खोज

चन्द्रौटा (कपिलवस्तु), २१ असार । ‘लामो समयपछि बाटो बनेको छ अत्यन्तै खुसी लोग्यो । धुलोको सास्तीले बिरामी हुने अवस्थामा पुगेका थियौँ तर यतिबेला सडक कालोपत्रे भएपछि खुसी छौँ’ : स्थानीय आनन्द यादवले भने । खरेन्द्रपुर चोकदेखि महाराजगञ्ज, तौलिहवा, लुम्बिनी, हुलाकी रोड, भारतको कोटिया लगायतको स्थानमा जोडने सडक बीचमा अलपत्र बनेपछि स्थानीयसँगै यात्रुलाई सास्ती भएको दिलाराम खनालले बताए ।
कपिलवस्तुको खरेन्द्रपुर–सितलापुर–भिल्मी सडकको विकास निर्माण कार्यले गति लिएपछि स्थानीय हर्षित भएका छन् । विगत ४ बर्ष बढीको धुल्लमे, हिलम्मे लगायतको सास्तीपछि सडक खण्डको स्तरोन्नति, सडक पिच, नाली निर्माण, माटो पटान जस्ता कार्यले गति लिएपछि हर्षित भएका हुन् ।
२०७६ कात्र्तिक २९ सम्झौता भई २०७९ कार्तिक २८ गते सम्म निर्माण कार्य सम्पन्न गर्ने गरी सम्झौता भएको थियो । स्वच्छन्द सिरुवा वल्डवाइड जेभी निर्माण कम्पनीले संयुक्त रूपमा ठेक्का पाएको थियो । जसमा सिरुवा कम्पनीले काम गर्दागर्दै बीचमा अलपत्र अवस्थामा छाडेको थियो । अर्का सास्ती पाएका स्थानीय मोहन पौडेलले केहि महिना अघि सडक कालोपत्रे हुँदा पसल बन्दा गरेर बस्नुपर्ने बाध्यता हटेको बताए । निर्माण कार्य समयमा सम्पन्न नहँुदा पसल बन्दा गरेर बस्नु परेको थियो । अब भने सहजरूपमा आवातजावत गर्नदेखि व्यापारमा समेत प्रभावकारी भएको उनले बताए ।
यता हुलाकी राजमार्ग योजना कार्यालय कपिलवस्तुका इन्जिनीयर पवित्रमणी आचार्यले समयमै निर्माण कार्य सम्पन्न गर्ने बताउँदै नगरेको खण्डमा निर्माण व्यवसायीलाई कारवाही गर्ने बताए । पुरानो सम्झौता संसोधन गरी आगामी २०८१ चैत १३ गते निर्माण कार्य सम्पन्न हुनेगरी ७७ करोड ४८ लाखमा पुनः कार्य सञ्चालन गर्ने स्वच्छन्द निर्माण कम्पनीले जिम्मा पाएको हो ।
शिवराज नगरपालिकाका मेयर अजय थापाले खासगरी यो सडक खण्ड आफ्नो पालिकामा पर्ने भएको प्राथमिता दिएको बताए । नगरबासीको समस्यालाई मध्यनजर गर्दै रोकिएको कार्यलाई सञ्चालन गर्न पहल गरेको उनले दावी गरे । ठेकेदारहरूको आपसी द्धन्दले गर्दा समस्या भएको थियो, त्यसलाई समाधान गरेर निर्माण कार्य चुस्तदुरुस्त रहेको मेयर थापाले बताए ।
ठेकेदार पक्षले गुणस्तरीय काम गरेको जिकिर गर्नु हुँदै पछिल्लो समय स्वच्छन्द कम्पनीले गत चैत्त १५ बाट सुरु भएको कार्य साढे २ किलो मिटर कालोपत्रे गरि सकेको आचार्यले जनाए । गर्न बाँकी रहेको कार्य जारी रहेकोले समयमै सम्पन्न गर्ने लक्ष्य रहेको छ । उक्त सडकको लम्बाई १८.८२० किलोमिटर रहेको हुलाकी राजमार्ग योजना कार्यालय गोरुसिंगे कपिलवस्तुले जनाएको छ ।