खोज

बुटवल, १८ असार ।

बुटवल उपमहानगरपालिका वडा नम्बर १५ को आयोजनामा अपाङ्गता भएका व्यक्ति र तिनका अभिभावकहरुलाई अपाङ्गता सम्बन्धी अभिमुखीकरण तालिम प्रदान गरिएको छ ।

मंगलबार बुटवल १५ सेमलारमा एक कार्यक्रमको आयोजना गरी वडाभित्र बसोबास गर्दै आएका अपाङ्गता भएका व्यक्तिहरुको लागि अपाङ्गता अधिकार, अन्तर्राष्ट्रिय अभ्यास, परिचय पत्र व्यवस्थापन सहित नेपाल सरकारले गरेको अपाङ्गता सम्बन्धी विविध विषयमा अभिमुखीकरण प्रदान गरिएको हो ।

कार्यक्रममा बोल्दै बुटवल उपमहानरपालिका वडा नम्बर १५ का अध्यक्ष तथा नगर प्रवक्ता शिव रानाले अपाङ्गता अधिकार स्थापित गर्नको लागि वडा, पालिका, प्रदेश र संघीय सरकार समक्ष समेत निरन्तर संमन्वय र सहकार्य गर्ने प्रतिवद्धता जनाएका थिए ।

अपाङ्गता भएका व्यक्तिहरुको सीप सहितको उद्यमशिलतामा जोड दिइएको जानकारी दिंदै उनले पालिकाभित्र रहेका अपाङ्गता भएका व्यक्ति र अभिभावकहरुले उत्पादन गरेका विभिन्न वस्तुको कोशेलीघर स्थपना गरी बजारीकरण गर्ने सम्मका योजना नगरपालिकाले आगामी आर्थिक बर्षमा बनाएको बताएका थिए ।

मानिस जो कोही, जति बेलामा अपाङ्गता हुन सक्ने भन्दै उनले अपाङ्गता हुँदैमा कोही पनि व्यक्ति कजमोर र असक्षम हुने भन्ने धारणा सबैले चिर्नुपर्ने बताएका थिए । सिप सहितको उद्यमशिलता विकास गरी आगामी दिनमा जो सुकै व्यक्ति सक्षम हुने भन्दै उनले यसको लागि वडाले, पालिकाले के के काम गर्नुपर्ने आवश्यकता छ, सोही योजना अनुसार काम गर्ने प्रतिवद्धता समेत जनाएका थिए । अपांगता भएका व्यक्तिहरुले समस्या समाधानका लागि सबैजना मिलेर सहकार्य गर्नुपर्ने उनको भनाई रहेको थियो ।

कार्यक्रममा बोल्दै अध्यक्ष रानाले भने–‘ राज्यले कुनकुन समस्या समाधान गर्न सक्छ, कुन निकायले के काम गर्ने हो, कहाँबाट लाभ लिन सकिन्छ भन्ने विषयमा यकिन भएर हामी काम गर्ने हो भने सफल हुन्छौं, यसमा सबैको साथ र सहयोग आवश्यक छ ।’

स्थानीय वडा तहमा अपाङ्गता समन्वय समिति समेत निर्माण गरेर जान सकिने यसको लागि वडा भेलामा छलफल गरिने उनले बताएका थिए ।

कार्यक्रममा अपाङ्गता राष्ट्रिय निर्देशक समितिका सदस्य तथा राष्ट्रिय अपाङ्ग महासंघ नेपालका संघीय सदस्य सावित्रा घिमिरेले सहजीकरण गर्दै अपाङ्गताको प्रकृति, प्रकार, राज्यबाट प्रदान गर्दै आएको स्वास्थ्य, शिक्षा, रोजगार लगायतका विषयमा प्रकाश पारेकी थिईन् । उनले अपाङ्गता एउटा अवरोधजन्य परिस्थिति भएको भन्दै अवरोध हटाएर सबैले आआफ्नो स्थानबाट पहल गरेर अपाङ्गता समस्या समाधान हुने समेत तर्क राखिन् ।

कार्यक्रममा बुटवल उपमहानरपालिका वडा नम्बर १५ का वडा सदस्य रमा पराजुली पौडेलले वडामा स्थानीय तहले के के काम सकिन्छ भन्ने विषयमा वडा समितिमा व्यापक छलफल गरी आगामी बजेटमा अपाङ्गताको सवाललाई समेटेर लैजाने प्रतिवद्धता जानएकी थिईन् ।

अपाङ्गता सवाल सबैको साझा सवाल भएको भन्दै उनले सोही अनुसार योजनाबद्ध विकास गर्नेमा दुईमत नभएको बताएकी थिईन् । कार्यक्रममा वडा सदस्यहरु सुर्य प्रसाद काफ्ले, मञ्जु दर्जी, नवरन्त माविका प्रधानाध्यापक हेमराज आचार्य, वडा सचिव मेघराज काफ्ले, एकल महिला वडा समन्वय समितिका संयोजक सितासिंह ठकुरी लगायतको आतिथ्यता रहेको थियो । स्वतन्त्र विकास समाज नेपाल बुटवल– १० रुपन्देहीको सहकार्यमा कार्यक्रम गरिएको हो ।