खोज

लमही,२५ असार । कालोपत्रे गरेको एक महिना बित्दा नबित्दै लमही नगरबिकास समितिको कालोपत्रे धजै धजा भएको छ । नगर बिकाश समितिको प्लानिङ क्षेत्रको सडक एक महिना नहुँदै चिरा परेको छ । ब्याडमिन्टन कभर्डहल साइडको सडक क्षेत्र खण्डहर बनेको छ ।
लमही नगर बिकाश समितिले चालु आर्थिक बर्षमा वडा प्रहरी कार्यालय देखि सिद्धार्थ होटेल सम्मको सडक खण्डलाई कालोपत्रे गरी फराकिलो बनाएको हो भने वडा प्रहरी कार्यालय जाने बाटो, देखि वाल र कालोपत्रे गरेको छ । प्लानिङ क्षेत्रको कर्भडहल रोड, नगरबिकाश समिति क्षेत्र, विद्युत लाईन क्षेत्र लगायतका बिभिन्न स्थानमा सुधार बिस्तारको काम गरेको भएतापनि गत असार २१ गतेदेखि परेको पानीका कारण ब्याडमेन्टिन कर्भडहल नजिकको भर्खरै गरेको कालोपत्रे सडक चिरा चिरा पर्नुका साथै खाल्डो परेको छ ।

सडक कालोपत्रेको न्यूनतम मापदण्ड पुरा नगरी हचुवाको तालमा कालोपत्रे गर्दा योजनाको निर्माणको काम पुरा नहुँदै कालोपत्रे भत्किएको स्थानीयले आरोप लगाएका छन् । उज्ज्वल निर्माण सेवाले कुल २ करोड ४० लाखको लागतमा १ किलोमीटर प्लानिङ क्षेत्रको ब्लक लगाउने सडक फराकीलो पार्ने र सोल्जर लगाउने जिम्मा पाएको थियो । निर्माणको काम असोज महिना सम्म निर्माण सम्पन्न गर्ने सम्झौता भएको नगर बिकाश समितिका सब इन्जिनियर तुल्सी अर्यालले बताए । साथै निर्माण सम्झौता अनुसार निर्माण भएको एक बर्ष सम्म भत्किएका संरचनाको पुन निर्माणको काम स्वयं निर्माण कम्पनीले गर्ने अर्यालले बताए ।

निर्माण सम्पन्न भईसकेपछिको एक बर्ष सम्म सडक केही भएमा कम्पनीले नै पुन निर्माणको काम गर्ने सम्झौता भएकोले यसबाट नगरबिकाश समितिलाई कुनै आर्थिक भार नपर्ने सब ईन्जिनियर अर्यालले बताए । स्थानीय बासिन्दाहरू भने लमही नगर बिकासमा चरम लापरबाही हुने गरेको गुनासो गर्दै आएका छन ।