खोज

बुटवल,२२ असार ।  परियार सेवा समाज लुम्बिनी प्रदेशको प्रथम भेला शनिबार बुटवलमा सम्पन्न भएको छ । परियार सेवा समाजको पाचौं राष्ट्रिय सम्मेलनका लागि लुम्बिनी प्रदेशस्तरीय भेला गरिएको हो ।
कार्यक्रममा बोल्दै परियार सेवा समाजका निवर्तमान केन्द्रीय महासचिव तथा प्रचारप्रसार उपसमिति संयोजक धर्म परियारले परियार समुदायको हकहित, एकता र उत्थानको लागि देशभरका परियारहरु एकजुट भएर लाग्नुपर्ने बताए । २१ औं शताब्दीमा पनि सीप र कलाले धनी परियारहरु राज्यका हरेक निकायमा अवसरबाट बञ्चित हुन परेको बताउँदै त्यसका लागि परियार समाजको आवश्यकता रहेको बताए ।
बुटवलमा भएको प्रथम लुम्बिनी स्तरीय भेलाले प्रदेश संयोजक कृष्ण रणपालको संयोजकत्वमा २७ सदस्यीय टिम चयन भएको छ । उक्त भेलाले यही साउनको १५ गतेभित्र सबै जिल्ला र प्रदेशमा अधिवेशन सम्पन्न गर्ने र भदौको १४ र १५ गते काठमाडौंमा भव्य समारोहका बीच समाजको पाचौं राष्ट्रिय सम्मेलन सम्पन्न हुनेछ ।
कार्यक्रममा नेपाल कपडा तथा सिलाई व्यवसायी संघका केन्द्रीय उपाध्यक्ष तथा परियार, समाजका लुम्बिनी प्रदेशका अभिभावक रामकुमार रणपाल, कृष्ण घेले, जंग बुढापृथी, सरोज गौतम, सुवास परियार, सुवर्ण परियार, रामु परियार, लिला बागदास, राजु वराह र अरुणा कोईराला,परियार एकता संस्था बर्दघाटका अध्यक्ष चन्द्र रणपाल, निवर्तमान अध्यक्ष तथा सल्लाहकार भोजराज रणपाल, शान्ता रणपालले बोल्दै परियार, परियार सेवा समाज रुपन्देहीका अध्यक्ष लोक बहादुर नेपाली, सचिव लक्ष्मण परियारले परियारहरुको हकहित, उत्थान, संस्थागत एकता तथा पेशागत संरक्षणका लागि देशभरका परियारहरु एक ढिक्का भएर लाग्नुपर्नेमा जोड दिए ।