खोज

बुटवल, २७ असार ।

आर्थिक मन्दीको बेला ब्यवसायीहरुलाई राहत दिनुको साटो स्थानीय पालिकाहरुले विज्ञापन कर उठाउने निर्णय गरेको विरोधमा रुपन्देहीका दुई दर्जन संघसंस्थाहरुले तिलोत्तमा नगरपालिकामा ज्ञापनपत्र बुझाएका छन् । संघर्ष समितिका संयोजक लेखनाथ भण्डारीको नेतृत्वमा नेपाल घरबहाल सरोकार संघ रुपन्देहीका अध्यक्ष राजु लिगल, डेरी ब्यवसायी संघका अध्यक्ष रामकृष्ण शर्मा, अटो ईन्जिनियरिङ एशोसियसनका अध्यक्ष तुल्सीराम न्यौपाने, बुटवल सुनचादी ब्यवसायी संघका अध्यक्ष गोकुल विश्वकर्मा सहित विहिबार दुई दर्जन संघसंस्थाका पदाधिकारीहरुले तिलोत्तमा नगरपालिकाका उपप्रमुख जगेश्वर देवी चौधरीलाई ज्ञापनपत्र बुझाएका हुन् ।

अहिले ब्यापार, ब्यवसाय खस्किरहेको र अधिकांश प्रतिष्ठान बन्द गरी तालाचाबी बुझाउने अवस्थामा पुगेको भन्दै संयोजक भण्डारीले आफुहरु कर तिर्न सक्ने अवस्थामा नरहेको बताए । चार वटामात्र ब्यावसायिक संस्थाबाट भएको निर्णय आफुहरुले नमान्ने भन्दै बरु आन्दोलनमा उत्रने बताए । पालिकाबाट ब्यवसायीहरुलाई पत्राचार गरेर जबरजस्तीमा उत्रने हो भने आफुहरु थप आन्दोलनमा उत्रने उनले बताए । ‘अब हामी तालाचाबी बुझाउँछौ ।’—उनले भने ।

ज्ञापनपत्रमा होटल तथा रेष्टुरेन्ट ब्यवसायी संघ रुपन्देही, डेरी ब्यवसायी संघ, बुटवल अटो ईन्जिनियरिङ एशोसिएशन रुपन्देही, नेपाल घरबहाल सरोकार संघ रुपन्देही, बुटवल सुनचादी ब्यवसायी संघ, सिलाई ब्यवसायी संघ, ढुवानी ब्यवसायी संघ, मदिरा ब्यवसायी संघ, ग्रील ब्यवसायी संघ, मोबाईल ब्यवसायी संघ, विद्युत ब्यवसायी संघ, पुस्तक तथा स्टेशनरी ब्यवसायी संघ, औषधी ब्यवसायी संघ, फलफुल तथा तरकारी ब्यवसायी संघ, क्याटरीङ तथा पार्टी प्यालेस ब्यवसायी संघ, नाई ब्यवसायी संघ, रुपन्देही फर्निचर उद्योग संघ, खुद्रा ब्यवसायी संघ रुपन्देही, मासु ब्यवसायी संघ, नेपाल औषधी थोक ब्यवसायी संघ, बुटवल मण्डी संचालक समिति, नेपाल ह्याचरी उद्योग संघ, उपभोक्ता हित संरक्षण समिति, रुपन्देही ब्युटिसियन संघ, का पदाधिकारीहरुको हस्ताक्षर रहेको छ । ब्यवसायीको कम्पाउण्डभित्र राखिएको बोर्ड नभई सडक क्षेत्रमा राखिएको बोर्डको कर उठाउनुपर्ने उनले सुझाव दिए ।