खोज

बुटवल (बुटवल टुडे), १८ असार – संघमा सरकार परिवर्तन हुने हल्लाले लुम्बिनी प्रदेशमा पनि चर्चा सुरु भएको छ । संघीय सरकारमा अहिले माओवादीको नेतृत्वमा एमाले, रास्वपा सहितका दल छन् । प्रदेशमा भने माओवादीको नेतृत्वमा एमाले सहित, एकीकृत समाजवादी सहितका दल समावेश सहितको सरकार छ । प्रदेशमा नेकपा एमाले २९ सिट सहित पहिलो दल भएपनि उसँग एकल बहुमत छैन । कुल ८७ सांसद मध्ये नेपाली काग्रेससँग २७ सिट छ । यदि नेपाली कांग्रेस, एमाले मिल्ने हो भने बहुमत हुन्छ । तर माओवादीका ११ सांसद सहित तेस्रो ठूलो दलको रूपमा रहेको छ ।
माओवादीले अहिले मुख्यमन्त्री सहित मन्त्री रहेका छन् । उनीहरू यदि गठबन्धन बाट एमाले र कांग्रेसको सरकार बनेमा माओवादीले मुख्यमन्त्री सहित मन्त्री गुमाउने भन्दै चर्चा सुरु भएको हो । नेकपा माओवादी केन्द्रका संसदीय दलका नेता जोख बहादुर महरा अहिले मुख्यमन्त्री छन् । यता एमालेबाट भने लिला गिरी दलको नेता छन् । यदि गठबन्धन भएर नेकपा एमालेको सरकार बनेमा लिला गिरी मुख्यमन्त्री बन्ने छन् । उनी यो भन्दा पहिला पनि मुख्यमन्त्री बनिसकेका नेता हुन । नेपाली कांग्रेसले प्रदेशको नेतृत्व पाएमा दलका नेता डिल्लीबहादुर चौधरी मुख्यमन्त्री हुने छन्, उनी निवर्तमान मुख्यमन्त्री समेत हुन ।

यता, प्रमुख प्रतिपक्ष दल नेपाली कांग्रेसका सभापति शेरबहादुर देउवाले नेकपा एमालेका अध्यक्ष केपी शर्मा ओलीलाई शनिबार घरमै पुगेर प्रधानमन्त्रीको प्रस्ताव गरेको चर्चा चलेको थियो । प्रधानमन्त्री पुष्पकमल दाहाल नेतृत्वको सरकार ढालेर कांग्रेस र एमाले मिलेर सरकार बनाउने गृहकार्य भइरहेको छ । कांग्रेसले ओलीलाई देउवाले प्रधानमन्त्रीको प्रस्ताव गरेका छन् । यो प्रस्तावपछि प्रधानमन्त्रीसँग ३ घण्टा लामो संवाद गरेका थिए ।
तर, ओलीले आफू यही वर्ष प्रधानमन्त्री बन्ने सम्भावना नरहेको जिकिर गरे संसद भवन बाहिर तपाईं प्रधानमन्त्री बन्ने चर्चा छ, शपथ कहिले लिनुहुन्छ ? भन्ने सञ्चारकर्मीहरूको प्रश्नमा ओलीले भने, ‘यस वर्ष त त्यस्तो लाग्दैन खोई !’ उनले देश र जनताले आफू प्रधानमन्त्री बनेको हेर्न चाहेको भए राम्रो कुरा भएको बताए । शनिबारको भेटमा देउवाले ओलीलाई प्रचण्ड सरकार ढालेर प्रधानमन्त्री बन्न प्रस्ताव गरेका छन् ।
यता, प्रधानमन्त्री पुष्पकमल दाहालले सरकार परिवर्तनको कुनै सम्भावना नरहेको बताएका छन् । सिंहदरबारमा सोमबार बसेको मन्त्रिपरिषद् बैठकमा प्रधानमन्त्री प्रचण्डले सञ्चारमाध्यममा चर्चा भएजस्तो सरकार परिवर्तनको कुनै सम्भावना नरहेको भन्दै वर्तमान सत्ता समिकरण पुरै अवधि चल्ने बिफ्रिङ गरेको सरकारका प्रवक्ता रेखा शर्माले जानकारी दिएकी छन् ।

बाहिर चर्चा भएजस्तो सत्ता समिकरणमा असमझदारी भयो भन्ने कुरा असत्य रहेको र सकारात्मक ढंगले छलफल अघि बढिरहेको प्रधानमन्त्रीले बताएको शर्माले बताइन् । त्यस्तै मन्त्रिपरिषद् बैठकले जापान सरकारबाट मानव संशाधन बिकास, छात्रवृति आयोजनाका लागि प्राप्त हुने करिब ३८ करोड २२ लाख रूपैयाँ बराबरको अनुदान सहायता स्वीकार गर्ने निर्णय गरेको छ भने धितोपत्रसम्बन्धी ऐनलाई संशोधन गर्न बनेको विधेयक संसदमा पेश गर्न स्वीकृति प्रदान गरेको प्रवक्ता शर्माले बताइन् । बैठकले आर्थिक कार्यविधि एवं वित्तीय उत्तरदायित्व ऐन संशोधन गर्न बनेको विधेयकलाई पनि संसदमा पेश गर्न स्वीकृति प्रदान गरेको छ ।