खोज

लमही, २१ असार । ६५ करोडको लागतमा २०७६ कार्तिक २९ मा बज्रगुरू कान्छाराम जेभीसँग हुलाकी राजमार्ग आयोजना कार्यालयले बनघुस्रीदेखि गढवासम्मको २० किलोमिटर सडक कालोपत्रे गर्न ठेक्का सम्झौता गरेको थियो । तोकिएको समयमा काम नभएपछि २०७९ मंसिर अन्त्यतिर म्याद थपेर २०८० साउन १० सम्म कायम गराउँदा पनि नभएको सडकको काम फेरि मंसिर २२ गतेदेखि शुरु गरेझै गरे पनि कामै भएन । अहिले धैरेनीदेखि गढवासम्म काम भएकै छैन भने धैरेनीदेखि पूर्वको क्षेत्रमा पनि बीच बीचमा काम बाँकी रहेको स्थानीयले बताएका छन् ।
हुलाकी राजमार्ग आयोजना कार्यालय नेपालगञ्जका आयोजना प्रमुख लिला भण्डारीले निर्माण व्यवसायीले पटक–पटक काम गर्नेभन्दै काम नगरी सरकारको आँखामा छारो हाल्ने काम गरेको बताए । बज्रगुरू कान्छाराम जेभीका लक्ष्मण राना सम्पर्कमै नआउने, काम पनि नगर्ने अवस्थाले आजित भएको बताउँदै उनले अब कार्यालय ठेक्का तोड्ने अवस्थामा पुगिसकेको बताए । ‘घोराहीकै लक्ष्मण राना सम्पर्कमै आउँदैनन् । साइटमा अहिले जिम्मेवार मान्छे कोही छैनन्’– उनले भने ‘जिल्ला प्रशासन कार्यालयको सार्वजनिक सुनुवाईमा काम तत्काल शुरु गर्ने र बाँकी भुक्तानी कार्यालयले दिने सहमति भएको थियो । भुक्तानी दिइयो तर काम भएन ।’ उनले यसरी कामै नगर्ने निर्माण कम्पनीलाई ठेक्का दिएर पार लाग्ने नदेखेपछि ठेक्का नै तोड्ने मनस्थितिमा पुगेको बताए ।

‘मोभिलाईजेशन पेश्की तान्न बैंकमा पत्र काटिसकेका छौं’– उनले भने– ‘ठेक्का तोड्ने प्रक्रिया शुरु भइसक्यो ।’ कार्यालयका अनुसार २०८१ जेठ २८ गते नविल बैंक दरबारमार्गलाई पत्र काटेर पाँच करोड ९० लाख र एक करोड ९५ लाख रूपैयाँ पेश्की फिर्ता गर्न भनिएको छ । आयोजना प्रमुख भण्डारीले निर्माण व्यवसायीले काम गर्छु भनेर विटमिन झारे पनि त्यसको निरीक्षण गर्दा अन्य इक्युपमेन्ट देखा नपरेकोले ठेक्कै तोड्ने तयारी गरिएको बताए ।

यता कामै नगर्ने निर्माण कम्पनीसँग ठेक्का तोडेर नयाँ ठेक्का प्रकृया शुरु गर्नुपर्ने गढवा गाउँपालिकाका अध्यक्ष यमनारायण पोख्रेलले बताउछन । कामै नगरेर सडक अलपत्र पारेपछि पटक–पटक दबाब दिँदा समेत काम नगर्ने निर्माण कम्पनीको संरक्षण गर्न जरुरी नरहको बताए । उनले ठेक्का तोडेर नयाँ प्रक्रियामै जानुपर्ने पक्षमा आफू रहेको बताए । ‘काम गरे जस्तो गर्ने तर कामै नगर्ने पाराले जनताले धेरै दुःख पाइसके अब त्यसरी हुँदैन’– पोख्रेलले भने– ‘काम नगर्ने कम्पनीसँग ठेक्का तोडियोेस् भन्ने पक्षमै हामी छौं ।’ सो सडकलाई बैकल्पिक राजमार्गको रूपमा लिने गरिन्छ । कालाकटे देखि बाकेको सिक्टासम्म पुराउने उदेश्यका साथ निर्माण हुन लागेको सडक बर्षौसम्म पनि निर्माण हुन नसक्दा स्थानीय सास्ती भोक्दै आएको बताउँछन् ।