खोज

बुटवल ।

लुम्बिनी प्रदेशमा प्रदेशस्तरीय नगर युवा प्रदेश सभा अभ्यास मंगलबार सम्पन्न भएको छ । जेठ ८ गते देखि सुरु भएको संसदीय अभ्यास कार्यक्रम ११ गते समापन भएको हो । ४ दिने सम्म चलेको उक्त कार्यक्रम लुम्बिनी प्रदेशका सबै स्थानीय तहको गाउँसभाबाट छनौट भएर आएका युवाको प्रतिनिधित्व गर्ने ४२ जना युवाहरुको सहभागिता रहेको थियो ।

युवालाई देशको संविधान नियम कानून, संसदीय व्यवस्था अभ्यास र अनुशासन सिकाइ भविष्यमा असल नेतृत्व गर्न सक्षम जनशक्ति उत्पादन गर्नका लागि राष्ट्रिय युवा परिषद्को समन्वय र लुम्बिनी प्रदेश सरकार सामाजिक विकास मन्त्रालय अन्तर्गत प्रदेश युवा परिषद्ले ४ दिने नमुना युवा प्रदेश सभा–२०८१ संचालन गरेको हो ।

कार्यक्रम समापनलाई संबोधन गर्दै युवा परिषद्का उपाध्यक्ष गोविन्द बहादुर खत्रीले युवाहरुको क्षमता र योग्यता पहिचान गरी मेरो देश म बनाउँछु भन्ने उद्देश्यले समृद्ध राष्ट्र निर्माणमा अगाडि बढ्न अनुरोध गरे ।

हरेक देशमा भएका आर्थिक, सामाजिक, राजनीतिक परिवर्तनमा युवा शक्तिको निर्णायक सहभागिताका कारण परिवर्तन संभव भएको बताउँदै राष्ट्र निर्माणमा सबै उमेर अवस्थाका व्यक्तिहरुको भूमिका महत्वपूर्ण मानिने सन्दर्भमा युवाहरुको भूमिकालाई अझ अर्थपूर्ण र क्रियाशील सहभागी हुनुपर्नेमा जोड दिए ।

कार्यक्रममा संवैधानिक पदमा रहेका लुम्बिनी प्रदेश सांसद तथा पूर्व संबिधान सभा सदस्य, पूर्वमन्त्री ईन्द्रजीत थारुले लोकतान्त्रिक प्रणाली शासकीय स्वरुप र राज्य संचालनको प्रक्रिया, सरकार निर्माण प्रक्रिया, बजेट निर्माण, प्रदेश सभामा कानुन निर्माणको प्रक्रिया, सभामा पेस, छलफल र पारित, कार्यपालिका, न्यायपालिका र व्यवस्थापिका विच अन्तर सम्बन्ध लगायतका विषयमा सहजीकरण गरेका थिए ।

सहभागीहरुका अनुसार यस संसदीय अभ्यास कार्यक्रम मार्फत राज्य, देशको संविधान, सरकारको प्रशासनिक तथा राजनीतिक र लोकतान्त्रिक प्रणालीहरुका बारेमा विस्तृत ज्ञान लिन पाएको बताएका छन् । यससँगै संसदीय अभ्यास गर्दै गर्दा आफुमा क्षमता अभिबृद्धि, भाषण कला, आत्मबल तथा राज्य र राजनीतिक ज्ञान–सिपको विकास भएको महसुस भएको बताए ।

युवाहरुलाई नमुना युवा प्रदेश सभा अभ्यासका विभिन्न सत्रमा सामाजिक विकास मन्त्रालयका कर्मचारी डम्बर खराल, प्रशिक्षक प्रकाश उपाध्याय, परिषद्का सदस्य रिया बस्नेत र सरोज खनाल लगायतले बोल्दै यस्ता कार्यक्रमहरुले, संसदीय प्रणाली, लोकतान्त्रिक मूल्य, संविधानका अन्तरवस्तु, शासकीय प्रणाली, संघीयता र युवाका मुद्दा, सरकारले युवाको नेतृत्व बिकास, लोकतान्त्रिक शासन प्रणाली सुशासन सम्बन्धी युवा सशक्तिकरणका लागि सैद्धान्तिक र व्यावहारिक अभ्यास स्वरुप नमुना युवा सांसद अभ्यासको अबधारणा संघीय सरकारले ल्याएको बताउँदै प्रदेश र स्थानीय तहले पनि युवामैत्री नगरको अबधारणा सहित यस्ता संसदीय अभ्यास कार्यक्रमहरुको सुरुवात गरेको प्रति सरकारलाई धन्यवाद दिएका थिए । युवामा उद्यमशीलता र नेतृत्व विकास गरी देशको नेतृत्व लिन सक्ने जनशक्ति उत्पादनमा यस्तो कार्यक्रमले सहयोग पुग्ने उनहरुले बताए ।

युवा परिषदको कार्यविधि अनुसार पहिलो चरणमा स्थानीय तहमा नगर÷गाउँ सभाको अभ्यास गराइन्छ नगर÷गाउँसभाबाट छनौट भएका युवालाई दोस्रो चरणमा प्रदेश नमुना सभामा सहभागी गराईन्छ र प्रदेश युवा छनौट गरी संघमा पठाईने आयोजकले बताए ।

युवालाई व्यवस्थापिका कार्यपालिका र न्यायपालिकाको कार्य तथा अन्तरसम्बन्धको ज्ञान गराई असल संस्कार र सुझबुझपूर्ण व्यवहार सिकाउनका लागि यस कार्यक्रम सञ्चालन भएको हो ।