खोज

सुर्खेत, १६ असार ।

मध्य असारसम्ममा कर्णालीमा ५१ प्रतिशत रोपाई भएको छ । समयमा पानी नपर्दा ढिलो गरी रोपाइँ भएको हो । आकासे पानीको भर पर्ने किसानका लागि भने समयमा पानी नपर्दा समस्यामा पर्ने गरेका छन् ।

कर्णालीमा अधिकांश सिँचाइ उपलब्ध भएका र खोलाको आसपासका जग्गामा रोपाइँ सम्पन्न भएको छ । त्यसैगरी आकाशे पानीको भर पर्नुपर्ने अधिकांश स्थानमा भने रोपाई हुन नसकेको हो । कृषि विकास निर्देशनालयका अनुसार मध्य असार सकिदा प्रदेशभर ५१ प्रतिशत मात्र रोपाई भएको छ ।

कृषि विकास निर्देशनालयका अधिकृत याम रानाका अनुसार प्रदेशका १० जिल्ला मध्ये सबैभन्दा बढी जुम्ला र सबैभन्दा कम सुर्खेतमा रोपाई सकिएको छ । निर्देशनालयका अनुसार कर्णाली १० जिल्ला मध्ये जुम्लामा ९० प्रतिशत, दैलेखमा ३० रुकुमपश्चिम ३०, जाजरकोटमा ६०, सल्यानमा ६५,, हुम्ला र मुगुमा ७०÷७० प्रतिशत, डोल्पामा ८०, कालिकोट २५ प्रतिशत रोपाइँ सम्पन्न भएको छ ।

कर्णालीमा ४१ हजार ९ सय ४ धान खेती हुने क्षेत्र रहेको छ । अधिकृत रानाले पहाडी जिल्लामा धेरैजसो ठाउँमा रोपाइँ सम्पन्न हुन लागेको जानकारी दिए ।

समयमै पानी नपर्नुका साथै बालिनालीमा लाग्ने विभिन्न रोग प्रकोपको कारण वर्सेनि धान उत्पादनमा कमी आएको रानाले जनाए । ‘पछिल्लो समय अधिकांश कृषकले उत्पादन बढाउन हाइव्रेड जातका बालीहरु लगाउने गर्छन्, तर, यो लगाउँदा वर्सेनि मलको मात्रा भने बढाउनुपर्ने हुन्छ’, उनले भने, ‘हाइव्रेड जातलाई बढी पोषणको आवश्यकता पर्ने तर, कृषकले मलको मात्रा नबढाउनाले पनि उत्पादनमा कमी आएको हो ।’ हाइव्रेड जातका बालीले वर्सेनि माटोको उर्वराशक्तिमा ह्रास ल्याउँदै आएको रानाको भनाई छ ।

कर्णालीमा आर्थिक वर्ष ०७८÷७९ मा १ लाख ५५ हजार ७ सय ४१ मेट्रिक टन धान उत्पादन भएको देखिन्छ । भूमि व्यवस्था तथा कृषि सहकारी मन्त्रालयको तथ्यांक अनुसार आर्थिक वर्ष ०७९÷०८० मा उत्पादकत्व घटेर १ लाख ४५ हजार ६३ मेट्रिक टन उत्पादन भएको थियो । धान खेती हुने जमिन पनि मासिँदै जानुका साथै जलवायु परिवर्तनका कारण पनि उत्पादनमा कमी आएको सरोकारवालाहरु बताउँछन् ।