खोज

सुर्खेत, २७ असार ।

केन्द्रमा दलीय समीकरण बदलिएपछि कर्णालीमा पनि त्यसको असर देखिन्छ । यतिबेला प्रदेशमा कस्तो समिकरण बन्ला त भन्ने सबैको चासोको विषय बनेको छ । कर्णाली प्रदेशमा एमालेले नेतृत्व गरिरहेको छ । एमाले र काँग्रेसबीच सत्ता साझेदारी भएपछि कसले प्रदेशको नेतृत्व गर्ला भन्नेतर्फ सबैको चासो रहेको देखिन्छ । कर्णाली सरकारका मुख्यमन्त्री यमलाल कँडेल प्रदेशको नेतृत्व निरन्तरता पाउनेमा ढुक्क छन् ।

मुख्यमन्त्री कँडेल नेकपा (माओवादी केन्द्र)को समर्थनमा मुख्यमन्त्री बनेका थिए । कँडेल नेतृत्वको सरकारका माओवादीका तर्फबाट चार जना मन्त्री छन् । जसमा सामाजिक विकासमा वीरबहादुर शाही, अर्थमन्त्री महेन्द्र केसी, उद्योग, पर्यटन, वन तथा वातावरणमा दुर्ग बहादुर रावत र जलस्रोत तथा ऊर्जा विकासमा रणसिं परियार मन्त्री छन् । केन्द्रमा समीकरण बदलिएसँगै कर्णालीमा माओवादीले के गर्छ भन्ने विषय अझ चासोका साथ हेरिएको छ ।

प्रदेशसमा कसरी अगाडि बढ्ने भन्ने विषयमा हालसम्म कुनै निर्देशन नआएको प्रदेशका सांसदको भनाई छ । एमालेका सचेतक टेकबहादुर पछाईले केन्द्रको निर्देशनको पर्खाइमा रहेको बताए । ‘हालसम्म कुनै निर्देशन त आएको छैन तर, विगतका इतिहास हेर्दा केन्द्रीय नेतृत्व जसरी अगाडि बढ्छ सोही बमोजिम नै प्रदेश सरकार अगाडि बढेको अवस्था छ’ उनले भने, ‘एक दुई दिनभित्रमा केही निस्कर्ष आउला ।’ उनले कर्णालीमा एमालेकै नेतृत्वमा सरकार गठन हुने संकेत गरे ।

यता कांग्रेस भने विगत तीन महिनायता संसदीय दलको नेता विहीन अवस्थामा छ । दलका नेता रहेका जीवनबहादुर शाही निलम्वनमा छन् । अहिले कांग्रेसको तर्फबाट प्रमुख सचेतक हिक्मत विष्टले संसदीय दलमा नेतृत्व गरिरहेका छन् । काँग्रेसका सचेतक विष्टले हाल दलको नेता परिवर्तन गर्ने तयारी नरहेको जनाए । ‘हाल दलको नेता परिवर्तन हुँदैन त्यो आवश्यक पनि छैन’ विष्टले भने, ‘अहिले मैले सचेतकको रुपमा नेतृत्व गरेको छु, आवश्यक परेको खण्डमा सल्लाह लिएको छु ।’

केन्द्रमा सत्ता समिकरण बदलिएपनि प्रदेशस्तरमा भने कुनै पनि निर्देशन नआएको सचेतक विष्टले बताए । ‘प्रधानमन्त्रीले शुक्रवार विश्वासको मत लिएपछि केन्द्रमा जुन खालको सरकार बन्छ सोही अनुरुप प्रदेशमा निर्देशन होला’ उनले भने, ‘हाल प्रदेशमा एमालेले नेतृत्व गरेको अवस्थामा यही सहभागी भएर अगाडी बढ्ने र मुख्यमन्त्री आलोपालो गर्ने भन्ने हुन सक्छ ।’

पूर्वमन्त्री एवम् माओवादी सांसद कृष्णबहादुर जिसी केन्द्रमा सरकार परिवर्तन भइनसकेकाले अहिले नै त्यो तहबारे प्रदेशमा सोच्नुपर्ने स्थिति नआएको बताउँछन् । ‘केन्द्रमा सरकार परिवर्तन भइसकेको छैन चर्चा मात्र चलेको हो त्यसैले अहिले नै सोच्नुपर्ने अवस्था छैन’ उनी भन्छन्, ‘प्रधानमन्त्रीले विश्वासको मत लिएपछि मात्र कसरी अगाडी बढ्ने भन्नेतर्फ लाग्नुपर्ने हुन्छ ।’ केन्द्रमा एमाले–कांग्रेस मिलेर गएको खण्डमा प्रदेशमा सोही अनुसार केन्द्रीय राजनीतिकै प्रभावमा रहेको उनको भनाई छ ।

४० सदस्यीय कर्णाली प्रदेश सभामा एमालेको १० र नेपाली कांग्रेसको १४ सांसद छन् । यहाँ सरकार बनाउन कम्तीमा पनि २१ सांसदको समर्थन आवश्यक हुन्छ । काँगे्रस र एमाले मिल्दा सहजै बहुमत पुग्ने देखिन्छ । यसकारण एमाले संसदीय दलका नेतासमेत रहेका कँडेलले नै मुख्यमन्त्रीमा निरन्तरता पाउने देखिन्छ ।