खोज

नवलपुर, २९ असार ।

पुर्वी नवलपरासीमा निरन्तर वर्षाले नेपालको मुख्य राजमार्ग नारायणगढ–बुटवलको यात्रा जोखिमपूर्ण बनेको छ । ठाउँपिच्छे खाल्डाखुल्डी र हिलाम्मे सडकका कारण यात्रु र सवारीचालकले सास्ती खेप्नु परिरहेको छ भने निर्माणको जिम्मा पाएको चाईना स्टेट ईन्जिनियरिङ कर्पोरेशन भने म्याद थपका लागि दौडधुपमा रहेको छ ।

वर्षातको भलले निर्माणाधीन सडक क्षत विक्षत बनाएको छ । पानी जमेका खाल्डाखुल्डीले सवारीसाधन चलाउन कठिनाइ भएको छ । सडक स्तरीय नहुँदा पैदलयात्रीलाई झन समस्या भएको छ । सामान्य मर्मत गर्नसमेत कसैको ध्यान पुगेको देखिन्न । सडककै कारण सवारीसाधन जाममा पर्ने गरेको चालक बताउँछन् ।

मनसुन सक्रिय भएपछि नारायणगढ बुटवल सडकमा यात्रा गर्न थप कष्टकर बनेको छ । २०७५ को चैतमा सुरु भएको उक्त सडक विस्तार तथा स्तरोन्नती कार्य सुस्त गतिमा भइरहेको देखिन्छ ।

वर्षातमा ग्राभेल हालेर खाल्डाखुल्डी पुर्ने र पानी तर्काउने सम्मको काम पनि नभएकोमा आयोजना कार्यालय र निर्माण कम्पनीप्रति स्थानीवासी रुष्ट बनेका छन् । सोही सडकका कारण नारायणगढदेखि बुटवल सम्मको यात्रा लामो, झञ्झटिलो र जोखिमपूर्ण बनेको यात्रुको गुनासो छ ।

थपिएको म्याद समेत पूरा हुन लागेको र समयमै काम गर्दा समेत स्तरोन्नतीको चरणमा नै रहेको नारायणघाट बुटवल सडकको पुर्वी खण्डको भौतिक प्रगति ५२ प्रतिशत मात्रै पुगेको निर्देशनालय पुर्वी खण्डका आयोजना प्रमुख आशिष थापा मगरले बताए ।

आयोजनाले २०२४ को जुलाई सम्म ७५ प्रतिशत र २०२५ को फेब्रुअरीमा ९५ प्रतिशत काम सम्पन्न गर्ने कार्ययोजना बनाएर काम गरेको भए पनि आयोजनाका पूर्वी खण्डका प्रमुख आशिष मगरले निर्माण कम्पनीले थपिएको म्याद २०८१ साउन सम्म काम सम्पन्न गर्नु पर्ने बताए ।

निर्माण कम्पनी र आयोजना निर्देशनालयका प्रतिनिधि बोलाएर बसेको जिसस प्रमुख, स्थानीय तहका प्रमुख, सहायक प्रमुख जिल्ला अधिकारी, नेपाल प्रहरी, नेपाली सेना, निर्माण कम्पनीका प्रतिनिधि सहितको बैठकले तत्काल चोरमारा र दाउन्ने पुर्वी क्षेत्रमा निकै समस्या भएको हिलाम्मे सडकको मर्मत सुरु गर्ने तथा गैँडाकोटदेखि दाउन्नेसम्म विभिन्न ठाउँमा रहेका खाल्डाखुल्डी सात दिनभित्र पुरिसक्नु पर्ने निर्णय समेत गरिएको जिल्ला प्रशासन कार्यालय नवलपरासीका प्रमुख अरुण पोख्रेलले जानकारी दिए ।

जनप्रतिनिधि र स्थानीय प्रशासनले पटक पटक बिग्रेको सडक मर्मत गर्न निर्देशन गर्दा पनि अटेर गरेको गुनासो स्थानीयबासीले गरेपछि जनप्रतिनिधि र स्थानीय प्रशासनले निर्माण कम्पनीका प्रतिनिधिलाई राखेर तत्काल निर्माणको काम अगाडि बढाउन निर्देशन दिएको गैँडाकोट नगरपालिकाका नगरप्रमुख मदनभक्त अधिकारीले बताए ।

समयमै सडक विस्तारको काम नसकेको निर्माण कम्पनी चाइना स्टेट इन्जिनियरिङ कर्पोरेसन लिमिटेडले दोस्रो पटक पाएको म्याद थपको अवधि यही साउन ८ गते सकिँदैछ । निर्माण कम्पनी चाईना स्टेट ईन्जिनियरिङ कर्पोरेसनले सडक निर्माण पूरा गर्न अझै एक वर्ष समय थप माग गरेको आयोजना निर्देशनालयले जनाएको छ ।

म्याद थपको विषयमा परामर्श दाता कम्पनीको राय अनुसार छलफल चलेको भए पनि निर्णय भै नसकेको आयोजना निर्देशनालयको पुर्वी खण्ड हेर्ने कार्यालयका प्रमुख आशिष मगरले बताए ।