खोज

चन्द्रौटा (कपिलवस्तु), १४ असार । नेपाल कम्युनिष्ट पार्टीका महासचिव नेत्र विक्रम चन्द ‘विप्लव’ ले छाडा चौपाया व्यवस्थापनमा सबै लाग्नुपर्ने बताएका छन् । कपिलवस्तुको शिवराज नगरपालिका–९ स्थित शिवगढीमा बुधबार आयोजित चौपाया नियन्त्रण तथा व्यवस्थापन उद्घाटन कार्यक्रमलाई सम्बोधन गर्दै उनले यस्तो बताएका हुन् ।

पछिल्लो समय छाडा चौपाया व्यवस्थापन गर्न नसक्दा किसान मर्कामा पर्ने गरेको विप्लवले बताए । युवा पुस्ता वैदेशिक रोजगारीमा प्लायन भइरहको बखत स्वदेशमै रोजगारीको वातावरण सिर्जना गर्ने हेतुले चौपाया व्यवस्थापनमा लागेको उनले बताए । ठूलाठूला सपना बाँड्नुभन्दा ग्रासरूटका नागरिकलाई सेवा गरि सभ्य समाज निर्माणमा योगदान पुग्ने विप्लवले जोड दिए ।

महासचिव विप्लवले समाज परिवर्तनको लागि हिँडेका युवाहरूको समूहले छाडा चौपाया व्यवस्थापन गरेर नौलो काम गरेको बताए । छाडा चौपायाका कारणले सडक दुर्घटना बढ्ने मात्र नभई किसानका बालीनाली नोक्सान गरेको बताए । छाडा चौपायाको व्यवस्थापनलाई उत्पादन सँग जोडेर बायो ग्यास, दूध, घिउ, मल लगायत उत्पादन गरि रोजगारी मूलक सामाजिक सेवा हुने बताए ।

यसैबीच शिवराज नगरपालिकाका मेयर अजय थापाले कृषकको समस्यालाई मध्यनजर गर्दै छाडा चौपायाको व्यवस्थापन गरेको बताए । कृषि क्षेत्रलाई प्रबद्र्धन गर्दै उत्पादनमूखी क्षेत्रमा नगरले लगानी गर्ने उनले उल्लेख गरे । मेयर थापाले अब किसानहरू रातभर जाग्राम बस्न नपर्ने बताए । “छाडा छाडिएको गाई गोरुको व्यवस्थापन गर्न सुरु गरेका छौँ”, उनले भने, “सुन्दर नगर बनाउन नगरवासीले पालेका गाई गोरु पनि अबदेखि छाडा नछाड्नेमा हामी विश्वस्त छौँ ।”

नगर प्रशासकीय अधिकृत बाबुराम पौडेलले चौपाया संरक्षण गर्नुका साथै बालीनालीको समेत संरक्षण हुने बताए । छाडा चौपायाले गर्दा सडक दुर्घटना बढेको उनले जनाए । प्रमुख प्रशासकीय अधिकृत पौडेलले छाडा चौपायालाई निःशुल्क उपचार गर्ने बताए । जनश्रम कृषि सहकारीले छाडा चौपाया व्यवस्थापन गर्ने जिम्मा पाएको छ । व्यवस्थापनपछि दुर्घटना न्यूनीकरण कम हुने पौडेलको भनाइ छ । छाडा चौपाया बस्नको लागि ट्रस, तारजाली, पानी, पराल लगायतको व्यवस्था गरिएको छ । शिवराज नगरपालिकाका वडा नम्बर ३ का वडा अध्यक्ष टेकलाल सापकोटा, ९ नम्बरका वडा अध्यक्ष राम गोपाल थारु, नेकपाका केन्द्रीय सदस्य सफल सी लगायतले सम्बोधन गरेका थिए ।