© २०२३
२२ मंसिर २०८२, सोमबार
२२ मंसिर २०८२, सोमबार
काठमाडौँ ।
विशेष अदालतले महोत्तरीको रम्तेलडाँडा सामुदायिक वन फडानीमा तत्कालीन वन अधिकृतसहित ६ जनालाई दोषी ठहर गरेको छ। सोही मुद्दामा १८ जना अभियुक्तले भने सफाइ पाएका छन्।
डिभिजन वन कार्यालय महोत्तरीका तत्कालीन सहायक वन अधिकृत लक्ष्मणप्रसाद यादव, नापी कार्यालय बर्दिबासका तत्कालीन अमिन रामदरस राउत र सामुदायिक वन उपभोक्ता समितिका तत्कालीन अध्यक्ष शेरबहादुर राउत गलत प्रतिवेदन दिएका आधारमा दोषी ठहर भएकाे विशेष अदालतका सूचना अधिकारी यज्ञराज रेग्मीले जानकारी दिए। कृष्णप्रसाद गौतम, लीलामणि आचार्य र सन्दीप नेपाली मतियारका रूपमा दोषी ठहर भएका छन्। उनीहरू जग्गाधनी हुन्। वन क्षेत्रका रुखलाई व्यक्तिको जग्गाका रुख रहेको भनी काट्नका लागि सिफारिस गरेको उनीहरूमाथि अभियोग थियो।
विशेष अदालतका अध्यक्ष टेकनारायण कुँवर, तेजनारायण सिंह राई र मुरारीबाबु श्रेष्ठको इजलासले यो फैसला गरेको हो। उनीहरूलाई सजाय भने असार २५ गते तोकिनेछ।
अख्तियार दुरुपयोग अनुसन्धान आयोगले २४ जनाविरुद्ध भ्रष्टाचार मुद्दा दायर गरेको थियो। उनीहरूले ११ लाख ९६ हजार ६ सय ९५ रुपैयाँ बराबरको सरकारी सम्पत्ति हानी नोक्सानी गरेको आरोप अख्तियारको थियो।
© २०२३
सर्वाधिकार सुरक्षित
Design & Developed By:
