खोज

बुटवल, ११ असार । रूपन्देही खेलकुदको उर्वरभूमि हो । यहाँ मार्शल आर्ट, भलिबल, क्रिकेट, बास्केटबल, एथ्लेटिक्स लगायत धेरै खेलका खेलाडीहरू उत्पादन भएका छन । खेल विकास र पूर्वाधारमा सरकारको दीर्घकालिन योजना भने बनाएको पाउँदैनौ । खेलकुद विकासमा खेल गतिविधिसँगै पूर्वाधार महŒवपूर्ण छ । अधिकांश बजेटको प्राथमिकता भने खेलकुद प्रतियोगिता र तालिम हुने गरेको छ । यता खेलकुदको जग्गामा समेत ब्यवसायिक भवन निमार्णमा जोड दिएको पाईएको छ । बुटवल हाटबजारमा रहेको रूपन्देही जिल्ला खेलकुद विकास समितिले आफ्नो जग्गामा ब्यवसायिक भवन निर्माणको ठेक्का नै अघि बढाएको छ । शिलन्यासको तयारीमा नै एकाएक प्रक्रिया नपुगेको भन्दै कार्यक्रमका प्रमुख अतिथि नै हिँडेका थिए ।

ब्यक्तिगत कामकै सिलसिलामा युके रहेका अध्यक्ष भुपेन्द्र थापा क्षेत्री (हरि) एक्कासी कार्यालय परिसरमा ब्यवसायिक भवन बन्ने कुरा सुन्दा अचम्म परेको बुटवल टुडेलाई बताए । संस्थालाई ब्यवसायिक भवनमार्फत श्रोतको ब्यवस्थापन हुनेमा उनी आशाबादी छन । ‘यसबारे बुझन पाएको छैन ।’—उनले भने । सरकार चेन्ज र प्रदेश खेलकुद विकास परिषदका सदस्यसचिव परिवर्तन भएकाले पनि के कसरी काम गर्ने अन्यौलता आएको उनले बताए । कार्यबाहक जिम्मेवारी पाएका उपाध्यक्ष जय प्रसाद लाम्गादेले केन्द्रबाट स्वीकृति लिएर भवनको काम अघि बढाएका थिए । मुख्य चोकमा पर्ने हँदा अहिले ब्यवसायिक भवन बनाउने योजना बनाएको कार्यालय प्रमुख राजेन्द्र श्रेष्ठले बताए । ‘राखेपबाट स्वीकृत लिएर काम अघि बढेको हो ।’—उनले भने । केन्द्रबाट नक्सा स्वीकृत भएर ४८ लाख लागतमा अस्थाई रूपमा १८ कोठाको पूर्वाधार निर्माणको काम अघि बढेको हो । संघको नाममा लालपूर्जा नभएको हँुदा स्थाई संरचना बनाउन नसकिने उनको तर्क छ । ‘नाममा दर्ता छ तर पुर्जा नहुँदा कठिनाई भएको छ ।’— उनले भने । समितिबाट निर्णय गरेर काम गर्न सकिने उनको तर्क छ । भवन निर्माणमा स्थानीयपालिकाबाट समेत १० लाख रूपैयाँ बजेट बिनियोजन भएको पाईएको छ ।

खेलकुद गतिविधि गर्ने गरि सरकारबाट प्राप्त गरेको जग्गामा खेल पूर्वाधार नबनाई अन्यमा जोड दिन नहुने खेलाडी, खेलप्रेमीहरू बताउँछन । करीब दुई दर्जन खेल दर्ता रहेको रूपन्देहीमा अधिकाश खेलका प्रशिक्षक नै छैनन । कराते, तेक्वान्दो, टेबलटेनिस, क्रिकेट खेलबाहेक अन्य खेलका प्रशिक्षक नै छैनन । राष्ट्रिय खेल भलिबलका धेरै राष्ट्रिय खेलाडी उत्पादन गरेको जिल्लामा भोलिन्टियर प्रशिक्षकहरूले धानेको छ । यस्तोमा यी खेल विकास र पूर्वाधारमा जोड दिनुको साटो समिति अहिले ब्यवसायिक भवन निर्माणको तयारीमा जुटेको छ । करीब १६ कठ्ठा जग्गा रहेको समितिमा एउटा ईन्डोर हल, कार्यालय प्रमुखको कोठा एउटा, पदाधिकारीर सदस्य बस्ने हल छ । यसबाहेक ३ वर्षअघि बनेको एउटा हल छ ।