खोज

दाङ, १२ असार ।

बिपदका बेलामा लैंगिक हिंसाका घटना अझ बढ्ने हुँदा यसको न्यूनीकरणका लागि सबै पक्ष सचेत र जिम्मेवार हुनुपर्नेमा जोड दिईएको छ ।

बिपदको बेला सबैको ध्यान उद्धार, राहत र पुनस्र्थापना गर्दा लैंगिक हिंसा तथा स्वास्थ्य सेवाका आधारभुत विषय ओझेलमा परेर विभिन्न खालमा समस्या निम्तने हुँदा यसतर्फ सबै गम्भीर बन्नुपर्ने आवश्यकता औँल्याईएको छ ।

नेपाल परिवार नियोजन संघ दाङ शाखा स्प्रिन्ट परियोजनाको आयोजनामा बुधबार स्वास्थ्यकर्मी तथा सरोकारवालाहरुका लागि लैंगिक हिंसा र यसले पार्ने प्रभाव बारे आयोजित अभिमुखीकरणमा लैंगिक हिंसाका घटना विपदमा अझ धेरै हुने भएकाले नियामक निकायबाट योजना बनाएर निरुपणको काम गर्नुपर्नेमा जोड दिइएको छ ।

घोराही उपमहानगरपालिका स्वास्थ्य शाखा प्रमुृख राधा पौडेलले हिंसाका घटना न्यूनीकरण गर्न समुदायमा क्रियाशील सबै संघसंस्थाहरु बीच समन्वय र सहकार्य हुनुपर्ने बताइन । प्राय सबैको ध्यान ठूला कुरामा जाने तर साना र ओझेलमा परेका कुरामा चासो नराख्दा यसले पछि ठूलो असर गर्ने हुँदा सबै चनाखो हुनुपर्ने बताइन । हिंसामा परेका महिलाहरूलाई मनोसामाजिक परामर्श गर्नुपर्नेमा जोड दिइन् ।

जिल्ला प्रहरी कार्यालय दाङको महिला बालबालिका तथा ज्येष्ठ नागरिक सेवा केन्द्रमा कार्यरत प्रहरी सहायक निरिक्षक निमा डिसीले विपदमा परेका जुन सुकै हिंसा पीडितको न्यायमा सबै गम्भीर हुन आवश्यक रहेको बताइन । उनले जिल्लामा हरेक वर्ष हिंसाका घटना बढ्दै गएको बताइन् । पछिल्लो समय यौनजन्य हिंसा बढी हुने गरेको बताइन् ।

नेपाल परिवार नियोजन संघ दाङ शाखा सभापति भरतराज देवकोटाले महिला अधिकारका क्षेत्रमा काम गर्ने संघ, सस्थाले एकताबद्द भएर काम गर्नुपर्ने बताए ।

स्वास्थ्य कार्यालयकी जनस्वास्थ्य नर्सिङ रिता न्यौपानेले पीडितले समयमा न्याय नपाउने तथा कतिपय न्यायको पहुँचमा पुग्न नसकेको अवस्था रहेको बताइन।

महिला मानव अधिकार रक्षक सञ्जाल दाङकी अध्यक्ष सुशीला पौडेलले विषय सम्वेदनशील भए पनि नीतिगत रुपमा काम गर्ने वातावरण बन्न नसकेको बताइन । कानुनीरूपमा अधिकार भए पनि ब्यबहारिक रुपमा काम गर्न समस्या भएको बताइन् । पीडित महिलाले आफ्नो कुरा राख्दा घर न बारको अबस्था हुने भएकाले पिडा सहेर बस्न बाध्यता भएको बताइन् ।

नेपाल पत्रकार महासंघ दाङ शाखा उपाध्यक्ष बसुन्धरा गौतमले विपदमा परेकाहरुलाई मनोविमर्श र सामाजिक न्यायमा पहुँच वृद्धि गर्ने काममा छुट्टै संयन्त्र बनाउनुपर्ने बताइन । अहिले भईरहेका अभ्यास प्रभावकारी बनाउनु पर्नेमा जोड दिइन् ।

महिला स्वास्थ्य स्वयंसेविका बिना खनाल, धना जिसी, कमला गिरीलगायतले परिवारबाट पीडित भएकाहरु अझ बढी मारमा पर्ने गरेको बताउँदै उनीहरुको न्याय र पुनस्र्थापनामा सबैको ध्यान जानुपर्ने बताइन । पीडितलाई न्याय पाउने स्थान र सुनुस्चितता हुनुपर्नेमा जोड दिए । कार्यक्रमको सहजीकरण नेपाल परिवार नियोजन संघ दाङ शाखा प्रबन्धक बसन्त खनालले गरेका थिए ।।