खोज

बुटवल,११ असार । आगामी आर्थिक वर्ष २०८१÷८२ का लागि लुम्बिनीका ४ उपमहानगरमध्ये बुटवलले सबैभन्दा ठूलो आकारको वजेट ल्याएको छ । लुम्बिनीमा बुटवल, नेपालगन्ज, घोराही र तुल्सीपुर गरी ४ उपमहानगर छन् । चालु आर्थिक वर्र्षको तुलनामा नेपालगन्ज वाहेक अरु तीन उपमहानगरले वजेटको आकार बढाएका छन् ।
बुटवलले २ अर्ब ९९ करोड रुपैयाँको बजेट ल्याएको छ । बुटवलले चालू वर्षका लागि २ अर्ब ३५ करोड रुपैयाँको बजेट ल्याएको थियो । चालू वर्षको तुलनामा उपमहानगरले आगामी वर्षका लागि ६४ करोडले बजेट वृद्धि गरेको हो ।
नेपालगञ्ज उपमहानगरपालिकाले भने चालु आर्थिक वर्षको तुलनामा १३ करोड घटाएर १ अर्ब ५० करोड ३८ लाख ८६ हजार बराबरको बजेट ल्याएको छ । चालू वर्षका लागि उपमहानगरले १ अर्ब ६३ करोड रुपैयाँको बजेट ल्याएको थियो । २३ वटै वडाहरुका लागि २० करोड रुपैयाँ विनियोजन गरिएको छ । प्रस्तावित बजेटमा आम्दानीतर्फ सशर्त अनुदान (संघ) तर्फ ६१ करोड २४ लाख ७७ हजार रुपैयाँ, समपूरक अनुदान (संघ) १ करोड, विशेष अनुदान (संघ) १ करोड ५० लाख, सशर्त अनुदान (प्रदेश) २ करोड ४ लाख, समपूरक अनुदान (प्रदेश) १ करोड ४० लाख, वित्तीय समानिकरण (संघ) २७ करोड ९५ लाख, वित्तीय समानिकरण (प्रदेश) २ करोड ५ लाख तथा आन्तरिक आयतर्फ २० करोड ११ लाख रुपैयाँ संकलन गर्ने लक्ष्य छ ।
घोराही उपमहानगरपालिकाले २ अर्ब ४२ करोड ७७ लाख १८ हजार रुपैयाँ बजेट ल्याएको छ । यो चालू वर्षको तुलनामा २७ करोड रुपैयाँको वृद्धि हो ।
जसमा चालु खर्च १ अर्ब २७ करोड १० लाख १२ हजार अर्थात ५२.३५ प्रतिशत र पुँजीगत खर्च १ अर्ब १५ करोड ६७ लाख ६ हजार अर्थात ४७.६५ प्रतिशत रहेको छ । चालू वर्षका लागि घोराहीले २ अर्ब १५ करोड रुपैयाँको बजेट ल्याएको थियो ।
तुलसीपुर उपमहानगरपालिकाले आगामी आर्थिक वर्ष २०८१÷०८२ को लागि २ अर्ब ७ करोड ४९ लाख ६८ हजार ३ सय ५१ रुपैँयाको बजेट ल्याएको छ । चालू वर्षको तुलनामा आगामी आर्थिक वर्षका लागि २८ करोड रुपैयाँले बढाएको हो । चालू वर्षका लागि १ अर्ब ७९ करोड रुपैयाँको बजेट ल्याएको थियो ।
उपमहानगरले चालूतर्फ ६५.६३ प्रतिशत र पुँजीगततर्फ ३३.४१ प्रतिशत बजेट विनियोजन भएको छ । चालूतर्फ १ अर्ब ३६ करोड, पुँजीगततर्फ ६९ करोड र वित्तीय खर्चतर्फ २ करोड बजेट विनियोजन भएको छ ।