खोज

नेपालगञ्ज, २२ असार ।

दुई दिनदेखि निरन्तर भइरहेको अविरल बर्षाले राप्ती नदीमा आएको बाढी बाँकेका गाउँबस्तीमा पसेको छ । राप्ती नदीको पानीले खतराको बिन्दु पार गरेपछि गाउँबस्तीमा बाढी पस्न थालेको हो ।

राप्ती नदीको बाढीले गर्दा कुसुममा रहेका गाउँहरु डुब्न थालेको प्रहरीले जनाएको छ । राप्ती सोनारी गाउँपालिका –१ अन्तर्गत गर्ने कुसुमस्थित बाघखोर गाउँमा बाढी पसेको स्थानीय प्रेम सुनारले बताए ।

उनले शनिवार दिउँसो बाढी गाउँमा पस्दा स्थानीय खुमलाल रावत, शालिकराम भण्डारी, राजकुमार रावत, गर्भे बिक, रमेश भण्डारी, धर्मबहादुर ओली, चोपा ओली, रोवर ओलीको घर डुबानमा परेको बताए ।

राप्तीसोनारी –१ अन्तर्गत पर्ने कुसुमका अन्य विभिन्न गाउँहरु पनि डुबानको उच्च जोखिममा रहेको स्थानीयले बताएका छन् । राप्तीको बाढी खतराको चिन्हभन्दा माथि पुगेको छ ।

बाँकेको कुसुमस्थित बाढी मापन केन्द्रमा शनिबार अपरान्हको रेकर्डअनुसार राप्ती नदीमा पानीको सतह बेलुका ५ बजे मापन गर्दा ७ मिटर ९३ सेन्टिमिटर पुगेको छ । कुसुमस्थित बाढी मापन केन्द्रमा पानीको सतह ७ मिटर पुगेपछि राप्तीको तल्लो तटीय क्षेत्रमा डुबान हुने गर्छ । पानीको सतहले खतराको बिन्दु पार गरेपछि अब ५ घण्टामा बाढी राप्तीसोनारी, डुडुवा र नरैनापुरका गाउँहरुमा पुग्ने र त्यहाँ धेरै गाउँ डुबानमा पर्ने खतरा बढेको छ । राप्ती नदीको सतहले खतराको चिन्ह पार गरेपछि उद्धारका लागि सुरक्षाकर्मीलाई तयारी अवस्थामा राखिएको जनाउँदै तटीय क्षेत्रका वासिन्दालाई सतर्क गरेर सुक्षित स्थानमा सार्न थालिएको बाँकेका प्रमुख जिल्ला अधिकारी खगेन्द्रप्रसाद रिजालले बताए । अहिले सम्म डुडुवा – १ चौफेरीका करिव ५० जनालाई सुरक्षित स्थानमा सारिएको र करिव एक सय परिवार लाई सुरक्षित स्थलमा लैजाने तयारी गरिरहेको बाँकेका प्रमुख जिल्ला अधिकारी रिजालले बताए ।

जिल्ला विपद व्यवस्थापन समितिका संयोजक समेत रहेका प्रजिअ रिजालले राप्तीमा पानीको सतह क्रमिक रुपले बढिरहेकाले जिल्लामा ठुलो बाढीको आशंका बढेको हुँदा उद्धारमा खटिने सुरक्षाकर्मीलाई तयारी अवस्थामा राखेर सबै तयारी पूरा गरिएको बताए ।

सिक्टा सिँचाइ आयोजनाको अगैयास्थित ब्यारेजका ढोका आवश्यकताअनुसार खोल्न लगाएको पनि उनले जानकारी दिए । राप्तीको बाढी बढेपछि सिक्टा सिँचाइ आयोजनाको ब्यारेजका ढोका पनि क्रमशः खोेलिएको आयोजनाका निर्देशक देवराज निरौलाले बताए ।

राप्तीको बाढी माथिल्लो क्षेत्रका गाउँमा छिर्न थालेपछि नदीको तल्लो तटीय क्षेत्रका स्थानीय बासिन्दा त्रसित बनेका छन् ।

राप्तीको तल्लो तटीय क्षेत्र राप्ती सोनारीको फत्तेपुर, खल्ला झगडिया, नरैनापुरको गंगापुर, मटेहिया तथा डुडुवा गाउँपालिकाको कम्दी, बेतहनी, बनकट्टी, होलिया, चौफेरी, पाँझालगायतका गाउँमा बाढी पस्ने भएकाले सो क्षेत्रका स्थानीय त्रासमा छन् ।