरिएको जनाए । जसमा १५ महिना मुनीका १३ जना र १६ देखी ५९ महिनाका ४ जना गरि १७ जनाले कुनै खोप नलाएको भेटिएको प्रष्ट्याए । त्यसै गरि १५ महिना मुनीका १ सय ५७ जना र १६ देखी ५९ महिनाका ६ सय २६ जना गरि ७ सय ८३ जनाले पुरा खोप नलगाएको भेटिएको उनले जनाए । ति बालबालिकालाई छुटेका १३ प्रकारको खोप पुरा गरिए सगै खोप सुनिश्चितताको बातावरण बनेको चौधरीले जानकारी दिए । अभियानकै कारण जिल्लाका सबै बालबालिकामा पूर्ण खोप सुनिश्चितताको बातावरण बनेको उनको भनाई थियो ।

अघिल्लो बर्ष कपिलवस्तुकै कारण प्रदेशनै पूर्ण खोप सुनिश्चितता तथा दिगोपना हुन नसकेको र यस बर्ष अन्तिम समयमा कपिलवस्तु घोषणा हुदाँ प्रदेश घोषणालाई बाटो खुलेको लुम्बिनी प्रदेशका स्वास्थ्यमन्त्री दिपेन्द्र पुन मगरले बताए । उनले स्वास्थ्य क्षेत्रका सुचकहरू कमजोर रहेको बताउदै जिम्मेवार निकायलाई समयमै आफ्नो जिम्मेवारी पुरा गर्न निर्देशन दिए । बिजयनगर गाउँपालिकाका स्वास्थ्य शाखाका संयोजक यज्ञ भट्टाई र बुद्धभुमी नगरपालिकाका प्रमुख प्रशासकिय अधिकृत चुडामणी पन्थीले आगामी समयमा घोषणाका कार्य समयमै हुनेमा बिश्वास दर्शाए । बाणगंगा नगरपालिकाकी उपप्रमुख रिता कुमारी चौधरीले आफ्नो नगरले घरमा हुने प्रसुती शुन्य घोषणा गरेको र पुर्ण पोषणमैत्री पालिका घोषणाको कार्यक्रम अन्तिम चरणमा पुर्याएको जानकारी दिईन । स्वास्थ्यमन्त्रीले स्थानिय तहको गुनासो सुन्न समय नदिएको शुद्धोधन गाउँपालिकाका अध्यक्ष कमलेशशरण चौधरीले बताए । स्वास्थ्यको सुचक पुरा गर्न कर्मचारी, जनप्रतिनिधी सगै नागरिक पनि उत्तिकै सचेत हुनु पर्नेमा उनको जोड् थियो । कपिलवस्तु जिल्ला स्वास्थ्यका धेरै सुचकमा पछाडी रहेकोले सबैको मेहनत आवश्यक रहेकोमा जिल्ला समन्वय समिती कपिलवस्तुका उपप्रमुख रमेश कुर्मीले जोड् दिए । जिल्लालाई पूर्ण खोप सुनिश्चितता तथा दिगोपना जिल्ला घोषणा गरिएकोमा जिल्ला समन्वय समिती कपिलवस्तुका प्रमुख बाबुराम आचार्यले सन्तोष व्यक्त गरे । बिगतमा भन्दा स्वास्थ्यका सुचकमा प्रगतीहरू घट्न थालेको भन्दै उनले चिन्ता व्यक्त गरे । कार्यक्रमलाई कतिपय पालिकाका स्वास्थ्य प्रमुखले चासो नदिएको भन्दै उनले गुनासो गरे । कार्यक्रममा जिल्लाका १० पालिकाका ७० जना ६० बर्ष पुरा भएका र स्वईच्छाले छोडेका राष्ट्रिय महिला सामुदायिक स्वास्थ्य स्वयंसेविकालाई प्रमाणपत्र दिई बिदाई गरिएको थियो । त्यसरी स्वयंसेविकाबाट अवकास लिएकाहरूलाई प्रदेश सरकारले जनही ५० हजार रूपैया र जिल्लाले २० हजार गरि कुल ७० हजार प्रोत्साहन रकम सम्बन्धितको खातामा पठाईएको जनाईएको छ ।